ଭୁବନେଶ୍ୱର : ଏଣିକି ଚକବନ୍ଦୀ ଜମି ବିକ୍ରୀ କରିହେବ। ଓଡ଼ିଶା ଚକବନ୍ଦୀ ଓ ଭୂମିର ବିଭକ୍ତିକରଣ ନିବାରଣ ଅଧିନିୟମର ଚାପ୍ଟର-୫ର ଧାରା ୩୪ ଏବଂ ୩୫ର ଉଚ୍ଚେଦ ପ୍ରସ୍ତାବକୁ ମିଳିଛି ଅନୁମୋଦନ I ଏନେଇ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ ବୈଠକରେ ନିଷ୍ପତ୍ତି ନିଆଯାଇଛି। ରାଜ୍ୟ କ୍ୟାବିନେଟର ଏହି ଗୁରୁତ୍ବପୂର୍ଣ୍ଣ ନିଷ୍ପତ୍ତି ଅନୁସାରେ ଚକ ଜମିକୁ ବିକ୍ରୟ ବା ବିଭାଜନ କରିପାରିବେ ଜମି ମାଲିକ।
ପୂର୍ବରୁ ରହିଥିବା ଚକ ଜମି ବିଭାଜନ ଅବୈଧ ନିୟମ ରଦ୍ଦ କରାଯାଇଛି। ପୂର୍ବରୁ ଚକ ଜମିକୁ ବିଭାଜିତ କରି ବିକ୍ରି କଲେ ତାହା ଅବୈଧ ହେଉଥିଲା। ଓଡିଶା ଚକବନ୍ଦୀ ଓ ଭୂମିର ବିଭକ୍ତିକରଣ ନିବାରଣ ଅଧିନିୟମ ୧୯୭୨ ର ଧାରା ୩୪ ଅନୁଯାୟୀ କୌଣସି ଚକଭୁକ୍ତ ଜମିର ବିଭକ୍ତିକରଣ ଅଥବା ବିଭାଜନ ନିଷେଧ ରହିଥିଲା। ଧାରା ୩୫ ଅନୁଯାୟୀ ଯଦି ଧାରା ୩୪ କୁ ଉଲଙ୍ଘନ କରି କୌଣସି ଜମି ବିକ୍ରୀ କିମ୍ବା ବିଭାଜିତ ହୋଇଥିଲେ, ତାହା ଅବୈଧ ବିବେଚିତ ହେବା ସହ ଉଲଙ୍ଘନକାରୀଙ୍କୁ ଜମିରୁ ଉଚ୍ଛେଦ କରାଯାଉଥିଲା।
ଏହାକୁ ଦୃଷ୍ଟିରୁ ରଖି କ୍ୟାବିନେଟ୍ ଏହି ଅଧିନିୟମର ଚାପ୍ଟର-୫ର ଧାରା ୩୪ ଏବଂ ୩୫କୁ ଉଚ୍ଚେଦ କରିବାକୁ ଅନୁମୋଦନ କରିଛନ୍ତି । ଏଣିକି ଜମି ମାଲିକମାନେ ସେମାନଙ୍କର ଚକ ଜମି ବିକ୍ରୟ / ବିଭାଜନ କରିପାରିବେ ଏବଂ ଜମି ପଟ୍ଟାଗୁଡିକର ସଂଶୋଧନ ହୋଇପାରିବ। ଏହା ଦ୍ବାରା ରେଜିଷ୍ଟ୍ରୀ ଶୁଳ୍କ ଓ ଅନ୍ୟାନ୍ୟ ରାଜସ୍ବ ଶୁଳ୍କର ଆଦାୟ ମଧ୍ୟ ବୃଦ୍ଧି ପାଇବ।
Comments are closed.