ଦିଲ୍ଲୀ: ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ ବିମାନରେ ଅତ୍ୟଧିକ ମଦ ପିଇଥିବାରୁ ତାଙ୍କୁ ଜର୍ମାନୀର ଗୋଟିଏ ବିମାନବନ୍ଦରରେ ଓହ୍ଲାଇ ଦିଆଯାଇଥିବା ଅଭିଯୋଗର ଯାଞ୍ଚ ହେଉଥିବା କହିଛନ୍ତି କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ । ମୁଖ୍ୟମନ୍ତ୍ରୀ ମାନ ଜର୍ମାନୀରୁ ଦିଲ୍ଲୀ ଆସିବାକୁ ଥିବା ବେଳେ ଅତ୍ୟଧିକ ନିଶା ଯୋଗୁ ତାଙ୍କୁ ଫ୍ରାଙ୍କଫ୍ରଟ ବିମାନବନ୍ଦରରେ ଓହ୍ଲାଇ ଦିଆଯାଇଥିବା ଗତକାଲି ଏକାଧିକ ବିରୋଧୀ ଦଳ ପକ୍ଷରୁ ଅଭିଯୋଗ ହୋଇଥିଲା । ଆପ୍ ଏହାକୁ ଖଣ୍ଡନ କରିଥିଲେ ମଧ୍ୟ ଘଟଣାର ଗୁରୁତ୍ୱ ଅଧିକ ଥିବାରୁ ଏହାକୁ ଯାଞ୍ଚ କରାଯାଉଥିବା ସିନ୍ଧିଆ କହିଛନ୍ତି ।
ସୋମବାର ଶିରୋମଣି ଅକାଳୀ ଦଳର ମୁଖ୍ୟ ସୁଖବୀର ସିଂହ ବାଦଲ ଅଭିଯୋଗ କରିଥିଲେ ଯେ ମୁଖ୍ୟମନ୍ତ୍ରୀ ମାନଙ୍କୁ ଲୁଫଥାନସା ବିମାନରୁ ଅତ୍ୟଧିକ ମଦ୍ୟପାନ ଯୋଗୁ ଫ୍ରାଙ୍କପ୍ରଟ ବିମାନବନ୍ଦରେ ଓହ୍ଲାଇ ଦିଆଯାଇଥିଲା । କଂଗ୍ରେସ ନେତା ପ୍ରତାପ ସିଂହ ବାଜୱା ମଧ୍ୟ ଘଟଣାର ତଦନ୍ତ ଦାବି କରି କେନ୍ଦ୍ରମନ୍ତ୍ରୀ ସିନ୍ଧିଆଙ୍କ ପାଖକୁ ଚିଠି ଲେଖିଥିଲେ । ଏହାପରେ ଆଜି ପ୍ରତିକ୍ରିୟା ଦେଇ ସିନ୍ଧିଆ କହିଛନ୍ତି, ଯାହା ବି ଘଟିଛି ବିଦେଶ ମାଟିରେ ଘଟିଛି । ଆମକୁ କୌଣସି ର୍ନିଯାସରେ ପହଞ୍ଚିବା ପୂର୍ବରୁ ପୂରା ତଥ୍ୟକୁ ଯାଞ୍ଚ କରିବାକୁ ପଡ଼ିବ । ଲୁଫଥାନସା ଏୟାରଲାଇନକୁ ତଥ୍ୟ ଦେବାକୁ ହେବ । ମୋ ପାଖକୁ ଆସିଥିବା ଅନୁରୋଧକୁ ଭିତ୍ତି କରି ମୁଁ ନିଶ୍ଚିତ ଘଟଣାର ଅନୁଧ୍ୟାନ କରିବି । ଅନ୍ୟପକ୍ଷରେ ବିରୋଧୀଙ୍କ ସମସ୍ତ ଅଭିଯୋଗକୁ ଆପ୍ ଖଣ୍ଡନ କରିଛି ।
କେବଳ ମାନ ଓ ଆପକୁ ବଦନାମ କରିବା ପାଇଁ ଏପରି ଷଡ଼ଯନ୍ତ୍ର କରାଯାଇଥିବା ଦଳ ପକ୍ଷରୁ କୁହାଯାଇଛି ।
ସୂଚନାଯୋଗ୍ୟ, ବିଦେଶ କମ୍ପାନୀଗୁଡ଼ିକୁ ପଞ୍ଜାବକୁ ଆକୃଷ୍ଟ କରିବା ପାଇଁ ମାନ ୮ ଦିନିଆ ଜର୍ମାନୀ ଗସ୍ତରେ ଯାଇଥିଲେ । ସେଠାରୁ ସୋମବାର ଫେରିବା ବେଳେ ଏପରି ଘଟିଥିବା ଅଭିଯୋଗ ହୋଇଛି ।
Comments are closed.