ଥିରୁବନ୍ତପୁରମ: କେରଳର ଥିରୁବନ୍ତପୁରମରେ ଘଟିଛି ବୀଭତ୍ସ ହତ୍ୟାକାଣ୍ଡ । ପ୍ରେମିକା ସହ ନିଜ ପରିବାରର ୫ଜଣଙ୍କୁ ନିର୍ମମ ଭାବରେ ହତ୍ୟା କଲା ୨୩ ବର୍ଷୀୟ ଯୁବକ ଆଫାନ । ସୋମବାର ସନ୍ଧ୍ୟାରେ କିଛି ଘଣ୍ଟା ବ୍ୟବଧାନରେ ୩ ଟି ଭିନ୍ନ ଭିନ୍ନ ସ୍ଥାନରେ ପରିବାର ଲୋକଙ୍କୁ ହାମର ସହ ଚାପଡ଼ରେ ଜଘନ୍ୟ ଭାବରେ ହାଣି ହତ୍ୟା କରିବା ପରେ ପୋଲିସ ଷ୍ଟେସନରେ ଆତ୍ମସମର୍ପଣ କରିଛି ଆଫାନ । ମୃତକଙ୍କ ମଧ୍ୟରେ ଆଫାନର ୧୩ ବର୍ଷୀୟ ଭାଇ ଆହାସନ, ଜେଜେମା ସଲମା ବିଭି, କାକା ଲତିଫ, ମାଉସୀ ଶାହିହା ଏବଂ ତାଙ୍କ ପ୍ରେମିକା ଫରଶାନାଙ୍କ ମୃତ୍ୟୁ ଘଟିଛି । ବ୍ୟବସାୟରେ କ୍ଷତି ଏବଂ ଅତ୍ୟଧିକ ଋଣ ଚାପ ଯୋଗୁଁ ଘଟିଥିଲା ଏହି ଲୋମହର୍ଷଣକାରୀ ହତ୍ୟାକାଣ୍ଡ । ଅଭିଯୁକ୍ତ ପୋଲିସ ଷ୍ଟେସନରେ ସ୍ୱୀକାର କରିବା ପରେ ଘଟଣା ସାମ୍ନାକୁ ଆସିଥିଲା ।
ସୂଚନାନୁସାରେ, କେରଳର ବେନଜାରାମୁଡୁରୁ ଏହି ଛାତିଥରା ହତ୍ୟାକାଣ୍ଡ ସାମ୍ନାକୁ ଆସିଛି । ଅଭିଯୁକ୍ତ ଅଫାନ୍ ୫ଜଣଙ୍କୁ ମାରିବା ପରେ ନିଜ ମାଆକୁ କୁରାଢ଼ୀ ଏବଂ ହାମରରେ ଆକ୍ରମଣ କରିଥିଲା । ଏଥିରେ ସେ ଗୁରୁତର ଭାବେ ଆହତ ହୋଇଥିଲେ । ତୁରନ୍ତ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା, ଏବେ ତାଙ୍କ ସ୍ବାସ୍ଥ୍ୟାବସ୍ଥା ଗମ୍ଭୀର ରହିଛି । ସେ ଜଣେ କ୍ୟାନସର ଆକ୍ରାନ୍ତ ବୋଲି ଜଣାପଡିଛି ।
ପୋଲିସ ଅନୁଯାୟୀ, ଅଭିଯୁକ୍ତ ଆଫାନ ଗଲ୍ଫ ଦେଶ ଗୁଡିକରେ ବ୍ୟବସାୟରେ ବ୍ୟାପକ କ୍ଷତି ହେବାରୁ ମୁଣ୍ଡରେ ଋଣ ଭାର ବଢି ଚାଲିଥିଲା । ଏହି ସମୟରେ ସେ କାହାରି ଠାରୁ ସାହାଯ୍ୟ ନପାଇବାରୁ ଋଣ ସୁଝି ପାରୁନଥିଲା । ପରିବାର ଲୋକ ମଧ୍ୟ ଋଣ ସୁଝିବାକୁ ମନା କରିବାରୁ ମାନସିକ ଭାରସାମ୍ୟ ହରାଇ ନୃଶଂସ ଭାବରେ ସୋମବାର ସନ୍ଧ୍ୟାରେ ପ୍ରେମିକା ସମେତ ନିଜ ପରିବାରର ୫ଜଣଙ୍କୁ ଅତି ନିର୍ମମ ଭାବେ ହତ୍ୟା କରିଥିଲା । ଅଭିଯୁକ୍ତ ଥାନାରେ ହତ୍ୟାକାଣ୍ଡକୁ ନେଇ ସ୍ବିକାର କରିଥିଲେ ମଧ୍ୟ ପୋଲିସ ମାମଲାକୁ ଗମ୍ଭୀରତାର ସହିତ ନେଇ ତଦନ୍ତ କରୁଛି । ଅଭିଯୁକ୍ତ ଅଫାନର ମୋବାଇଲ ଜବତ କରିବା ସହ ବ୍ୟବସାୟ ସମ୍ପର୍କିତ ସମସ୍ତ ତଥ୍ୟ ହାସଲ କରୁଛି ପୋଲିସ ।
Comments are closed.