ଭୁବନେଶ୍ୱର : ୨୦ ତାରିଖରୁ ଖୋଲିଛି ମଣ୍ଡି । ପ୍ରଥମେ ବରଗଡ଼ରେ ଆରମ୍ଭ ହୋଇଥିଲା ଧାନ ବିକ୍ରି । ଏହାରି ଭିତରେ ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ମିଲରଙ୍କୁ ଦେଇଛନ୍ତି କଡା ଚେତାବନୀ । ମଣ୍ଡି ବ୍ୟତିତ ବାହାରୁ ଧାନ କିଣିଲେ ହେବ ଦୃଢ କାର୍ଯ୍ୟାନୁଷ୍ଠାନ । ମିଲକୁ ସିଲ କରାଯିବା ସହ କଳା ତାଲିକାଭୁକ୍ତ କରାଯିବ । ନୂଆପଡାରେ ଏହିପରି ଏକ ମିଲକୁ ସିଲ କରାଯାଇଛି । ମଣ୍ଡିରୁ ଧାନ ନ କିଣି ୫୦୦ କ୍ବିଣ୍ଟାଲ ଧାନ ୧୭୦୦ଟଙ୍କାରେ କିଣି ମହଜୁଦ ରଖିଥିଲା । ଆଗକୁ ଏମିତି କାମ ଯିଏ କରିବ ନିଆଯିବ ଦୃଢ କାର୍ଯ୍ୟାନୁଷ୍ଠାନ । ଚାଷୀ ଧାନ ବିକିବାକୁ ତର ତର ହେଉଥିବାରୁ ଦଲାଲ ମାନେ ଏହାର ସୁଯୋଗ ନେଉଛନ୍ତି । ତେଣୁ ଚାଷୀ ମାନଙ୍କୁ ଅପିଲ୍ କରୁଛି ଟୋକନ ଯେଉଁ ସମୟରେ ଦିଆଯାଉଛି ସେହି ସମୟରେ ଧାନ ମଣ୍ଡିକୁ ଆଣନ୍ତୁ । ସରକାର ସେହି ଦିନ ହିଁ ତାଙ୍କ ଠୁ ଧାନ କିଣିନେବେ । କଟନୀ ଛଟନୀ ଉପରେ ମଧ୍ୟ ସରକାର ଧ୍ୟାନ ଦେଇଛନ୍ତି । ୪ ଟି ମଣ୍ଡିକୁ ନେଇ ଗୋଟିଏ ଲେଖାଏଁ ଅଧିକାରୀଙ୍କୁ ନିଯୁକ୍ତ କରାଯାଇଛି ।
ଅନ୍ୟପଟେ ସମ୍ବଲପୁରରେ ଧାନ ମଣ୍ଡି ବୁଲିଛନ୍ତି ରାଜସ୍ବ ମନ୍ତ୍ରୀ ସୁରେଶ ପୂଜାରୀ । ଜିଲ୍ଲାରେ ଚାଷୀଙ୍କ ଠାରୁ ସୁରୁଖୁରୁରେ ଧାନ କିଣା ଚାଲିଛି କି ନାହିଁ ତାହା ତଦାରଖ କରିଛନ୍ତି । ବରେଇପାଲି ମଣ୍ଡି ପରିଦର୍ଶନ କରି ମଣ୍ଡି ଅଧିକାରୀଙ୍କ ସହ ଆଲୋଚନା କରିଛନ୍ତି । ଏହା ସହିତ ବରେଇପାଲି ମଣ୍ଡିକୁ ଏକ ଆଦର୍ଶ ମଣ୍ଡି ଭାବରେ ଗଢିବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ରାଜସ୍ବ ମନ୍ତ୍ରୀ ।
Comments are closed.