କଟକ : ଓଡିଶା ହାଇକୋର୍ଟଙ୍କ ଗୁରୁତ୍ତ୍ୱପୂର୍ଣ୍ଣ ନିଷ୍ପତି I ଥଇଥାନ ଯୋଜନାରେ ଏଣିକି ବିବାହିତ ଝିଅ ମଧ୍ୟ ପାଇ ପାରିବେ ଅନୁକମ୍ପା ମୂଳକ ଚାକିରୀ I ଯଦି ସରକାରୀ ଚାକିରୀରେ ଥାଇ କୌଣସି କର୍ମଚାରୀଙ୍କ ମୃତ୍ୟୁ ଘଟେ,ତେବେ ତାଙ୍କ ପୁଅ କିମ୍ବା ଅବିବାହିତ ଝିଅଙ୍କ ବ୍ୟତୀତ ଆବଶ୍ୟକସ୍ଥଳେ ବିବାହିତ ଝିଅ ମଧ୍ୟ ଅନୁକମ୍ପାମୂଳକ ଚାକିରୀ ପାଇପାରିବେ I ବିବାହିତ ଝିଅଙ୍କ ନିଯୁକ୍ତିକୁ ନେଇ ସରକାରୀ ନିୟମରେ ଥିବା ପ୍ରତିବନ୍ଧକ ଆଇନ ଅନୁସାରେ ଗ୍ରହଣୀୟ ନୁହେଁ ବୋଲି ଗୁରୁବାର ହାଇକୋର୍ଟ ନିଷ୍ପତି ଶୁଣାଇଛନ୍ତି ।
ବିବାହିତ ହୋଇଥିବା କାରଣରୁ ଜଣେ ଝିଅକୁ ଅନୁକମ୍ପାମୂଳକ ନିଯୁକ୍ତି ଦିଆନଯିବା ଏକ ମନମୁଖି ନିଷ୍ପତ୍ତି ଏବଂ ସମ୍ବିଧାନର ଧାରା ୧୪, ୧୫ ଏବଂ ୧୬(୨)କୁ ଉଲ୍ଲଂଘନ କରୁଛି ବୋଲି ହାଇକୋର୍ଟ କହିଛନ୍ତି। ଏନେଇ ବିବାହିତ ଝିଅଙ୍କ ନିଯୁକ୍ତିକୁ ବିଚାରକୁ ନନେବା ନୀତିକୁ
ହାଇକୋର୍ଟ ରଦ୍ଦ କରିଛନ୍ତି।
ସୂଚନାନୁସାରେ ବାସନ୍ତୀ ନାୟକଙ୍କ ପକ୍ଷରୁ ଆଗତ ମାମଲାରେ ବିଚାରପତି ଜଷ୍ଟିସ୍ ଏସ୍.କେ ପାଣିଗ୍ରାହୀ ଏହି ରାୟ ଦେଇଛନ୍ତି । ବାସନ୍ତୀ ନାୟକଙ୍କ ବାପା ଭଦ୍ରକ ଜିଲ୍ଲାର ଏକ ପ୍ରାଥମିକ ବିଦ୍ୟାଳୟରେ ଶିକ୍ଷକ ଥିଲେ । ୨୦୦୧ ଫେବ୍ରୁଆରୀ ୨୩ରେ ତାଙ୍କର ମୃତ୍ୟୁ ହୋଇଥିଲା । ତାଙ୍କର ପତ୍ନୀ ଓ ଦୁଇ ଝିଅ ଅସହାୟ ହୋଇଯାଇଥିଲେ । ଆବେଦନକାରିଣୀ ବାସନ୍ତୀ ମୃତ ଶିକ୍ଷକଙ୍କ ବଡ଼ ଝିଅ ହୋଇଥିବାରୁ ଥଇଥାନ ଯୋଜନାରେ ତାଙ୍କୁ ତୃତୀୟ ଶ୍ରେଣୀ କର୍ମଚାରୀ ଭାବେ ନିଯୁକ୍ତି ଦେବାକୁ ସେ ଭଦ୍ରକ ଜିଲ୍ଲା ଶିକ୍ଷାଧିକାରୀଙ୍କୁ ଆବେଦନ କରିଥିଲେ । ମାତ୍ର ଆବେଦନକାରିଣୀ ବିବାହ କରିସାରିଥିବାରୁ ତାଙ୍କ ଆବେଦନକୁ ଜିଲ୍ଲା ଶିକ୍ଷାଧିକାରୀ ନାକଚ କରିଥିଲେ । ଏହାକୁ ଚ୍ୟାଲେଞ୍ଜ କରି ଆବେଦନକାରିଣୀ ଶ୍ରୀମତୀ ନାୟକ ପ୍ରଥମେ ସ୍ୟାଟ୍ଙ୍କ ଦ୍ୱାରସ୍ଥ ହୋଇଥିଲେ ।
ସ୍ୟାଟ୍ ଉକ୍ତ ମାମଲାର ଶୁଣାଣି କରି ଆବେଦନକାରିଣୀଙ୍କ ସ୍ମାରକପତ୍ରକୁ ବିଚାରକୁ ନେଇ ପଦକ୍ଷେପ ନେବାକୁ ଭଦ୍ରକ ଜିଲ୍ଲା ଶିକ୍ଷାଧିକାରୀଙ୍କୁ ନିର୍ଦ୍ଦେଶ ଦେଇଥିଲେ । ମାତ୍ର ୨୦୦୮ ମସିହାରେ ଜିଲ୍ଲା ଶିକ୍ଷାଧିକାରୀ ଆବେଦନକାରିଣୀଙ୍କ ଆବେଦନକୁ ପୁଣି ଥରେ ଖାରଜ କରିଥିଲେ । ଏହା ବିରୋଧରେ ଆବେଦନକାରିଣୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ହାଇକୋର୍ଟ ଶିକ୍ଷାଧିକାରୀଙ୍କ ଆଦେଶକୁ ରଦ୍ଦ କରିବା ସହିତ ଆବେଦନକାରିଣୀଙ୍କ ଆବେଦନ ଉପରେ ସାନି ବିଚାର କରି ଆଇନ ମୁତାବକ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି । ଏଥିସହ ଥଇଥାନ ଯୋଜନାରେ ଆବେଦନକାରୀଙ୍କୁ ଅନୁକମ୍ପାମୂଳକ ନିଯୁକ୍ତି ପ୍ରଦାନ ପ୍ରସଙ୍ଗରେ ପଦକ୍ଷେପ ଗ୍ରହଣ କରିବାକୁ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।
Comments are closed.