ବିହାର ବିଷାକ୍ତ ମଦ ମୃତ୍ୟୁ ଘଟଣାରେ ମୁଖ୍ୟ ଅଭିଯୁକ୍ତ ଗିରଫ

ନୂଆଦିଲ୍ଲୀ : ବିହାର ଛପରା ଜିଲ୍ଲାରେ ହୋଇଥିବା ବିଷାକ୍ତ ମଦମୃତ୍ୟୁ ମାମଲାର ମାଷ୍ଟର ମାଇଣ୍ଡ ଦିଲ୍ଲୀରୁ ଗିରଫ । ଦିଲ୍ଲୀ ପୋଲିସର କ୍ରାଇମ ବ୍ରାଞ୍ଚ ହାତରେ ଧରା ପଡ଼ିଛି ମାଷ୍ଟରମାଇଣ୍ଡ ରାମ ବାବୁ । ବହୁ ଦିନରୁ ପୋଲିସ ତାକୁ ଖୋଜୁଥିବା ବେଳେ ମଦ ମୃତ୍ୟୁ ଖବର ଶୁଣି ସେ ବିହାରରୁ ପଳେଇ ଯାଇ ଦିଲ୍ଲୀରେ ଲୁଚିକି ରହିଥିଲା । ସେ ଦିଲ୍ଲୀର ଦ୍ୱାରକା ଅଂଚଳରେ ଲୁଚିଥିବା କଥା ଅପରାଧ ଶାଖାର ଇନସ୍ପେକ୍ଟର ସଞ୍ଜୟ କୁମାରଙ୍କ ଟିମକୁ ସୂଚନା ମିଳିବI ପରେ ତାଙ୍କୁ ଗିରଫ କରାଯାଇଥିଲା I ଏହି ଘଟଣାରେ ଆଉ କିଏ କିଏ ସମ୍ପୃକ୍ତ ଅଛନ୍ତି ଦିଲ୍ଲୀ କ୍ରାଇମବ୍ରାଞ୍ଚ ତଦନ୍ତ ଚଳାଇଛି I

ସୂଚନାନୁସାରେ ବିହାର ଛପରାରେ ବିଷାକ୍ତ ମଦପିଇ ୭୭ ଜଣଙ୍କ ମୃତ୍ୟୁ ହୋଇଥିଲା । ଏହାସହ ଅନେକ ଲୋକ ଗୁରୁତର ହୋଇ ଅନେକ ଦିନ ପର୍ଯ୍ୟନ୍ତ ହସପିଟାଲରେ ଭର୍ତ୍ତି ହୋଇଥିଲେ । ଯାଞ୍ଚରୁ ଜଣା ପଡ଼ିଥିଲାକି ଏହି ମଦ ବିଷାକ୍ତ ଥିଲା I ଏହାକୁ ତିଆରି କରିଥିଲା ରାମବାବୁ ମାହାତୋ I ରାମବାବୁ କେମିକାଲ ବ୍ୟବହାର କରି ଦେଶୀ ମଦ ତିଆରି କରୁଥିଲା । ୨୦୧୬ରୁ ବିହାର ସରକାର ମଦକୁ ବ୍ୟାନ କରିଥିବା ବେଳେ ଚୋରାରେ ଏଭଳି ମଦ ତିଆରି କରି ବିକ୍ରି କରାଯାଉଥିଲା । ପୂର୍ବରୁ ଅପରାଧୀଙ୍କ ବିରୋଧରେ ୭ରୁ ଅଧିକ ଅପରାଧ ମାମଲା ରୁଜୁ ହୋଇଛି ।ସେତେବେଳେ ଏହି ଘଟଣାରେ ବିହାର ବିଧାନସଭା ବେଶ୍‌ ସରଗରମ ରହିଥିଲା । ବିରୋଧୀ ସରକାରଙ୍କୁ ସବୁଦିଗରୁ ଘେରିବାକୁ ଚେଷ୍ଟା କରିଥିଲେ ।

ପ୍ରଥମେ ୧୩ ଡିସେମ୍ବରରେ ରାତିରେ ଛପରା ଜିଲ୍ଲା ଇସୁଆପୁର ବିଷାକ୍ତ ମଦ ପିଇ ୧୦ ରୁ ଅଧିକ ଲୋକ ଅସୁସ୍ଥ ହୋଇ ହସ୍ପିଟାଲରେ ଭର୍ତି ହୋଇଥିଲେ I ସେହି ରାତି ଠାରୁ ୧୪ ଡିସେମ୍ବର ପର୍ଯ୍ୟନ୍ତ ଅନେକ ଲୋକଙ୍କ ମୃତ୍ୟୁ ଘଟିଥିଲା I ଏହାପରେ ଜିଲ୍ଲାର ମଶ୍ରାକ, ଇସୁପୁର, ଅମ୍ନାଉର ଏବଂ ମାଧୁରା ବ୍ଲକ ରେ ପ୍ରବଳ ଉତ୍ତେଜନା ପ୍ରକାଶ ପାଇଥିଲା I ଏହା ପରେ ପରେ ହସ୍ପିଟାଲ ରେ ମୃତ୍ୟୁ ସଂଖ୍ୟା ବଢି ବଢି ୭୦ ଯାଏଁ ପହଞ୍ଚିଥିଲା I ବିଷାକ୍ତ ମଦ ର କୁପ୍ରଭାବରେ ବର୍ତମାନ ଯାଏ ଅନେକ ଦୃଷ୍ଟି ଶକ୍ତି ହରାଇଛନ୍ତି I