ଭୁବନେଶ୍ୱର : ରାଜ୍ୟ ଡ୍ରାଇଭର ସଂଘର ଷ୍ଟିଅରିଂ ଛାଡ଼ ଆନ୍ଦୋଳନର ଚତୁର୍ଥ ଦିନରେ ଆଜି ସ୍ୱାଭାବିକ ହୋଇଛି ବସ ଚଳାଚଳ । ତେବେ ଏହି ଘଟଣାକୁ ନେଇ ଦି’ଫାଳ ହୋଇଛି ସଂଘ । ପ୍ରଥମେ ଗାଡି ମାଲିକ ମାନେ ଡ୍ରାଇଭର ସଂଘକୁ ସମର୍ଥନ ଦେବା ପରେ ଜୋରଦାର ହୋଇଥିଲା ଆନ୍ଦୋଳନ । ତେବେ ଗତକାଲି ଠାରୁ ବସ ମାଲିକଙ୍କ ନିଷ୍ପତିରେ କେତେକ ଜିଲ୍ଲାରେ ବସ ଚଳାଚଳ କରିଥିବାବେଳେ,ଆଜିଠାରୁ ସମସ୍ତ ଘରୋଇ ବସ ଗୁଡିକ ସ୍ୱାଭାବିକ ଭାବରେ ଚଳାଚଳ କରିଛି । ତେବେ ବର୍ତ୍ତମାନ ସୁଦ୍ଧା ଅନ୍ୟ କେତେକ ଡ୍ରାଇଭର ଆନ୍ଦୋଳନରେ ବସିଛନ୍ତି । ବସ ଚଳାଚଳ କରିବା ପରେ ଡ୍ରାଇଭର ସଂଘର ଦୋମୁହାଁ ନୀତି ପଦାରେ ପଡ଼ିବା ପରେ ଏବେ ସଭାପତିଙ୍କ କଥା କେହି ଶୁଣୁ ନାହାଁନ୍ତି । ଏହାକୁ ନେଇ ଏକାଠି ହୋଇ ରହିବା ସହିତ ଆନ୍ଦୋଳନ ଜାରି ରଖିବାକୁ କାନ୍ଦି କାନ୍ଦି ନେହୁରା ହୋଇଛନ୍ତି ସଭାପତି ପ୍ରଶାନ୍ତ ମେଣ୍ଡୁଲି ।
ଆଜି ଡ୍ରାଇଭର ସଂଘ ସଭାପତି ପ୍ରଶାନ୍ତ ମେଣ୍ଡୁଲି କାନ୍ଦି କାନ୍ଦି ଏକ ଭିଡ଼ିଓ ଜାରି କରିଛନ୍ତି । ସେ ଭିଡ଼ିଓରେ କହିଛନ୍ତି ଯେ ଡ୍ରାଇଭରମାନେ ବିଚାର କରନ୍ତୁ, ଏ ସମୟ ଆଉ ମିଳିବ ନାହିଁ । ଡ୍ରାଇଭରମାନଙ୍କୁ ଧୈର୍ଯ୍ୟ ଧରି ଏକ ହୋଇ ରହିବାକୁ ପରାମର୍ଶ ଦେଇଛନ୍ତି । ଏତେ ଲାଗିବା ପରେ ଏବଂ ସରକାରଙ୍କ ସହିତ ଲଢ଼ିବା ପରେ ଏପରି ଅବସ୍ଥା ପାଇଁ ସେ ଦୁଃଖ ପ୍ରକାଶ କରିଛନ୍ତି । ଶେଷରେ “ଏକ୍ ରହଙ୍ଗେ ତୋ ସେଫ୍ ରହେଙ୍ଗେ” କହିଛନ୍ତି ମେଣ୍ଡୁଲି । ଯେଉଁମାନେ ମାଲିକଙ୍କ ଇଚ୍ଛାରେ ଯିବାକୁ ଚାହୁଛନ୍ତି, ଯାଇପାରିବେ । କିନ୍ତୁ ସେମାନଙ୍କର ଫଟୋ ଉଠା ହେବ । ସେମାନଙ୍କର ପଇସା ଫେରସ୍ତ କରାଯିବା ସହିତ ସଂଘରେ ଆଉ ସଦସ୍ୟ ହୋଇ ରହିବେ ନାହିଁ ନାହିଁ ବୋଲି କହିଛନ୍ତି ମେଣ୍ଡୁଲି।
ମେଣ୍ଡୁଲି ଡ୍ରାଭର ସଂଘଙ୍କୁ ଆହ୍ବନ ଦେଇ କହିଥିଲେ କି, ସରକାର ଯଦି ସେମାନଙ୍କ ସାତୋଟି ଦାବି ମଧ୍ୟରୁ ପାଞ୍ଚୋଟି ଦାବି ପୂରଣ ପାଇଁ ରାଜି ହୋଇଛନ୍ତି, କିନ୍ତୁ ଲିଖିତ ପ୍ରତିଶ୍ରୁତି ନ ମିଳିବା ଯାଏଁ ସଂଘ ଆନ୍ଦୋଳନ ବନ୍ଦ କରିବ ନାହିଁ। ସେ ରାଜ୍ୟର ୩୦ଟି ଜିଲ୍ଲାର ଡ୍ରାଇଭରମାନଙ୍କୁ ଏହି ଆନ୍ଦୋଳନରେ ସାମିଲ ହେବାକୁ ଅନୁରୋଧ କରିଥିଲେ।
ସେପଟେ ସଂଘର ସଭାପତି ପ୍ରଶାନ୍ତ ମେଣ୍ଡୁଲିଙ୍କ ନେତୃତ୍ୱକୁ ନେଇ ଅନେକ ଡ୍ରାଇଭର ଅସନ୍ତୋଷ ପ୍ରକାଶ କରିଥିବା ବେଳେ, ଏହି ବିବାଦ ଏକ ନୂଆ ମୋଡ଼ ନେଇଛି। ମେଣ୍ଡୁଲିଙ୍କ ବିରୋଧରେ ମିନି ଟ୍ରକ ମାଲିକ ସଂଘ ଭୁବନେଶ୍ୱର ମଞ୍ଚେଶ୍ୱର ଥାନାରେ ଏକ ଅଭିଯୋଗ ଦାୟର କରିଛନ୍ତି, ଯେଉଁଥିରେ ସେ ଅଗଣତାନ୍ତ୍ରିକ ପଦ୍ଧତିରେ ହକ ମାଗୁଥିବା ଏବଂ ଡ୍ରାଇଭର ଓ ମାଲିକମାନଙ୍କୁ ଅପମାନିତ କରୁଥିବା ଅଭିଯୋଗ ହୋଇଛି।
Comments are closed.