ଅଖା ଭିତରୁ ନାବାଳକର ମୃତ ଦେହ ଉଦ୍ଧାର ଘଟଣା,ଅଭିଯୁକ୍ତ ଗିରଫ

କେନ୍ଦୁଝର : ଅଖା ଭିତରୁ ନାବାଳକର ମୃତଦେହ ଉଦ୍ଧାର ଘଟଣାରେ ଅଭିଯୁକ୍ତ ଗିରଫ । ଅଭିଯୁକ୍ତ ଜଣକ ହେଲେ ଗଙ୍ଗାରାମ ମୁଣ୍ଡା । ଜମିଜମା ବିବାଦରୁ ପଡୋଶୀକୁ ଫସାଇବା ପାଇଁ ଷଡଯନ୍ତ୍ର ରଚିଥିଲା ଗଙ୍ଗାରମ ଆଉ ଏଥିରେ ବଳି ପଡିଥିଲା ବାପ ଛେଉଣ୍ଡ ପବନ ମୁଣ୍ଡା ।

ଗତକାଲି ଚମ୍ପୁଆ ଥାନା ପର୍ଶଳା ପଞ୍ଚାୟତ ଗୋପୀନାଥପୁର ଗାଁର ୯ ବର୍ଷର ନାବାଳକ ପବନ ମୁଣ୍ଡାଙ୍କର ମୃତଦେହ ପଡୋଶୀ ଗୌରାଙ୍ଗ ପାତ୍ରଙ୍କ ଘର ଆଗରେ ଏକ ଅଖା ଭିତରୁ ଉଦ୍ଧାର କରିଥିଲା ଚମ୍ପୁଆ ପୋଲିସ । ଏହି ଘଟଣାରେ ଅଭିଯୁକ୍ତ ଗଙ୍ଗାରାମ ମୁଣ୍ଡାଙ୍କ ସହିତ ଗୌରାଙ୍ଗ ପାତ୍ରଙ୍କ ଜମିଜମା ବିବାଦ ଲାଗି ରହିଥିଲା । ଗୌରାଙ୍ଗ ପାତ୍ରଙ୍କୁ ଫସାଇବା ପାଇଁ ଷଡଯନ୍ତ୍ର ରଚିଥିଲା ଗଙ୍ଗରାମ ।

ସୋମବାର ସନ୍ଧ୍ୟାରୁ ପବନା ମୁଣ୍ଡାକୁ ଅପହରଣ କରି ନେଇଥିଲା ଗଙ୍ଗାରମ । ଏହାପରେ ତାକୁ ଏକ ରଡ଼ରେ ପିଟି ହତ୍ୟା କରିବା ପରେ ରାତି ଅଧରେ ଏକ ଅଖାରେ ଭର୍ତ୍ତି କରି ପଡୋଶୀ ଗୌରାଙ୍ଗ ପାତ୍ରଙ୍କ ଘର ସାମ୍ନାରେ ଫୋପାଡ଼ି ଦେଇଥିଲା । ପରିବାର ଲୋକେ ଏଣେ ତେଣେ ଖୋଜାଖୋଜି ପରେ ବି ପବନାକୁ ପାଇ ନ ଥିଲେ । ଏନେଇ ଚମ୍ପୁଆ ଥାନାକୁ ଖବର ଦିଆଯିବା ପରେ ପୋଲିସ୍ ପହଞ୍ଚି ତଦନ୍ତ ଆରମ୍ଭ କରିଥିଲା । ଭୋର ସମୟରେ ଗୌରାଙ୍ଗ ପାତ୍ର ଘର ସାମ୍ନାରୁ ପଵନ ର ମୃତ ଦେହ ଉଦ୍ଧାର ହୋଇଥିଲା ।