ବାଲେଶ୍ୱର : ଜନ୍ମ ମାଟି ପହଁଚିଲା ପ୍ରଶାନ୍ତଙ୍କ ପାର୍ଥିବ ଶରୀର । ଘଟଣା ପରଠାରୁ ସ୍ତବ୍ଧ ହୋଇଛି ସାରା ଗାଁ । ଲୁହ ଏବଂ କୋହରେ ୩ ଦିନ ହେଲାଣି ଭିଜୁଛି ଇସାଣୀ ଗାଁ ମାଟି । ଆବାଳ ବୃଦ୍ଧବନିତା ସମସ୍ତଙ୍କ ଆଖିରୁ ଗାଡିଚାଲିଛି ଲୁହ । ଦୁଇଦିନ ତଳେ ଘରୁ ସ୍ତ୍ରୀ ସହ ପୁଅକୁ ଧରି ଜାମ୍ମୁ-କାଶ୍ମୀର ପହଲଗାମ ବୁଲି ଯାଇଥିଲେ ଇସାଣୀ ଗ୍ରାମର ପ୍ରଶାନ୍ତ ଶତପଥୀ। ପହଲଗାମରେ ଆତଙ୍କବାଦୀଙ୍କ ଗୁଳିରେ ସେ ଜୀବନ ହାରିଥିଲେ । ସାରା ରାଜ୍ୟବାସୀ ଏହି ଖବର ଶୁଣି ଦୁଃଖରେ ଭାଙ୍ଗି ପଡ଼ିଛନ୍ତି ।
ଗତକାଲି ରାତିରେ ମରଶରୀର ଜାମ୍ମୁ-କାଶ୍ମୀରରୁ ଆସି ଭୁବନେଶ୍ୱରରେ ପହଞ୍ଚିଥିଲା। ଭୁବନେଶ୍ବର ବିମାନବନ୍ଦରରେ ରାତି ପ୍ରାୟ ୧୨ଟା ୩୦ମିନିଟରେ ପହଞ୍ଚିଥିଲା ପ୍ରଶାନ୍ତଙ୍କ ମରଶରୀର। ବିଳମ୍ବିତ ରାତି ପର୍ଯ୍ୟନ୍ତ ବିମାନବନ୍ଦରରେ ଅପେକ୍ଷା କରି ରହିଥିଲେସାଧାରଣ ଜନତାଠାରୁ ଆରମ୍ଭ କରି ରାଜନେତା ଏବଂ ବରିଷ୍ଠ ପୋଲିସ ଅଧିକାରୀ। ପ୍ରଶାନ୍ତଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ ଉପମୁଖ୍ୟମନ୍ତ୍ରୀ କେଭି ସିଂହଦେଉ, ରାଜସ୍ୱମନ୍ତ୍ରୀ ସୁରେଶ ପୂଜାରୀ, ରାଜ୍ୟ ବିଜେପି ସଭାପତି ମନମୋହନ ସାମଲ, ପିସିସି ସଭାପତି ଭକ୍ତ ଦାସଙ୍କ ସହ ପୋଲିସ ଡିଜି ଓ୍ୱାଇ.ବି ଖୁରାନିଆ ଓ ବରିଷ୍ଠ ପୋଲିସ ଅଧିକାରୀ। ଏହାପରେ ପୈତୃକ ଗ୍ରାମ ବାଲେଶ୍ୱର ଇସାଣୀ ଗାଁ ଅଭିମୁଖେ ବାହାରିଥିଲା ପାର୍ଥୀବ ଶରୀର। ଗତକାଲି ମୃତଦେହ ଗାଁରେ ପହଞ୍ଚିବା ପରେ ଶୋକାକୂଳ ପରିବେଶ ସୃଷ୍ଟି ହୋଇଥିଲା।
ଗୁରୁବାର ସକାଳେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବାଲେଶ୍ୱର ଇସାଣୀ ଗାଁରେ ପହଞ୍ଚି ଶେଷ ଦର୍ଶନ କରିବା ସହ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି । ଏହାସହିତ ସ୍ବର୍ଗତଃ ପ୍ରଶାନ୍ତଙ୍କ ପରିବାରକୁ ରାଜ୍ୟ ସରକାରଙ୍କ ପକ୍ଷରୁ ୨୦ ଲକ୍ଷ ଟଙ୍କାର ସହାୟତା ରାଶି ଘୋଷଣା କରାଯାଇଛି । ଏହାସହିତ ପ୍ରଶାନ୍ତଙ୍କ ସ୍ତ୍ରୀଙ୍କୁ ସରକାରୀ ଚାକିରି ଏବଂ ପୁଅର ପାଠପଢ଼ାର ସମସ୍ତ ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ପ୍ରତିଶୃତି ଦେଇଛନ୍ତି ମୁଖ୍ୟମନ୍ତ୍ରୀ ।
ମଙ୍ଗବାର ଅପରାହ୍ନରେ ଜାମ୍ମୁ-କାଶ୍ମୀରର ପହଲଗାମରେ ନିରୀହ ପର୍ଯ୍ୟଟକଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣକୁ କଡ଼ା ନିନ୍ଦା କରିବା ସହ ଆତଙ୍କୀଙ୍କ ବର୍ବରତାକୁ ଯେତେ ନିନ୍ଦା କଲେ କମ୍ ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଧର୍ମ ଆଧାରରେ ହତ୍ୟା କରିବା ଘଟଣାକୁ ମଧ୍ୟ ମୁଖ୍ୟମନ୍ତ୍ରୀ ତୀବ୍ର ନିନ୍ଦା କରିଛନ୍ତି ।
Comments are closed.