ପରଭେଜ ମୁଶରଫ ଥିଲେ ଶାନ୍ତି ଦୂତ ,ଶଶି ଥରୁର

ନୂଆଦିଲ୍ଲୀ : ପାକିସ୍ଥାନ ର ପୂର୍ବତନ ରାଷ୍ଟ୍ରପତି ପରଭେଜ ମୁସରଫ ଙ୍କର ଗତକାଲି ନିଧନ ହୋଇଛି I ସେ ଦୀର୍ଘ ଦିନରୁ ଅସୁସ୍ଥ ଥାଇ ଦୁବାଇ ର ଏକ ହସ୍ପିଟାଲରେ ଚିକିତ୍ସାଧୀନ ଥିଲେ I ମୃତ୍ୟୁ ବେଳକୁ ତାଙ୍କୁ ୭୯ ବର୍ଷ ବୟସ ହୋଇଥିଲା I ତାଙ୍କ ମୃତ୍ୟୁ କୁ ନେଇ କଂଗ୍ରେସ ନେତା ଶଶି ଥରୁର ମୁଶରଫଙ୍କୁ ଶ୍ରଦ୍ଧାଞ୍ଜଳି ଜଣାଇବା ଅବସରରେ ଟ୍ୱିଟ କରି କହିଛନ୍ତି ସେ ଶାନ୍ତିର ପ୍ରକୃତ ଶକ୍ତି ଥିଲେ ।

ଥରୁରଙ୍କ ଟ୍ୱିଟକୁ ବିରୋଧ କରି ବିଜେପି ମୁଖପାତ୍ର ଶାହାଜାଦ ପୁନାୱାଲା କଂଗ୍ରେସକୁ ଟାର୍ଗେଟ କରିଛନ୍ତି। ପୁନାୱାଲା ଥରୁର ଏବଂ କଂଗ୍ରେସକୁ ପାକ୍ ଶୁଭେଚ୍ଛୁ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ଥରୁର ପ୍ରକୃତରେ ପାକିସ୍ତାନର ହିତୈଷୀ I ପୁନାଓ୍ଵାଲା ନିଜ ଟ୍ଵିଟରେ କହିଛନ୍ତି,‘ପରଭେଜ କାରଗିଲ ଯୁଦ୍ଧର ଆର୍କିିଟେକ୍ଟ ଥିଲେ, ତାନାଶାହ ଓ ଜଘନ୍ୟ ଅପରାଧର ଅଭିଯୁକ୍ତ ଥିଲେ । ସେ ଆହୁରି କହିଥିଲେ, ଯିଏ ତାଲିବାନ ଏବଂ ଓସମା ବିନ ଲାଦେନକୁ ଭାଇ ଓ ନାୟକ କହୁଥିଲେ, ଏପରିକି ସେ ନିଜର ମୃତ ସୈନିକଙ୍କ ଶବ ଫେରସ୍ତ ନେବାକୁ ମନା କରିଥିଲେ, କଂଗ୍ରେସ ଦ୍ୱାରା ତାଙ୍କର ସ୍ୱାଗତ କରାଯାଉଛି । କଂଗ୍ରେସର ପାକିସ୍ତାନ ପ୍ରୀତି ଦେଖି ଆଶ୍ଚର୍ଯ୍ୟ ଲାଗୁଛି ।

ଏକଦା ମୁସରଫ ରାହୁଲ ଗାନ୍ଧୀଙ୍କୁ ମହତ ବ୍ୟକ୍ତିତ୍ୱ ବୋଲି କହି ପ୍ରଶଂସା କରିଥିଲେ । ସେଥିପାଇଁ ବୋଧହୁଏ ମୁସରଫଙ୍କ ପ୍ରତି କଂଗ୍ରେସର ପ୍ରେମ ଜାଗ୍ରତ ହେଲା । ୩୭୦ ରୁ ଆରମ୍ଭ କରି ସର୍ଜିକାଲ ଷ୍ଟ୍ରାଇକ ଓ ବାଲାକୋଟକୁ ନେଇ ସନ୍ଦେହ କରୁଥିବା କଂଗ୍ରେସ ମୁସରଫଙ୍କ ଜୟକାର କରୁଛି । ସୂଚନା ଯୋଗ୍ୟ ଜେନେରାଲ ପରଭେଜ ମୁସାରଫ କାଶ୍ମୀର ପ୍ରସଙ୍ଗ ସମାଧାନର ନିକଟତର ହୋଇଥିଲେ ମଧ୍ୟ ସେ ହିଁ ପରେ କାର୍ଗିଲ ଯୁଦ୍ଧର ସୂତ୍ରପାତ କରିଥିଲେ। ୧୯୯୯ରେ ନୱାଜ ସରିଫଙ୍କ ସରକାରକୁ ବିନା ରକ୍ତପାତରେ ପଦଚ୍ୟୁତ କରି ମୁସାରଫ କ୍ଷମତା ଅକ୍ତିଆର କରି ଦେଶର ରାଷ୍ଟ୍ରପତି ହୋଇଥିଲେ। ପିଏମ୍‌ଏଲ୍‌-କ୍ୟୁ ଦଳ ଗଠନରେ ସାହାଯ୍ୟ କରି ସେ ଦୀର୍ଘଦିନ କ୍ଷମତାରେ ରହିପାରିଥିଲେ। ୨୦୦୮ରେ ମହାଭିଯୋଗକୁ ଏଡ଼ାଇବା ପାଇଁ ସେ ବାଧ୍ୟହୋଇ ରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ।