ଭୁବନେଶ୍ୱର : ରାଜ୍ୟରେ ଘଟୁଥିବା କଙ୍ଗାରୁ କୋର୍ଟ ଉପରେ ପ୍ରତିକ୍ରିୟା ରଖିଛନ୍ତି ଆଇନ ମନ୍ତ୍ରୀ । ସେ କହିଛନ୍ତି ଆଇନକୁ ହାତକୁ ନେଲେ କେହି ବର୍ତ୍ତିବେନି । ସେ ଯେ କେହି ବି ହୋଇଥିବେ ଦଣ୍ଡିତ ହେବେ ନିଶ୍ଚୟ । କଙ୍ଗାରୁ କୋର୍ଟ କରି ନିର୍ଯାତନା ଦେଲେ ଏନେଇ ସରକାରଙ୍କ ସ୍ପଷ୍ଟ ଆଇନ ଅଛି । ଗାଁର କିଛି ପ୍ରଭାବଶାଳୀ ଲୋକ ଏ କାମ କରୁଛନ୍ତି ବୋଲି କହିଛନ୍ତି ଆଇନ ମନ୍ତ୍ରୀ। ତେବେ ସଚେତନତାର ଅଭାବ ଯୋଗୁ ଏପରି ଘଟୁଛି । କଙ୍ଗାରୁ କୋର୍ଟ ଭଳି ଘୃଣ୍ୟ ପ୍ରଥାକୁ ପ୍ରଶୟ ଦିଆଯିବ ନାହିଁ ।
ସୂଚନାଅନୁସାରେ,ରବିବାର କୋରାପୁଟ ଜିଲ୍ଲା ଲକ୍ଷ୍ମୀପୁରରେ ନରେନ୍ଦ୍ର ଏବଂ ଅଶାନ୍ତି ପ୍ରେମ ବିବାହ କରିଥିଲେ । କିନ୍ତୁ ତାଙ୍କ ବିବାହକୁ ପାରିବାରିକ ସ୍ୱୀକୃତି ନମିଳିବାରୁ ସେମାନେ ଆନ୍ଧ୍ରପ୍ରଦେଶ ଚାଲିଯାଇଥିଲେ । ସେଠାରେ କିଛିଦିନ ରହିବା ପରେ ନିକଟରେ ଗାଁକୁ ଫେରିଥିଲେ । ତେବେ ସେମାନଙ୍କୁ ଗ୍ରାମବାସୀ ଗାଁରେ ପୁରାଇ ଦେଇ ନଥିଲେ । କାରଣ ସେମାନେ ସମ୍ପର୍କରେ ପିଉସୀ ଏବଂ ପୁତୁରା ହେବେ ଏବଂ ଆଦିବାସୀ ସମ୍ପ୍ରଦାୟ ପରମ୍ପରା ଅନୁସାରେ ଯଦି ନିଜ ସମ୍ପର୍କ ଭିତରେ କିମ୍ବା ଗାଁରେ କେହି ପ୍ରେମ ବିବାହ କରନ୍ତି ତେବେ ଗାଁରେ ଭଲ ବର୍ଷା ହୋଇ ନଥାଏ । ଫଳରେ ଚାଷ କାର୍ଯ୍ୟ ପ୍ରଭାବିତ ହୁଏ । ତେଣୁ ଦୁଇ ଗାଁର ଭଦ୍ରଲୋକ ଓ ପରିବାରର ଲୋକଙ୍କୁ ନେଇ ବୈଠକ ବସିଥିଲା । ବୈଠକରେ ହୋଇଥିବା ନିଷ୍ପତ୍ତି ଅନୁଯାୟୀ ଆଦିବାସୀ ପ୍ରଥା ପରଂପରା ଅନୁସାରେ ଧରଣୀ ପେନୁଙ୍କୁ ତଥା ଗାଁ ଇଷ୍ଟ ଦେବୀ କୁସନ୍ତୁଷ୍ଟ କରିବା ପାଇଁ ହଳ-ଲଙ୍ଗଳ ମଗା ଯାଇଥିଲା ।
ଏହା ପରେ ଉଭୟ ପ୍ରେମିକ-ପ୍ରେମିକାଙ୍କ ବେକରେ ରଶି ଓ ହଳ-ଲଙ୍ଗଳ ଲଗାଇ ଗାଁରେ ସାତ ଇଷ୍ଟ ଦେବୀ ଆଗରେ ଦୁଇ ପ୍ରେମୀ ଯୁଗଳଙ୍କୁ ବଳଦ ହୋଇ ଘେରା ବୁଲା ଯାଇଥିଲା । ତେବେ ଏହି ଘଟଣାରେ ନାରାୟଣପାଟଣା ଥାନାରେ ମାମଲା ରୁଜୁ ହୋଇଥିଲା । ବର୍ଗୀ ପଞ୍ଚାୟତର ସରପଞ୍ଚଙ୍କ ଅଭିଯୋଗ ଅନୁଯାୟୀ ଦିଶାରୀ ସମେତ କିଛି ଗ୍ରାମବାସୀଙ୍କ ନାମରେ ମାମଲା ରୁଜୁ ହୋଇଛି । ଏହି ଘଟଣାରେ ୫ ଜଣଙ୍କୁ ଅଟକ ରଖି ପୁଲିସ ପଚରାଉଚରା କରୁଛି । ଦିଶାରି ଅର୍ଥାତ୍ ପୂଜକ ସେମାନଙ୍କ ଗୋବର ପାଣି ସିଞ୍ଚନ କରି ହଳ କରାଇଥିଲା ବୋଲି ଅଭିଯୋଗ ହୋଇଛି । ଶେଷରେ ଯୁବକ ଜଣକ ତାର ପ୍ରେମିକାକୁ ଧରି ନିଜ ଘରକୁ ଆସି ଆଶ୍ରୟ ନେଇଛନ୍ତି ।
Comments are closed.