ବ୍ରହ୍ମପୁର : ଯାତ୍ରା ମଞ୍ଚରେ ବୀଭତ୍ସ ଦୃଶ୍ୟ । ବ୍ରହ୍ମ ରାକ୍ଷସ ପାଲଟିଗଲେ ଯାତ୍ରାକଳାକାର । କଳା ନାମରେ ଲାଗିଛି ଏକ ବଡ଼ କଳଙ୍କ । ନିଜ ଅଭିନୟକୁ ଜୀବନ୍ତ କରିବାକୁ ଯାଇ ଘଟାଇଲେ ପୈଶାଚିକ କାଣ୍ଡ । ନାଟକ ପରିବେଷଣ କରିବା ସମୟରେ କିଛି କଳାକାର ନୃଶଂସତାର ସବୁ ସୀମା ଟପି ଯାଇଛନ୍ତି । ରାକ୍ଷସ ଭୂମିକାରେ ଅଭିନୟ କରୁଥିବା କଳାକାର ପାଲଟି ଯାଇଥିଲେ ସତ ସତିକା ରାକ୍ଷସ । ଶହଶହ ଦର୍ଶକଙ୍କ ଆଗରେ ଏକ ଘୁଷୁରୀକୁ ମାରି ଖାଇଗଲେ କଞ୍ଚା ମାଂସ । ଏଭଳି ଦୃଶ୍ୟ ଦେଖି ହତବାକ ହୋଇଛନ୍ତି ଦର୍ଶକ । ତେବେ ଏ ଦୃଶ୍ୟ ଦେଖି ପଶୁପ୍ରେମୀଙ୍କ ମନରେ ଗଭୀର ଉଦ୍ବେଗ ପ୍ରକାଶ ପାଇଛି । ଏହି ଘଟଣାର ଦିନକ ପୂର୍ବରୁ ମଞ୍ଚରେ ସାପ ଖେଳାଇବା ଭଳି ଦୃଶ୍ୟ ଦେଖିବାକୁ ମିଳିଥିଲା ।
ଯାତ୍ରା ଦଳ ମଧ୍ୟରେ ପ୍ରତିଯୋଗିତାରୁ ଦେଖିବାକୁ ମିଳିଛି ବୀଭତ୍ସ ଦୃଶ୍ୟ । ଦର୍ଶକଙ୍କୁ ଆକୃଷ୍ଟ କରିବା ପାଇଁ ସୀମା ପାର୍ କରୁଛନ୍ତି ଯାତ୍ରା କମିଟି । ବ୍ରହ୍ମପୁରରେ ଦେଖିବାକୁ ମିଳିଛି ଏଭଳି ଲଜ୍ଜାଜନକ ଘଟଣା । ଗଞ୍ଜାମ ଜିଲ୍ଲା ହିଞ୍ଜିଳି ବ୍ଲକ୍ ରାଳବ ଗାଁରେ କଳା ପ୍ରଦର୍ଶନ ନାମରେ ସୀମା ପାର୍ କରିଛନ୍ତି କଳାକାର । ରାଳବ ଗାଁରେ ପ୍ରତିବର୍ଷ ମା’ କାଞ୍ଜିଅଁଳା ଯାତ୍ରା ହୁଏ । ଏହି ଅବସରରେ ଗାଁ ହୁଏ ଉତ୍ସବ ମୁଖର । ସାହି ସାହିରେ ରାମାୟଣ, ଭାରତଳୀଳା, ରାଜା ନାଟକ ଆଦି ପରିବେଷିତ ହେଉଛି ।
