ଭୁବନେଶ୍ବର: କାଳ କୋଳ କରି ନେଇଯିବା ପରେ ବି ଅମର ହେଇଗଲେ ଜନ୍ମେଶ । ମାତ୍ର ବର୍ଷକର ଶିଶୁଟି ବଞ୍ଚାଇ ଦେଇଗଲା ଆଉ ୨ ଟି ଅମୁଲ୍ୟ ଜୀବନ । ଅଙ୍ଗ ଦାନ କରି ଅମର ହୋଇଯାଇଛି ସେହି ଦେବ ଶିଶୁ ଜନ୍ମେଶ ଲେଙ୍କା । ବର୍ଷକର ପିଲାର ମୃତ୍ୟୁ ପରେ କିଡନୀ ଲିଭର ଦାନ କରିଛନ୍ତି ପରିବାର । ଗାର୍ଡ ଅଫ ଅନର ସହ ଜାଗମରା ରେ ସମ୍ପନ୍ନ ହୋଇଛି ଜନ୍ମେଶ ର ଶେଷକୃତ୍ୟ । ଏଣିକି ଘର ଅଗଣା ହେଇ ଯାଇଛି ଶୂନ୍ୟ । ସ୍ତବ୍ଧ ହେଇଯାଇଛନ୍ତି ପରିବାର ଲୋକେ । ଆଉ ଶୁଣାଯିବନି ଜନ୍ମେଶର ଖିଲି ଖିଲି ହସ ସହ ଦୋ’ରୋଟି କଥା ।
ଜନ୍ମେଶର ଘର ରାଉରକେଲା । ବାପା ଏମ୍ସ ହସ୍ପିଟାଲରେ ଚାକିରି କରୁଥିବାରୁ ଭୁବନେଶ୍ୱର କଳିଙ୍ଗ ବିହାରରେ ରୁହନ୍ତି । ୧୦ ଦିନ ତଳେ କାନ୍ଦୁଥିବାବେଳେ ହାର୍ଟ ଚୋକ ହୋଇଥଲା । ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ଦୀର୍ଘଦିନର ଉଦ୍ୟମ ପରେ ବି ତାଙ୍କୁ ବଞ୍ଚାଇ ପାରିନଥିଲେ ଡାକ୍ତର ।
ତେବେ ପୁଅକୁ ସିନା ପରିବାର ହରାଇଲେ । ହେଲେ ପୁଅର ସ୍ମୃତିକୁ ତାଜା ରଖିବାକୁ ବା ପିଲାର ଅଙ୍ଗଦାନ କରିବାକୁ ନିଷ୍ପତ୍ତି ନେଲେ ପରିବାର । ଶେଷରେ ପରିବାର ନିଷ୍ପତ୍ତି ଅନୁଯାୟୀ ଏବେ ତାଙ୍କର ଲିଭର ଓ କିଡନୀ ଦାନ କରାଯାଇଛି । ଜନ୍ମେଶଙ୍କ ଲିଭର ଦିଲ୍ଲୀର ଜଣେ ପିଲା ଦେହରେ ଲଗାଯାଇଥିବା ବେଳେ କିଡନୀ ଭୁବନେଶ୍ୱରର ଜଣେ ପିଲାକୁ ଦାନ କରାଯାଇଛି । ପିଲାଟିର ମୃତ୍ୟୁକୁ ନେଇ ଶୋକାକୁଳ ପରିବେଶ ସୃଷ୍ଟି ହୋଇଛି । ପ୍ରିୟଜନଙ୍କ ଆଖିରୁ ଶୁଖୁନି ଲୁହ । ବାପା ଛାତିକୁ ପଥର କରିଥିବାବେଳେ ,ଛାତିପିଟି କାନ୍ଦୁଛି ମା’ । କିନ୍ତୁ ଏସବୁ ଭିତରେ କୁନି ପିଲାର ଏ ଦାନ ଅନ୍ୟମାନଙ୍କୁ ଯୋଗାଇଛି ପ୍ରେରଣା । ପିଲାଟିର ମହତ୍ କାର୍ଯ୍ୟ ପାଇଁ ଗାର୍ଡ ଅଫ ଅନର ପ୍ରଦାନ କରାଯାଇଛି ।
Comments are closed.