ପିପିଲି : ପିପିଲି ମହିଳା ପୋଡି ଘଟଣାରେ ବଡ ତଥ୍ୟ ସାମ୍ନାକୁ ଆସିଛି । ଏନେଇ ଗୁରୁବାର ଅତିରିକ୍ତ ଏସପି ସୂଚନା ଦେଇ କହିଛନ୍ତି, ପିପିଲି ଘଟଣା ପଛରେ ଆତ୍ମଦାହ ଉଦ୍ୟମ ରହିଛି। ପାରିବାରିକ କଳହ ନଥିଲା। ଋଣ ଚାପରୁ ଆତ୍ମହତ୍ୟା ଉଦ୍ୟମ କରିଛନ୍ତି। ଘଟଣାସ୍ଥଳରୁ ସୁଇସାଇଡ୍ ନୋଟ୍ ଓ କିରାସିନି ବୋତଲ ଜବତ ହୋଇଛି । ସୁଇସାଇଡ୍ ନୋଟ୍କୁ ଯାଞ୍ଚ ପାଇଁ ପଠାଯାଇଛି । ପାଖରେ ଥିବା ସିସିଟିଭିକୁ ମଧ୍ୟ ଯାଞ୍ଚ କରାଯାଉଛି । ଶରୀର ୯୦ ପ୍ରତିଶତ ପୋଡି ଯାଇଥିବା ବେଳେ ଭେଣ୍ଟିଲେଟରରେ ରହିଛନ୍ତି ।
ସୂଚନାଯୋଗ୍ୟ, ବୁଧବାର ସନ୍ଧ୍ୟାରେ ପିପିଲି ଅଞ୍ଚଳର ଜଣେ ମହିଳା ନିଆଁରେ ପୋଡି ହୋଇ ଗୁରୁତର ହୋଇଥିଲେ । ମହିଳାଙ୍କ ନାମ ଅର୍ଚ୍ଚନା ଦାଶ ବୋଲି ସୂଚନା ମିଳିଛି। ପ୍ରାଥମିକ ଚିକିତ୍ସା ପରେ ତାଙ୍କୁ ଗୁରୁତର ଅବସ୍ଥାରେ ପିପିଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରୁ ଭୁବନେଶ୍ୱର ଏମ୍ସକୁ ସ୍ଥାନାନ୍ତର କରାଯାଇଛି। ସେଠାରେ ଆଜି ମହିଳା କମିଶନ ସଦସ୍ୟା ଉର୍ମିଳା ମହାପାତ୍ର ଯାଇ ମହିଳାଙ୍କ ସ୍ୱାମୀ ଏବଂ ତାଙ୍କ ବାପାଙ୍କୁ ଭେଟି ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି I ମହିଳାଙ୍କ ସ୍ବାସ୍ଥ୍ୟାବସ୍ଥା ବର୍ତ୍ତମାନ ସଙ୍କଟାପନ୍ନ ଅଛି।କୌଣସି ପାରିବାରିକ କଳହ ନଥିବା କହିଛନ୍ତି ।
ଏପଟେ ପୀଡ଼ିତାଙ୍କ ବୟାନ ରେକର୍ଡ କରିବ ପୋଲିସ। ଏ ନେଇ ପିପିଲି ଏସଡିପିଓ, ପୀଡ଼ିତା ଚିକିତ୍ସିତ ହେଉଥିବା ଭୁବନେଶ୍ବର ଏମ୍ସକୁ ଯାଇଥିବା ସୂଚନା ମିଳିଛି। ଗତକାଲି ଘଟଣା ପରେ ରାତିରେ ମଧ୍ୟ ମେଡିକାଲରେ ପୀଡ଼ିତାଙ୍କ ବୟାନ ରେକର୍ଡ ପାଇଁ ଉଦ୍ୟମ କରିଥିଲା ପୋଲିସ। କିନ୍ତୁ ପୀଡ଼ିତା କଥା କହିବା ସ୍ଥିତିରେ ନଥିବାରୁ ପୋଲିସ ବୟାନ ରେକର୍ଡ ନକରି ଫେରି ଆସିଥିଲା।