ପୌରାଣିକ ନାଟକ କଥାବସ୍ତୁ ପ୍ରଦର୍ଶନ କରିବା ସମୟରେ କଳାକାରମାନେ ମଞ୍ଚ ଉପରେ ସାପ ଖେଳ ସାଙ୍ଗକୁ ଜୀବନ୍ତ ଘୁଷୁରୀକୁ ଖାଇବାକୁ ପଛାଇ ନାହାନ୍ତି ରବିବାର ମଞ୍ଚରେ ଜିଅନ୍ତା ଘୁଷୁରିକୁ ଫାଡ଼ି ଖାଇବା ଭଳି ଦୃଶ୍ୟ ସୋସିଆଲ୍ ମିଡିଆରେ ଭାଇରାଲ୍ ହୋଇଛି ।
ଯାତ୍ରାରେ ପ୍ରଦର୍ଶିତ ଦୃଶ୍ୟଟି ଥିଲା ଜିଅନ୍ତା ଘୁଷୁରି ଲାଲ୍ କପଡ଼ାରେ ବାନ୍ଧି ଟଙ୍ଗା ହୋଇଛି । ତାହାକୁ ପ୍ରଥମେ ହାତରେ ମାରିମାରି ଆହତ କରିବା ପରେ ହାତରେ ହିଁ ତାର ଶରୀରର ଚମଡ଼ା ଝୁଣି କଞ୍ଚା ମାଂସ ଖାଇଥିଲେ । ଶରୀରରୁ ରକ୍ତ ବାହାରି ମଞ୍ଚ ଲାଲ୍ ହୋଇଯାଇଥିଲା । ତଥାପି କଳାକାର ଅଟକି ନ ଥିଲେ । ରକ୍ତାକ୍ତ ଘୁଷୁରିର ଶରୀରରୁ କଞ୍ଚା ମାଂସ ହାତରେ ବାହାର କରି ଖାଇବାରେ ଲାଗିଥିଲେ । ନାଟକଟି ମଞ୍ଚସ୍ଥ ହେଉଥିବାବେଳେ ଏହି ଦୃଶ୍ୟକୁ ଦର୍ଶକ ମଧ୍ୟ ଉପଭୋଗ କରୁଥିଲେ । ଦୁଇଜଣ କଳାକାର ବିପଜ୍ଜନକ ଭାବେ ନାଗ ସାପ ପ୍ରଦର୍ଶନ କରି ଜାତୀୟ ବନ୍ୟ ପ୍ରାଣୀ ଆଇନ ୧୯୭୨ର ଖୋଲାଖୋଲି ଉଲ୍ଲଂଘନ କରିଥିଲେ । ଏନେଇ ବନ ବିଭାଗ ଅଧିକାରୀଙ୍କ ନିକଟରେ ଅଭିଯୋଗ ହୋଇଛି । ଏପରିକି ପଶୁପ୍ରେମୀମାନେ ଏହାକୁ ଘୋର ବିରୋଧ କରିବା ଆରମ୍ଭ କରିଛନ୍ତି ।
ଏହି ଅମାନବୀୟ ଘଟଣାରେ ହିଞ୍ଜିଳି ଥାନା ଆଇଆଇସି ଶ୍ରୀନିବାସ ସେଠୀ କହିଛନ୍ତି, ଗଣମାଧ୍ୟମରେ ଖବର ପ୍ରକାଶ ପରେ ଏହି ଘଟଣା ନଜରକୁ ଆସିଥିଲା । ଏହି ଘଟଣାର ତଦନ୍ତ କରାଯାଉଛି । ବ୍ରହ୍ମପୁର ଡିଏଫ୍ଓ ସୋନି ଖୋଖର୍ କହିଛନ୍ତି, ଏହି ଘଟଣାରେ ମାମଲା ରୁଜୁ କରାଯିବା ସହ ଜଣେ ଆୟୋଜକଙ୍କୁ ଗିରଫ କରାଯାଇଛି । ଏଥିରେ ସମ୍ପୃକ୍ତ ଅନ୍ୟ ଅଭିଯୁକ୍ତମାନଙ୍କୁ ଖୁବ୍ ଶୀଘ୍ର ଗିରଫ କରାଯିବ ବୋଲି ସେ କହିଛନ୍ତି ।
Comments are closed.