ଭୁବନେଶ୍ୱର : ଓଟିଇଟି ପ୍ରଶ୍ନ ପତ୍ର ଲିକ୍ ମାମଲା । ୨ ଅଭିଯୁକ୍ତଙ୍କୁ ୨ ଦିନିଆ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ । ରିମାଣ୍ଡର ଆଜି ୨ୟ ଦିନରେ କ୍ରାଇମବ୍ରାଞ୍ଚ ଜେରାରେ ଆଜି ଗୋଟି ଗୋଟି କରି ସବୁ ସତ ଓଗାଳିଛନ୍ତି ୨ ଅଭିଯୁକ୍ତ । ଗିରଫ ଅଭିଯୁକ୍ତଙ୍କ ବିରୋଧରେ ପ୍ରମାଣ ମିଳିଥିବା ନେଇ ସୂଚନା ପ୍ରଦାନ କରିଛି କ୍ରାଇମବ୍ରାଞ୍ଚ ଟିମ୍ । ଦୁଇ ଅଭିଯୁକ୍ତ ଡାଟା ଏଣ୍ଟ୍ରି ଅପରେଟର ଜିତନ ମହାରଣା ଓ ଶିକ୍ଷକ ନେତା ବିଜୟ ମିଶ୍ରଙ୍କୁ ଦୁଇ ଦିନିଆ ରିମାଣ୍ଡରେ ନେଇ ଘନ ଘନ ଜେରା କରାଯାଇଥିଲା । ଏହି ଘଟଣାରେ ବିଜୟ ମିଶ୍ରଙ୍କ ଭାଇଙ୍କୁ ମଧ୍ୟ ଜେରା କରିବ କରିବ କ୍ରାଇମବ୍ରାଞ୍ଚ । କେମିତି ପ୍ରଶ୍ନପତ୍ର ଲିକ୍ ଘଟଣା ପ୍ରଘଟ ହେବ ନାହିଁ, ସେନେଇ ଅଭିଯୁକ୍ତମାନେ ରଚିଥିବା ମାୟାଜାଲର ପର୍ଦ୍ଦାଫାସ କରିଛି କ୍ରାଇମବ୍ରାଞ୍ଚ ।
ଆଜି ରିମାଣ୍ଡ ସମୟରେ କ୍ରାଇମ୍ବ୍ରାଞ୍ଚ ଅଧିକାରୀ ଉଭୟଙ୍କୁ ଗୁଡେଇ ତୁଡେଇ ଝାଳ ବୁହା ଜେରା କରିଥିଲେ । ଏହି ସମୟରେ ଜିତନ ମହାରଣା ପ୍ରଶ୍ନପତ୍ର ଲିକ କରିଥିବା ଘଟଣା ମାନିଥିଲେ । ଏହାସହ କ୍ରାଇମ୍ବ୍ରାଞ୍ଚ ହାତରେ ମଧ୍ୟ କିଛି ଗୁରୁତ୍ବପୂର୍ଣ୍ଣ ତଥ୍ୟ ମଧ୍ୟ ଲାଗିଥିବା ଜଣାପଡିଛି। ଜେରାବେଳେ ବୋର୍ଡ ସଭାପତି ନିହାର ରଞ୍ଜନ ମହାନ୍ତିଙ୍କ ଲାପଟପରୁ ପେନ ଡ୍ରାଇଭରେ ପ୍ରଶ୍ନପତ୍ର ଚୋରି କରିଥିଲେ ବୋଲି ମାନିଛନ୍ତି । ଏହାକୁ ସେ ଶିକ୍ଷକ ନେତା ବିଜୟ ମିଶ୍ରଙ୍କ ଭାଇଙ୍କୁ ଡ୍ରାଇଭର ମାଧ୍ୟମରେ ପଠାଇଥିଲେ । ପ୍ରଶ୍ନପତ୍ରକୁ ପ୍ରଥମେ ଡ୍ରାଇଭରଙ୍କ ସହାୟତାରେ କଟକରୁ ନୟାଗଡ ନିଆଯାଇଥିଲା । ସେଠାରେ ବିଜୟ ମିଶ୍ରଙ୍କ ଭାଇଙ୍କୁ ଏହା ଦିଆଯାଇଥିଲା । ଏଥିପାଇଁ ଡ୍ରାଇଭରଙ୍କୁ ସେ ୧୫ ଶହ ଟଙ୍କା ଦେଇଥିଲେ । ସତ ଲୁଚାଇବା ପାଇଁ ପେନଡ୍ରାଇଭ ଓ ହର୍ଡକପିକୁ ବନ୍ଦ ଏଲଭଲପ ମଧ୍ୟରେ ରଖାଯାଇଥିଲା ବୋଲି କହିଛି କ୍ରାଇମବ୍ରାଞ୍ଚ ।
ବୋର୍ଡ ସଭାପତିଙ୍କ ଲାପଟପ୍ରୁ ପ୍ରଶ୍ନପତ୍ର ଚୋରି ପାଇଁ ଅଢ଼େଇ ଲକ୍ଷ ଟଙ୍କା ନେଇଥିଲେ ଜିତେନ୍ । ଏ ଘଟଣାରେ ଆଉ କାହା କାହାର ସଂପୃକ୍ତି ରହିଛି, ମୋଟ କେତେ ଟଙ୍କାର କାରବାର ହୋଇଛି ? ଜିତନ ଓ ବିଜୟ କେଉଁ କେଉଁ ମାନଙ୍କ ସହ ସମ୍ପର୍କରେ ଥିଲେ ଏଭଳି ବିଭିନ୍ନ ପ୍ରଶ୍ନରେ ଖୋଳତାଡ କରିବ କ୍ରାଇମବ୍ରାଞ୍ଚ । ଉଭୟଙ୍କୁ ଅଲଗା ଅଲଗା ଜେରା ପରେ ଏକାଠି ବସାଇ ସାମ୍ନାସାମ୍ନି ଜେରା କରାଯିବ।
।
