ନୂଆଦିଲ୍ଲୀ: ପ୍ରଖ୍ୟାତ ଯାଦୁଗର ଓପି ଶର୍ମାଙ୍କର ଶନିବାର ବିଳମ୍ବିତ ରାତିରେ ୭୧ ବର୍ଷ ବୟସରେ ଦେହାନ୍ତ ହୋଇଯାଇଛି । ସେ କରୋନାରେ ସଂକ୍ରମିତ ହୋଇ ଲମ୍ବା ସମୟରୁ କାନପୁରର ଫର୍ଚୁ୍ୟନ ହସ୍ପିଟାଲରେ ଚିକିତ୍ସାରତ ଥିଲେ । ତାଙ୍କର ଡାୟଲିସିସ୍ ମଧ୍ୟ ଚାଲିଥିଲା । ଓପି ଶର୍ମା ତାଙ୍କ ଜୀବନ କାଳ ଭିତରେ ନିଜର ଯାଦୁ କଳା ଦ୍ୱାରା ଦେଶ, ବିଦେଶରୁ ସୁଖ୍ୟାତି ଅର୍ଜନ କରିଥିଲେ ।
ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓମି ଶର୍ମାଙ୍କ ନିଧନରେ ଗଭୀର ଶୋକ ବ୍ୟକ୍ତ କରିଛନ୍ତି । ସିଏମ୍ ଯୋଗୀ ଏ ନେଇ ଏକ ଟ୍ୱିଟ୍ କରି ଲେଖିଛନ୍ତି, ‘ନିଜ କଳା ଦ୍ୱାରା ବହୁ ବର୍ଷ ଧରି ଦର୍ଶକମାନଙ୍କ ମନୋରଞ୍ଜନ କରୁଥିବା ପ୍ରଖ୍ୟାତ ଯାଦୁଗର ଓପି ଶର୍ମାଙ୍କ ନିଧନ ଅତ୍ୟନ୍ତ ଦୁଃଖଦାୟକ । ପ୍ରଭୁ ରାମଙ୍କୁ ପ୍ରାର୍ଥନା କରୁଛି କି, ସେହି ଦିମ୍ବଗତ ଆତ୍ମାକୁ ନିଜ ଚରଣରେ ସ୍ଥାନ ଦିଅ;ୁ ଏବଂ ତାଙ୍କ ଶୋକାକୂଳ ପରିବାରକୁ ଦୁଃଖ ସହିବା ପାଇଁ ଶକ୍ତି ଦିଅ;ୁ ।
କାନପୁରର ଦକ୍ଷିଣରେ ବରରା-୨ରେ ଓପି ଶର୍ମା ନିଜର ଘର ତିଆରି କରିଥିଲେ । ସେ ନିଜ ଘରର ନାଁ ରଖିଥିଲେ ‘ଭୂତ ବଙ୍ଗଳା’ । ଏତିକି ନୁହେଁ, ଘରର ମୁଖ୍ୟ କବାଟ ସମ୍ମୁଖରେ ଭୂତର ଆକୃତି ମଧ୍ୟ ସେ ତିଆରି କରିଛନ୍ତି । ସ୍ଥାନୀୟ ଅଞ୍ଚଳରେ ଏହି ବଙ୍ଗଳା ବହୁତ ଚର୍ଚ୍ଚିତ ରହିଛି । ଯାଦୁରେ ପାରଙ୍ଗମ ଓପି ଶର୍ମାଙ୍କୁ ଇଣ୍ଡିଆନ ମ୍ୟାଜିକ୍ ମିଡିଆ ସର୍କଲ ‘ନ୍ୟାସନାଲ ମ୍ୟାଜିକ୍ ଆୱାର୍ଡ ୨୦୨୧’ରେ ସମ୍ମାନିତ କରିଛି । ତାଙ୍କୁ ‘ଶେହନଶାହ-ଏ-ଯାଦୁ’ର ଉପାଧି ପ୍ରଦାନ କରାଯାଇଥିଲା ।
ଓପି ଶର୍ମା ୨୦୦୨ରେ ରାଜନୀତିରେ ବି ପ୍ରବେଶ କରିଥିଲେ । ସେ ଗୋବିନ୍ଦ ନଗର ବିଧାନସଭା ଆସନରୁ ସମାଜବାଦୀ ପାର୍ଟିର ଟିକେଟରେ ନିର୍ବାଚନ ଲଢ଼ିଥିଲେ । ନିର୍ବାଚନ ପ୍ରଚାର ସମୟରେ ଶର୍ମା ଯାଦୁ ଦେଖାଇ ଭୋଟ ମାଗୁଥିବାର ନଜର ଆସିଥିଲେ । ତାଙ୍କ ଭୋଟ ମାଗିବାର ଶୈଳୀରେ ନିର୍ବାଚନୀ ସଭାରେ ଶହ ଶହ ଲୋକଙ୍କ ଭିଡ଼ ଜମିଥିଲା, ହେଲେ ପରିତାପର ବିଷୟ ଯେ ସେ ସେତିକି ଭୋଟ ହାତେଇ ପାରି ନ ଥିଲେ ।
Comments are closed.