ମାଲକାନଗିରି: ଲଗାଣ ବର୍ଷା ଯୋଗୁଁ ମାଲକାନଗିରି ଜିଲ୍ଲାରେ ସ୍ଥିତି ଦୟନୀୟ । ମାଲକାନଗିରି ନାକାମୁଡି ପଞ୍ଚାୟତ ବାୟାପଡ଼ା ଘାଟିରେ ଭୂସ୍ଖଳନ ଘଟି ଯାତାୟତ ସମ୍ପୂର୍ଣ୍ଣ ଠପ୍ ରହିଛି । ଏଥିଯୋଗୁଁ ବାହ୍ୟ ଜଗତରୁ ବିଛିନ୍ନ ହୋଇଛନ୍ତି ୧୮ ଟି ଗାଁ ବାସିନ୍ଦା ।
ସୂଚନାନୁସାରେ, ପଛକୁ ପଛ ଲଘୁଚାପ ଫଳରେ ମୌସୁମୀ ସକ୍ରିୟ ରହିଛି । ଲଗାଣ ବର୍ଷା ଯୋଗୁଁ ମାଲକାନଗିରି ଜିଲ୍ଲାରେ ସ୍ଥିତି ଦୟନୀୟ ରହିଛି । ବାରମ୍ବାର ଭୂସ୍ଖଳନ ଯୋଗୁଁ ତୁମ୍ବା ପଦର ଘାଟିରେ ନିକଟରେ ଥିବା ୧୮ ଟି ଗାଁକୁ ଯୋଗାଯୋଗ ସମ୍ପୂର୍ଣ୍ଣ ବିଛିନ୍ନ ହୋଇଛି । ଯାତାୟତ ପାଇଁ ଅସ୍ଥାୟୀ କାଠ ପୋଲ ନିର୍ମାଣ କରି ବିପଦସଂକୁଳ ଅବସ୍ଥାରେ ଯାତାୟତ କରୁଛନ୍ତି ଅଂଚଳ ବାସିନ୍ଦା । ଭାରି ବର୍ଷା ଯୋଗୁଁ ରାସ୍ତା ମରାମତି ହୋଇପାରୁ ନଥିବା କଥା କହିଛି ବିଭାଗ ।
ଅନ୍ୟପଟେ କୋରାପୁଟ ଜିଲ୍ଲା ନନ୍ଦପୁର ବ୍ଲକରେ ମଧ୍ୟ ଭାରି ବର୍ଷା ଜାରି ରହିଛି । ଲଗାଣ ବର୍ଷା ଯୋଗୁଁ ମାଟି ଅତଡା ଖସି ରାସ୍ତା ବନ୍ଦ ହୋଇଯାଇଥିବା ବେଳେ, ଜୟପୁର ଲମତାପୁଟ ମୁଖ୍ୟ ରାସ୍ତାରେ ବିଭନ୍ନ ଜାଗାରେ ଗଛ ପଡ଼ି ଯାତାୟାତ ବାଧାପ୍ରାପ୍ତ ହୋଇଛି । ଅଗ୍ନିଶମ ବିଭାଗ କର୍ମଚାରୀ ରାସ୍ତାରେ ଗଛ ଗୁଡିକୁ କାଟି ରାସ୍ତା ସଫେଇରେ ଲାଗି ପଡିଛନ୍ତି । ନନ୍ଦପୁର ବ୍ଲକର କାଲାଡ଼ି ଗାଁ ନିକଟରେ ମାଟି ଅତଡା ଧସି ଖେମୁଣ୍ଡୁଗୁଡା ଏବଂ ନନ୍ଦକାକୁ ଯାତାୟତ ଠପ୍ ହୋଇଛି । ଗତ ୨୪ ଘଣ୍ଟାରେ କୋରାପୁଟ ଜିଲ୍ଲାରେ ୯୪୯ ମିଲିମିଟର ବର୍ଷା ହୋଇଥିବା ବେଳେ, ନନ୍ଦପୁର ବ୍ଲକରେ ୧୩୬ ମିଲିମିଟର ଏବଂ ଲମତାପୁଟ ବ୍ଲକ ରେ ୧୧୫ ମିଲିମିଟର ବର୍ଷା ରେକର୍ଡ କରାଯାଇଛି ।
Comments are closed.