କଟକ : ଟିଚର୍ସ ଇଲିଜିବିଲିଟି ଟେଷ୍ଟ (ଓଟିଇଟି) ପରୀକ୍ଷା ମୂଲ୍ୟାୟନରେ ତ୍ରୁଟି ଥିବା ଅଭିଯୋଗ କଟକ ବୋର୍ଡ ଅଫିସ ଘେରିଲେ ଶତାଧିକ ଶିକ୍ଷକ ଓ ଶିକ୍ଷୟିତ୍ରୀ I ଗତ ଅଗଷ୍ଟ ୨୯ରେ ବୋର୍ଡ ପକ୍ଷରୁ ସ୍ପେଶାଲ ଓଟିଇଟି ପରୀକ୍ଷା କରାଯାଇଥିଲା । ଏହାର ପରୀକ୍ଷା ଫଳ ପ୍ରକାଶ ପାଇଛି । ଯେଉଁଥିରେ ଅଧାରୁ ଅଧିକ ଶିକ୍ଷକ ପାସ କରିପାରି ନାହାନ୍ତି । ଗ୍ରେସ ମାର୍କ କିମ୍ବା ପାସ୍ ମାର୍କ ଦାବି କରି ରାଜ୍ୟର ବିଭିନ୍ନ ଆଡୁ ଆସିଥିବା ଏହି ଶିକ୍ଷକ ମାନେ ଗତ ୩ ଦିନ ଧରି ବୋର୍ଡ ଅଫିସ ସାମ୍ନାରେ ଧାରଣା ଦେଇଛନ୍ତି I
ଗତ ଅଗଷ୍ଟ ୨୯ରେ ସ୍ପେଶାଲ ଓଟିଇଟି ପରୀକ୍ଷା ହୋଇଥିବା ବେଳେ ଗତ ୯ ତାରିଖରେ ଏହାର ରେଜଲ୍ଟ ବାହାରିଛି । ସ୍ପେଶାଲ ଓଟିଇଟି ପରୀକ୍ଷା ଦେଇଥିବା ୩୧ ହଜାର ୪୯୨ ଜଣଙ୍କ ମଧ୍ୟରୁ ପାସ କରିଛନ୍ତି ୧୬ ହଜାର ୧୭୧ ଶିକ୍ଷକ । ଏହି ପରୀକ୍ଷା ପାଇଁ ୩୨ ହଜାର ୪୪୮ ଜଣ ଶିକ୍ଷକ ଫର୍ମପୂରଣ କରିଥିଲେ । ହେଲେ ପାସ କରିଛନ୍ତି ୧୬ ହଜାର ୧୭୧ ଜଣ । ପ୍ରଥମ ପେପରରେ ୧୧ ହଜାର ୯୫୫ ଜଣ ଶିକ୍ଷକ ଓ ପେପର-୨ରେ ୪ ହଜାର ୨୧୬ ଜଣ ପାସ କରିଛନ୍ତି । ମୋଟ୍ ପାସ ହାର ୪୯. ୮୪ ପ୍ରତିଶତ ରହିଛି । ହେଲେ ୧୦ ତାରିଖରେ ପୁନର୍ବାର ରେଜଲ୍ଟ ବାହାର କରାଯାଇ ଫେଲ୍ ହୋଇଥିବା ବହୁ ଶିକ୍ଷକ ଶିକ୍ଷୟିତ୍ରୀଙ୍କୁ ପାସ୍ କରାଯାଇଛି। ଅପରପକ୍ଷେ, ୯ ତାରିଖରେ ପ୍ରକାଶିତ ରେଜଲ୍ଟରେ ଭଲ ମାର୍କ ରଖିଥିବା ବହୁ ଶିକ୍ଷକଶିକ୍ଷୟିତ୍ରୀ ଫେଲ୍ ହୋଇ ଯାଇଛନ୍ତି। ଏହାର ପ୍ରତିବାଦରେ ଶହ ଶହ ଶିକ୍ଷକ ୩ ଦିନ ହେଲାଣି ବୋର୍ଡ ସମ୍ମୁଖରେ ଏକାଠି ହୋଇ ନିଜ ଦାବି ଜଣାଉଛନ୍ତି
Comments are closed.