ଭୁବନେଶ୍ୱର: ଷୋଡ଼ଶ ଅର୍ଥ କମିଶନଙ୍କ ସହ ଓଡିଶା ସରକାରଙ୍କ ବୈଠକ ଶେଷ ହୋଇଛି । ଆଗାମୀ ୫ ବର୍ଷ ଅର୍ଥାତ ୨୦୨୬-୩୧ ପାଇଁ କମିଶନ ନିକଟରେ ସର୍ବମୋଟ ୧୨ ଲକ୍ଷ ୫୬ ହଜାର କୋଟି ଟଙ୍କା ଦାବି ଉପସ୍ଥାପନ କରିଛନ୍ତି ଓଡିଶା ସରକାର । ସେହିପରି ଦେଶର ଟିକସ ରାଜସ୍ୱରୁ ରାଜ୍ୟ ଭାଗକୁ ୪୧ ରୁ ୫୦ ପ୍ରତିଶତକୁ ବୃଦ୍ଧି କରିବା ପାଇଁ ଦାବି ରଖିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରାଜ୍ୟ ବିପର୍ଯ୍ୟୟ ପରିଚାଳନା ପାଣ୍ଠିରେ କେନ୍ଦ୍ର ସରକାରଙ୍କ ଭାଗ ୧୦୦ ପ୍ରତିଶତ କରିବାକୁ ମଧ୍ୟ ଦାବି ହୋଇଛି । ୨୦୨୬ -୨୦୩୧ ଯାଏଁ ପଞ୍ଚ ବାର୍ଷିକ ଯୋଜନା ମାଧ୍ୟମରେ ଏହା ପ୍ରତିଫଳିତ ହେବ ବୋଲି ଆଶା ଅଛି । ଏହାକୁ ଆଧାର କରି କମିଶନ ନିକଟରେ ଦାବି ରଖାଯାଇଛି ।”
୪ ଦିନିଆ ଓଡ଼ିଶା ଗସ୍ତରେ ଆସିଥିବା ଷୋଡ଼ଶ ଅର୍ଥ କମିଶନଙ୍କ ସହ ରାଜ୍ୟ ସରକାରଙ୍କ ହୋଟେଲ ଆଇଟିସିରେ ଗୁରୁବାର ଉଚ୍ଚ ସ୍ତରୀୟ ବୈଠକ ଅନୁଷ୍ଠିତ ହୋଇ ଯାଇଛି । ବୈଠକ ପରେ ରାଜ୍ୟ ସରକାର ରଖିଥିବା ଦାବିଗୁଡ଼ିକ ବିଷୟରେ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ମୁଖ୍ୟମନ୍ତ୍ରୀ କହିଛନ୍ତି,ଓଡ଼ିଶାର ଅର୍ଥନୈତିକ ସ୍ଥିତି ସହ ଅଭିବୃଦ୍ଧି ଏବଂ ବିକାଶ କାମକୁ ଅନୁଧ୍ୟାନ କରିଛନ୍ତି ଷୋଡ଼ଶ ଅର୍ଥ କମିଶନ । ଏହା ସହ ଆଗାମୀ ଦିନରେ ଓଡ଼ିଶା କେମିତି ଗୁରୁତ୍ଵ ଦେବ, ସମୃଦ୍ଧ ଓଡ଼ିଶା କରିବା ପାଇଁ ଚିନ୍ତନ କରାଯାଇଛି । ତେବେ ପୂର୍ବ ଅପେକ୍ଷା ଅଧିକ ଆର୍ଥିକ ସହାୟତା ଆସିବ ବୋଲି ଆଶା ରଖିଛନ୍ତି ମୁଖ୍ୟମନ୍ତ୍ରୀ । ୪ କୋଟି ୭୦ ଲକ୍ଷ ଲୋକଙ୍କୁ ଆଧାର କରି ସମୃଦ୍ଧ ଓଡିଶା ଗଠନ ପାଇଁ ଲକ୍ଷ୍ୟ ରଖାଯାଇଛି । ଭାରତର ଶ୍ରେଷ୍ଠ ୫ଟି ରାଜ୍ୟ ଭିତରେ ରହିବା ପାଇଁ ଲକ୍ଷ୍ୟ ରଖିଛି ଓଡ଼ିଶା ।
ଅନ୍ୟପକ୍ଷରେ ବୈଠକ ପରେ ଷୋଡ଼ଶ ଅର୍ଥ କମିଶନ ଅଧ୍ୟକ୍ଷ ଡକ୍ଟର ଅରବିନ୍ଦ ପାନଗେରିୟା ପ୍ରତିକ୍ରିୟାରେ କହିଛନ୍ତି, ସ୍ୱତନ୍ତ୍ର କାଟେଗୋରି ଏବଂ ସ୍ପେଶାଲ ଷ୍ଟାଟସ୍ ରାଜ୍ୟ ଅର୍ଥ କମିଶନଙ୍କ ଅଧିନରେ ଆସୁ ନାହିଁ । ନୀତି ଆୟୋଗଙ୍କ ଦ୍ଵାରା ଯୋଜନା ଆୟୋଗଙ୍କ କମିଶନର ଉଚ୍ଛେଦ ପରେ ଏ ବ୍ୟବସ୍ଥା ଆଉ ପ୍ରଚଳିତ ହେଉ ନାହିଁ । ଦେଶର କୌଣସି ରାଜ୍ୟ ଏ ସୁବିଧା ପାଉନାହାନ୍ତି, ଏନେଇ କୌଣସି ଟିପ୍ପଣୀ ଦେବାର ଅଧିକାର ଆମର ନାହିଁ ବୋଲି କହିଛନ୍ତି ଅଧ୍ୟକ୍ଷ ।
ସୂଚନାନୁସାରେ,କମିଶନ ୪ ତାରିଖ ଓଡିଶା ଗସ୍ତରେ ଆସିବା ପରେ ଜନଜାତି ସଂଗ୍ରହାଳୟ, କଳିଙ୍ଗ ଷ୍ଟାଡିୟମ ପରିଦର୍ଶନ କରିଥିଲେ । ୫ ତାରିଖ ପୁରୀ ଗସ୍ତ କରି ମହାପ୍ରଭୁଙ୍କ ଦର୍ଶନ କରିଛନ୍ତି ।ସେହିପରି ଭୁବନେଶ୍ୱର ଓ କୋଣାର୍କର ବିଭିନ୍ନ ଦର୍ଶନୀୟ ସ୍ଥାନ ଗସ୍ତ କରିଛନ୍ତି ।”
Comments are closed.