ଭୁବନେଶ୍ୱର ନଭମ୍ବେର ୨୬: ‘ମୁଁ ସୁରକ୍ଷିତ ନୁହେଁ । ମୋତେ ସୁରକ୍ଷା ଦରକାର’ ଏମିତି କହିଛନ୍ତି ଲୋକସଭା ସାଂସଦ ଅପରାଜିତା ଷଡ଼ଙ୍ଗୀ । ଗୁରୁବାର ଦିନ ତାଙ୍କ ଉପରେ ହୋଇଥିବା ରାଜନୈତିକ ହିଂସା ପରେ ସେ ଆଜି ଏକ ସାମ୍ବାଦିକ ସମ୍ମିଳନୀ ଡ଼କାଇ ଏହିପରି ମନ୍ତବ୍ୟ ଦେଇଛନ୍ତି । ଏହା ସହିତ ସେ ଆହୁରୀ କହିଛନ୍ତି ଯେ, ରାଜ୍ୟର ମୁଖିଆ ଭାବେ ମୁଖ୍ୟମନ୍ତ୍ରୀ ଏହିଭଳି ଘଟଣା ଲାଗି ଦାୟୀ । ପଶ୍ଚିମବଙ୍ଗର ଟିଏମସି ପଥରେ ରାଜ୍ୟ ସରକାର ଗତି କରୁଛନ୍ତି । ଟିଏମସି ଯେଉଁଭଳି ପଶ୍ଚିମବଙ୍ଗରେ ହିଂସା ଭିଆଉଛି, ସେଭଳି ଓଡ଼ିଶାରେ ହିଂସା ବଢିବାରେ ଲାଗିଛି । ମୋତେ ଯେତେ ବିରୋଧ କଲେ ବି ମୁଁ ରାଜ୍ୟସାରା ବୁଲି ଲୋକଙ୍କ ପାଇଁ କାମ କରୁଥିବି । ବିଜୁଜନତା ଦଳ ମହିଳାଙ୍କୁ ନିର୍ଯାତନା ଦେଉଛି ।
ସାଂସଦ ଅପରଜିତା କହିଛନ୍ତି, ସର୍ବଭାରତୀୟ ସ୍ତରରେ ମହିଳାମାନଙ୍କ ଉପରେ ହେଉଥିବା ଅପରାଧରେ ଓଡିଶା ଦ୍ୱିତୀୟ ଅଛି । ବିଜେଡି ଏହାକୁ ପ୍ରଥମ କରିବାକୁ ଚାହୁଁଛି । ମୋତେ ଟାର୍ଗେଟ କରିଥିବା ଲୋକଙ୍କ ବିରୋଧରେ ୨୪ ଘଣ୍ଟା ଭିତରେ କାର୍ଯ୍ୟାନୁଷ୍ଠାନ ହେବା ଦରକାର । କାର୍ଯ୍ୟାନୁଷ୍ଠାନ ନହେଲେ ଆନ୍ଦୋଳନ ତୀବ୍ର ହେବ ବୋଲି ସେ ଚେତାଇ ଦେଇଛନ୍ତି ।
ସୂଚନା ଥାଉଯେ, ଗତକାଲି ଆଚାର୍ଯ୍ୟ ବିହାରରେ ଥିବା ଏକ କାର୍ଯ୍ୟକ୍ରମରେ ଯୋଗ ଦେବାକୁ ସାଂସଦ ଅପରଜିତା ଯାଇଥିଲେ । ବିକାଶ ପରିଷଦ ପକ୍ଷରୁ ତାଙ୍କୁ ନିମନ୍ତ୍ରଣ କରାଯାଇଥିଲା । ଏହି ସମୟରେ ତାଙ୍କ ଉପରକୁ ଅଣ୍ଡା, ଢ଼େଲା ଓ ଟମାଟୋ ମାଡ଼ ହୋଇଥିବା ଅଭିଯୋଗ ହୋଇଥିଲା । ଏହିପରିକି ଢ଼େଲା ମାଡ଼ରେ ସେଠାରେ ସୁରକ୍ଷା ପାଇଁ ଉପସ୍ଥିତ ଥିବା ୪ଜଣ ପୋଲିସ ଅଧିକାରୀ ଆହତ ହୋଇଥିଲେ । ସୋମାନଙ୍କୁ ଚିକିତ୍ସା ପାଇଁ ଡାକ୍ତରଖାନା ପଠାଯାଇଥିଲା । ପ୍ରାୟ ୩ ଘଣ୍ଟା ଧରି ସେଠାରେ ପ୍ରବଳ ଉତ୍ତୋଜନା ଲାଗିରହିଥିଲା । ପରେ ଡିସିପି ଘଟଣାସ୍ଥଳରେ ପହଞ୍ଚିବା ପରେ ସାଂସଦଙ୍କୁ ସୁରକ୍ଷା ଭାବେ ବାହାରକୁ ବାହାର କରାଯାଇଥିଲା ।
Comments are closed.