କେନ୍ଦ୍ରାପଡା : ପଟ୍ଟାମୁଣ୍ଡାଇ ଛାତ୍ରୀ ମୃତ୍ୟୁ ଘଟଣାରେ ନୂଆ ମୋଡ଼ । ଚେନ୍ନାଇ ରୁ ଗିରଫ ହୋଇଥିବା ଛାତ୍ରୀଙ୍କ ପୁରୁଷ ବନ୍ଧୁଙ୍କ ମା’ଙ୍କର ଚାଞ୍ଚଲ୍ୟକର ବୟାନ । ପଟ୍ଟାମୁଣ୍ଡାଇ କାଠିଆପଡା ଗାଁର ଛାତ୍ରୀ ଏବଂ ତେରୋହୀ ଗାଁର ଜଣେ ଯୁବକଙ୍କ ସହିତ ଥିଲା ପ୍ରେମ ସମ୍ପର୍କ । ପୁଅ ଘର ଲୋକେ ଏହି ସମ୍ପର୍କକୁ ସ୍ୱୀକାର କରିଥିବାବେଳେ ଉଭୟଙ୍କର ବିବାହ ମଧ୍ୟ ହୋଇଥାନ୍ତା । ତେବେ ଝିଅ ଘର ଲୋକେ ଏହି ସମ୍ପର୍କକୁ ସ୍ୱୀକାର କରୁନଥିଲେ । ଏନେଇ ଗିରଫ ହୋଇଥିବା ଯୁବକଙ୍କ ବାପା ଓ ମା’ ପ୍ରତିକ୍ରିୟା ରଖିଛନ୍ତି । ଏପରିକି ପ୍ରେମ ସମ୍ପର୍କକୁ ନେଇ ଝିଅର ବାପା ତାଙ୍କୁ ମଝିରେ ମଝିରେ ପ୍ରବଳ ମାଡ଼ ମାରୁଥିବା କଥା ମଧ୍ୟ କହିଛନ୍ତି । କାରଣ ପୁଅ ଘର ଲୋକ ଗରିବ ଶ୍ରେଣୀର ଥିଲେ । କିନ୍ତୁ ଝିଅର ବାପା ୬ ମାସ ପୂର୍ବରୁ ପୁଅ ନାଁରେ ଥାନାରେ କରିଥିବା ଅଭିଯୋଗ ବିଷୟରେ କିଛି ଜାଣି ନାହାନ୍ତି ବୋଲି କହିଛନ୍ତି । ସେ କହିଛନ୍ତି ପୁଅ ନାଁରେ ଥାନାରେ ଅଭିଯୋଗ କରିବା ବିଷୟରେ ଝିଅର ବାପା ଆମକୁ କିଛି ଜଣାଇ ନାହାନ୍ତି । ଘଟଣା ଘଟିବା ପରେ ଥାନାକୁ ବି ଝିଅ ପରିବାର ଯାଇଛନ୍ତି । ହେଲେ ପ୍ରେମ ସମ୍ପର୍କରୁ ଝିଅ ଆତ୍ମହତ୍ୟା କରିଥିବା କଥାକୁ ଖଣ୍ଡନ କରିଛନ୍ତି ଏହି ଘଟଣାରେ ଝିଅର ପରିବାର ଲୋକ ହିଁ ଦାୟୀ । ଜାଣି ଶୁଣି ଆମ ପୁଅକୁ ଫସାଯାଇଥିବା କହିଛନ୍ତି ପୁଅର ମାଆ ।
ଝିଅ ଆତ୍ମାହୁତି ଘଟଣାରେ ପୁଅର ମା’ କହିଛନ୍ତି ଝିଅକୁ ତାଙ୍କ ବାପା ହିଁ ହତ୍ୟା କରି ଆତ୍ମହତ୍ୟାର ରୂପ ଦେଉଛନ୍ତି । କାରଣ ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ଯୁବତୀଙ୍କ ମୃତଦେହ ଘରୁ ଉଦ୍ଧାର କରାଯିବା ବେଳେ ତାଙ୍କର ଦୁଇ ହାତ ଓ ଅଣ୍ଟା ବନ୍ଧା ହୋଇଥିବାର ଦେଖିବାକୁ ମିଳିଥିଲା । ଜଣେ ପଡୋଶୀଙ୍କ କହିବା ଅନୁଯାୟୀ, ଶିଡିଘର ଚଟାଣ ପାଖରୁ ଯୁବତୀଙ୍କର ମୃତଦେହ ଉଦ୍ଧାର କରାଯାଇଥିଲା । ଯେଉଁଠି ନିଆଁରେ ପୋଡି ହୋଇ ଆତ୍ମହତ୍ୟା କରିବାର କିଛି ବି ଚିହ୍ନବର୍ଣ୍ଣ ଦେଖିବାକୁ ମିଳିନଥିଲା । ସବୁଠାରୁ ବଡ କଥା ହେଉଛି ତାଙ୍କ ଅଣ୍ଟା ଓ ହାତରେ ଜିଆଇ ତାର ଗୁଡାଯାଇଥିବା ବେଳେ ଶିଡିଘର ଗ୍ରିଲ ସହ ତାଙ୍କ ଅଣ୍ଟାକୁ ଜୋର କରି ବାନ୍ଧି ଦିଆଯାଇଥିଲା । ଯେମିତି ତାଙ୍କ ମୃତଦେହ ତଳକୁ ଖସି ନପଡିବ । ଖାଲି ସେତିକି ନୁହେଁ ଶିଡିଘର ତାଲା ପଡିଥିବା ବେଳେ ଶିଡିଘର ଚାବି ଶିଡି ତଳେ ପଡିଥିବା ଦେଖିବାକୁ ମିଳିଥିଲା । ଏପରିକି କବାଟ ଭାଙ୍ଗି ଘର ଭିତରକୁ ପଶିଥିଲେ ବୋଲି ଝିଅର ବାପା କହିଥିଲେ ମଧ୍ୟ କବାଟ ଭାଙ୍ଗିଥିବାର କୌଣସି ଚିହ୍ନ ଦେଖାଯାଇ ନଥିଲା ।
ତେଣୁ ସୁଚିତିନ୍ତ ଭାବରେ ଝିଅକୁ ମାରି ସାରି ଝିଅର ବାପା ଥାନାକୁ ଯାଇଛନ୍ତି ଏବଂ ଗରିବ ଲୋକ ବୋଲି ମୋ ପୁଅକୁ ଫସାଇଛନ୍ତି । ଦୋଷ ନଥାଇ ମଧ୍ୟ ମୋ ପୁଅକୁ ଗିରଫ ହୋଇଛି ବୋଲି ଅଭିଯୋଗ କରିଛନ୍ତି ପୁଅର ମା’ ।
