ଗେଲଙ୍ଗ୍ : ଅଷ୍ଟ୍ରେଲିଆରେ ଆଇସିସି ପୁରୁଷ ଟି-୨୦ ବିଶ୍ୱକପ୍ ବିଗୁଲ ବାଜିଛି । ଉଦ୍ଘାଟନୀ ମ୍ୟାଚରେ ବଡ଼ ବିପର୍ଯ୍ୟୟ ଘଟାଇଛି ନାମ୍ବିଆ । ବିଶ୍ୱକପ୍ ବିଜେତା ଶ୍ରୀଲଙ୍କା ଦଳକୁ ୫୫ ରନ୍ ବ୍ୟବଧାନରେ ପରାସ୍ତ କରି ଗ୍ରୁପ୍ ଏ’ର ପ୍ରଥମ ମ୍ୟାଚରେ ନାମ୍ବିଆ ବଡ଼ ବିଜୟ ହାସଲ କରିଛି । ଭାରତ ଓ ପାକିସ୍ତାନ ଭଳି ଶକ୍ତିଶାଳୀ ଦଳକୁ ପରାସ୍ତ କରିଥିବା ଶ୍ରୀଲଙ୍କା ଦଳ ନାମ୍ବିଆ ନିକଟରୁ ପରାଜିତ ହେବା ଘଟଣା ବିଶ୍ୱକପ୍ରେ ହଟଚମଟ ସୃଷ୍ଟି କରିଛି । ପ୍ରଥମେ ବ୍ୟାଟିଂ କରି ନାମ୍ବିଆ ୨୦ ଓଭରରେ ୧୬୩/୭ ରନ୍ କରିଥିଲା । ଏହାର ଜବାବରେ ଶ୍ରୀଲଙ୍କା ୧୯ ଓଭରରେ ୧୦୮ ରନ୍ କରି ଅଲ୍ଆଉଟ୍ ହୋଇଥିଲା । ବିଜେତା ନାମ୍ବିଆ ଦଳର ଜାନ୍ ଫ୍ରାଲିଙ୍କ୍ ୨୮ ବଲରୁ ୪୪ ରନ୍ ଓ ୨ ୱିକେଟ୍ ଅକ୍ତିଆର କରି ପ୍ଲେୟାର ଅଫ୍ ଦ ମ୍ୟାଚ ବିବେଚିତ ହୋଇଥିଲେ ।
ଭିକେଫାରିଆରେ ଖେଳାଯାଇଥିବା ଏହି ମ୍ୟାଚରେ ଶ୍ରୀଲଙ୍କା ଟସ୍ ଜିତି ନାମ୍ବିଆକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା । ନାମ୍ବିଆର ଆରମ୍ଭ ଖରାପ ଥିଲେ ମଧ୍ୟ ମଧ୍ୟମକ୍ରମରେ ଜମାଣିଆ ବ୍ୟାଟିଂ ଯୋଗୁଁ ଦଳ ସମ୍ମାନଜନକ ସ୍ଥିତିରେ ପହଞ୍ଚିବାକୁ ସମର୍ଥ ହୋଇଥିଲା । ଓପନର ମିଚେଲ ଭାନ୍ ଲିନଜେନ୍ ୩ ଓ ଡିଭାନ ଲା କକ ୯ ରନ୍ କରି ପାଭିଲିୟନ୍ ଫେରିଯାଇଥିଲେ । କି;ୁ ଜାନ୍ ଲିକୋନ୍ ୨୦, ଷ୍ଟିଫାନ୍ ବାର୍ଡ ୨୬, ଗେରାଡ ଏରାସମସ୍ ୨୦, ଜାନ୍ ଫ୍ରାଏଲିଙ୍କ୍ ୨୮ ବଲ୍ରୁ ୪୪ ଓ ଜେଜେ ସ୍ମିଥ୍ ୧୬ ବଲ୍ରୁ ୩୧ ରନ କରିବାରୁ ନାମ୍ବିଆ ୨୦ ଓଭରରେ ୧୬୩/୭ ରନ୍ କରିବାକୁ ସମର୍ଥ ହୋଇଥିଲା । ବୋଲିଂରେ ଶ୍ରୀଲଙ୍କାର ପ୍ରମୋଦ ମଧୁସାନ ୨ଟି, ମହେଶ ଥେକସାନା, ଦୁଷ୍ମନ୍ଥ ଚାମିରା, ଚାମିକା କରୁଣାରତ୍ନେ ଓ ୱାନିନ୍ଦୁ ହସରଙ୍ଗ ଡି ସିଲଭା ଗୋଟିଏ କରି ୱିକେଟ୍ ସଫଳତା ହାସଲ କରିଥିଲେ ।
୧୬୪ ରନ୍ର ବିଜୟଲକ୍ଷ୍ୟ ନେଇ ଶ୍ରୀଲଙ୍କା ଅଭିଯାନ ଆରମ୍ଭ କରିଥିଲା । ମ୍ୟାଚ ପ୍ରତିଦ୍ୱନ୍ଦିତା ମୂଳକ ହେବ ବୋଲି ଆଶା କରାଯାଇଥିଲା । କି;ୁ ନାମ୍ବିଆର ଶାଣିତ ବୋଲିଂ ଆଗରେ ଶ୍ରୀଲଙ୍କା ବ୍ୟାଟର ବେଶି ସମୟ ତିଷ୍ଠି ପାରିନଥିଲେ । କେବଳ ୪ ଜଣ ଦୁଇ ଅଙ୍କ ସ୍କୋର କରିଥିଲେ । ଓପନର ପାଥୁମ ନିଶାଙ୍କ ୯, କୁଶଲ ମେଣ୍ଡିସ ୬, ଧନଞ୍ଜୟ ଡି ସିଲଭା ୧୨, ଧନୁକା ରାଜପାଖ୍ ୨୦, ଅଧିନାୟକ ଦସୁନ ସନକା ୨୯ ଓ ମହେଶ ଥେକସାନା ଅପରାଜିତ ୧୧ ରନ କରିବାରୁ ଶ୍ରୀଲଙ୍କା ୧୯ ଓଭରରେ ୧୦୮ ରନ୍ରେ ସୀମିତ ରହିଥିଲା । ବୋଲିଂରେ ନାମ୍ବିଆର ଡେଭିଡ ୱାଇଜ୍, ବର୍ଣ୍ଣାଡ ସ୍କଟେଜ୍, ବେନ୍ ସିକୋନଗୋ ଏବଂ ଜାନ ଫ୍ରାଏଲିଙ୍କ ଦୁଇଟି କରି ଏବଂ ଜେଜେ ସ୍ମିଥ୍ ଗୋଟିଏ ୱିକେଟ୍ ସଫଳତା ହାସଲ କରିଥିଲେ । ବିଜୟ ସହ ନାମ୍ବିଆ ଦୁଇ ପଏଣ୍ଟ ହାସଲ କରି ଗ୍ରୁପ୍ ଏ’ ଟେବୁଲର ଶୀର୍ଷରେ ରହିଛି ।
Comments are closed.