ଭୁବନେଶ୍ୱର : ବିମାନ ବନ୍ଦର ନିକଟରେ ରହିଥିବା ଘର ଓ ଗଛର ଉଚ୍ଚତା କମିବ । ଏନେଇ କେନ୍ଦ୍ର ସରକାରଙ୍କ ତରଫରୁ ଏକ ବିଜ୍ଞପ୍ତି ଜାରି କରାଯାଇଛି । ଏଥିରେ କୁହାଯାଇଛି ଯେ, ବେସାମରିକ ବିମାନ ଚଳାଚଳ କର୍ତ୍ତୃପକ୍ଷଙ୍କ ଠାରୁ ନୋଟିସ୍ ପାଇବାର ୬୦ ଦିନ ମଧ୍ୟରେ ମାଲିକମାନଙ୍କୁ ଘରର ଉଚ୍ଚତା କମ କରିବାକୁ ହେବ । ଏଥି ସହ ଯେଉଁ ଗଛ ବିମାନ ଉଡାଣରେ ଅବରୋଧ କରୁଥିବ ତାକୁ କାଟିବାକୁ କିମ୍ବା ଉଚ୍ଚତା କମ କରିବାକୁ ନିର୍ଦ୍ଦେଶ ରହିଛି । ଅହମ୍ମଦାବାଦ ବିମାନ ଦୁର୍ଘଟଣା ପରେ କେନ୍ଦ୍ର ସରକାରଙ୍କ ପକ୍ଷରୁ ଏନେଇ ବିଜ୍ଞପ୍ତି ପ୍ରକାଶ ପାଇଛି ।
ତେବେ କେନ୍ଦ୍ର ସରକାରଙ୍କ ବିମାନ(କୋଠା ଓ ଗଛ ଇତ୍ୟାଦିରୁ ସୃଷ୍ଟି ହେଉଥିବା ଅବରୋଧ ହଟାଇବା) ନିୟମ ୨୦୨୫ ଅନୁଯାୟୀ ବିଜ୍ଞପ୍ତି ଜାରି ହୋଇଛି । ଏହି ନିୟମ ଅନୁଯାୟୀ, ଘରର ମାଲିକ ମାନେ କ୍ଷତିପୂରଣ ପାଇଁ ଆବେଦନ କରିପାରିବେ । ଯଦି କୌଣସି ମାମଲାରେ ଘର ମାଲିକ ନିର୍ଧାରିତ ସମୟରେ ଅବରୋଧ କରୁଥିବା ଘରକୁ ଭାଙ୍ଗିବା କିମ୍ବା ଗଛର ଉଚ୍ଚତା କମ କରିବାକୁ ବିଫଳ ହୁଅନ୍ତି, ତେବେ ସେ ନେଇ ଏରୋଡ୍ରମ ଅଧିକାରୀ ଜିଲ୍ଲାପାଳଙ୍କୁ ଜଣାଇବେ । ଜିଲ୍ଲାପାଳଙ୍କ ହସ୍ତକ୍ଷେପରେ ଘର ଭଙ୍ଗାଯିବ ବା ଗଛର ଉଚ୍ଚତା କମାଯିବ ।
ସୂଚନାନୁସାରେ,ଗତ ୧୨ ଜୁନରେ ଗୁଜରାଟ ଅହମ୍ମଦାବାଦରେ ବିମାନ ଦୁର୍ଘଟଣାରେ ୨୭୧ ଜଣ ପ୍ରାଣ ହରାଇଥିଲେ । ଇଣ୍ଡିଆନ ଏୟାର ଲାଇନ ବିମାନଟିରେ ଯାନ୍ତ୍ରିକ ତ୍ରୁଟି ଦେଖାଦେବା ପରେ ବିମାନ ବନ୍ଦର ନିକଟରେ ଥିବା ଏକ କୋଠାରେ ପିଟି ହୋଇ ନିଆଁ ଲାଗି ଯାଇଥିଲା । ଏହି ବିମାନ ଦୁର୍ଘଟଣା ହେବା ସମୟରେ ଏକ ମେଡିକାଲ ହଷ୍ଟେଲରେ ମାଡ ହୋଇଥିଲା । ଯେଉଁଥିରେ ଅନେକ ଡାକ୍ତରୀ ଛାତ୍ରଙ୍କ ମୃତ୍ୟୁ ଘଟିଥିଲା । ଏଥିରେ ୨୪୧ ଜଣ ବିମାନ ଯାତ୍ରୀଙ୍କ ସହ ସ୍ଥାନୀୟ ଲୋକଙ୍କର ଶୋଚନୀୟ ମୃତ୍ୟୁ ଘଟିଥିଲା ଇ ଏହି ଘଟଣା ପରେ ସାଧାରଣ ସୁରକ୍ଷା ଦୃଷ୍ଟିରୁ ବେସାମରିକ ବିମାନ ଚଳାଚଳ ମନ୍ତ୍ରାଳୟ ସଜାଗ ହୋଇଛି ।
Comments are closed.