କଟକ/ଜଳେଶ୍ୱର : ରାକ୍ଷୀ ପୂର୍ଣ୍ଣିମା ଭଳି ପବିତ୍ର ଦିନରେ ୨ ଟି ସ୍ଥାନରୁ ଆସିଛି ଦୁଃଖଦ ଖବର । ରାକ୍ଷୀ ବାନ୍ଧିବାକୁ ଭଉଣୀ ଘରକୁ ବାଇକରେ ଯାଉଥିବାବେଳେ ସଡକ ଦୁର୍ଘଟଣାରେ ଭାଇଙ୍କର ମୃତ୍ୟୁ ଘଟିଛି । ତାଙ୍କୁ ଏକ ପଥର ବୋଝେଇ ଟ୍ରକ ଧକ୍କାରେ ବାଇକ ସହ ଘୋଷାରି ନେବା ସହ ତାଙ୍କ ଉପରେ ଚଢି ଯାଇଥିଲା । ଆଜି ସକାଳେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି କଟକ ଜିଲ୍ଲା ଆଠଗଡ଼ ଥାନା ବେଣ୍ଟପଦା ପଞ୍ଚାୟତ ଲଞ୍ଚ ଲ୍ୟାଣ୍ଡ ହୋଟେଲ ସମ୍ମୁଖରେ। ମୃତକ ହେଉଛନ୍ତି ଢେଙ୍କାନାଳ ଜିଲ୍ଲା ବାଲିମି ଅଞ୍ଚଳର ବାମନ ସାହୁଙ୍କ ପୁଅ ରାଜେନ୍ଦ୍ର ନାରାୟଣ ସାହୁ । ରାକ୍ଷୀ ପୂର୍ଣ୍ଣିମା ଅବସରରେ ଏଭଳି ଦୁଃଖଦ ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ଏ ସମ୍ପର୍କରେ ଖବର ପାଇ ଆଠଗଡ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି । ଟ୍ରକ୍ ମାଲିକଙ୍କୁ ଲୋକେ ଧରି ପୁଲିସ ଜିମା ଦେଇଛନ୍ତି ।
ଅନ୍ୟପଟେ,ଜଳେଶ୍ୱର ଶିଖରପୁର ଘାଟରେ ବୁଡି ୨ ଭଉଣୀଙ୍କ ମୃତ୍ୟୁ ଘଟିଛି । ମହାଦେବଙ୍କ ଠାରେ ଜଳ ଲାଗି କରିବା ପାଇଁ ସୁବର୍ଣ୍ଣରେଖା ନଦୀରେ ବୁଡ଼ ପକାଇ ପାଣି ଉଠାଇବାବେଳେ ଭାସିଗଲେ ଦୁଇ ଭଉଣୀ । ଆଜି ସକାଳେ ଜଳେଶ୍ୱର ଶିଖରପୁର ଘାଟରେ ତିନି ଜଣ ନାବାଳିକା ବୁଡ଼ ପକାଇବାକୁ ଯାଇଥିଲେ । ଏହି ସମୟରେ ହଠାତ୍ ତିନି ଜଣ ଭାସିଯାଇଥିଲେ । ଯାହାପରେ ଘଟଣାସ୍ଥଳରେ ଉପସ୍ଥିତ ଥିବା ଲୋକ ତୁରନ୍ତ ଜଣଙ୍କୁ ଉଦ୍ଧାର କରିଥିବା ବେଳେ ବାକି ଦୁଇ ନାବାଳିକା ନିଖୋଜ ଅଛନ୍ତି । ବୁଡ଼ ପକାଇବା ସମୟରେ ପ୍ରଖର ନଦୀ ସ୍ରୋତ ଆସିବାରୁ ନାବାଳିକା ଭାସିଯାଇଥିବା ସୂଚନା ମିଳିଛି । ତେବେ ନିଖୋଜ ଦୁଇ ନାବାଳିକା ହେଉଛନ୍ତି ସ୍ଥାନୀୟ ଚକହରି ଗାଁର କାହ୍ନାଚରଣ ଦାସ ଅଧିକାରୀଙ୍କ ଦୁଇ ନାବାଳିକା ନନ୍ଦିତା ଓ ପରି ବୋଲି ଜଣାପଡିଛି । ଗ୍ରାମବାସୀଙ୍କ ଦ୍ୱାରା ବର୍ତ୍ତମାନ ଖୋଜାଖୋଜି ଜାରି ରହିଛି।
