ରାଉରକେଲା : ଓଡ଼ିଶା-ଝାଡ଼ଖଣ୍ଡ ସୀମାନ୍ତ ସରଣ୍ଡା ଜଙ୍ଗଲରେ ଆଇଇଡି ବିସ୍ଫୋରଣ । ଝାରଖଣ୍ଡ ଜରେଇକେଲା ସରଣ୍ଡା ଜଙ୍ଗଲରେ ମାଓବାଦୀମାନେ ଦୁଇଟି ଆଇଇଡି ବିସ୍ଫୋରଣ କରିଛନ୍ତି । ଏଥିରେ ସିଆରପିଏଫ୍ କୋବ୍ରା ବାହିନୀର ଦୁଇ ଜଣ ଯବାନ ଗୁରୁତର ଭାବେ ଆହତ ହୋଇଛନ୍ତି । ଘଟଣାସ୍ଥଳରୁ ସେମାନଙ୍କୁ ଉଦ୍ଧାର କରି ଚିକିତ୍ସା ପାଇଁ ରାଞ୍ଚି ଏୟାରଲିଫ୍ଟ କରାଯାଇଛି ।
ସୂଚନାନୁସାରେ, ଶୁକ୍ରବାର ସିଆରପିଏଫ କୋବ୍ରା ବାହିନୀର ଯବାନମାନେ ସରଣ୍ଡା ଜଙ୍ଗଲର ଦୀଘା ଏବଂ ତିରିଲି ଅଞ୍ଚଳରେ ସର୍ଚ୍ଚ ଅପରେସନ କରିଥିଲେ । ସର୍ଚ୍ଚ ଅପରେସନ ବେଳେ ମାଓବାଦୀମାନେ ଯବାନଙ୍କୁ ଟାର୍ଗେଟ୍ କରି ଆଇଇଡି ବିସ୍ଫୋରଣ କରିଥିଲେ । ଏଥିରେ ଦୁଇ ଜଣ ସିଆରପିଏଫ୍ ଯବାନ ଗୁରୁତର ଭାବେ ଆହତ ହୋଇଥିବା ଜଣାପଡ଼ିଛି । ସେମାନଙ୍କୁ ସାଥି ଯବାନମାନେ ଉଦ୍ଧାର କରି ଚିକିତ୍ସା ପାଇଁ ରାଞ୍ଚି ପଠାଇବାକୁ ବ୍ୟବସ୍ଥା କରୁଥିବାର ସୂଚନା ମିଳିଛି ।
ଅନ୍ୟପଟେ,ମାଓବାଦୀଙ୍କର ସହିଦ ସପ୍ତାହ ଶେଷ ହୋଇଛି । ଛତିଶଗଡ ବସ୍ତରର ଦୁର୍ଗମ ଜଂଗଲରେ ମାଓବାଦୀ ମାନେ ସହିଦ ସପ୍ତାହ ମହା ଆଡମ୍ବରରେ ପାଳନ କରିଥିବାର ଭିଡିଓ ମାଓ ସଙ୍ଗଠନ ପକ୍ଷରୁ ଜାରି କରାଯାଇଛି । ସଙ୍ଗଠନ ପକ୍ଷରୁ ଶୋଭାଯାତ୍ରା ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇ ଥିବା ଏହି ଭିଡିଓରେ ଦେଖିବାକୁ ମିଳିଛି । ଏକ ମାଓ ବ୍ୟାନର୍ରେ “କେନ୍ଦ୍ରୀୟ କମିଟି ସଦସ୍ୟ ଚଳପତି ଓ ଗୌତମ ଅମର ରହେ”ଉଲ୍ଲେଖ କରାଯାଇଛି । ଅପରେସନ କାଗର ମାଧ୍ୟମରେ ଦମନ ବନ୍ଦ କରିବା ନେଇ ମାଓ ସଙ୍ଗଠନ ନାରାବାଜି ଦେଉଥିବା ଭିଡିଓରେ ଦେଖିବାକୁ ମିଳିଛି ।
