ମୁ୍ୟଜିକ ଇଣ୍ଡଷ୍ଟ୍ରୀର ‘ଓସ୍କାର’ କୁହାଯାଉଥିବା ଗ୍ରାମୀ ପୁରସ୍କାରର ୬୪ତମ ସଂସ୍କରଣ ଲସ୍ ଭେଗାସର ଏମଜିଏମ୍ ଗ୍ରେଟ୍ ଗାର୍ଡେନ ଆରୋନାରେ ଆୟୋଜିତ ହୋଇଯାଇଛି । ସଙ୍ଗୀତ ଜଗତର ସବୁଠୁ ପ୍ରତିଷ୍ଠିତ ତଥା ସର୍ବୋଚ୍ଚ ଗ୍ରାମୀ ପୁରସ୍କାରର ୨୮ଟି ବିଭାଗରେ ବିଶ୍ୱର ନାମୀଦାମୀ ସଙ୍ଗୀତ କଳାକାର ସହ ସଙ୍ଗୀତ ସହ ଜଡ଼ିତ ବ୍ୟକ୍ତିତ୍ୱଙ୍କୁ ସମ୍ମାନିତ କରାଯାଇଛି ।
ଚଳିତ ବର୍ଷ ଦୁଇ ଜଣ ଭାରତୀୟ ବଂଶୋଦ୍ଭବଙ୍କୁ ଗ୍ରାମୀ ଆୱାର୍ଡରେ ପୁରସ୍କୃତ କରାଯାଇଛି । ସଙ୍ଗୀତକାର ରିକି କେଜ୍ ଏବଂ ଇଣ୍ଡୋ-ଆମେରିକୀୟ ଗାୟିକା ଫାଲଗୁନୀ ଶାହଙ୍କୁ ସମ୍ମାନିତ କରାଯାଇଛି । ରିକିଙ୍କୁ ‘ବେଷ୍ଟ୍ ନୁ୍ୟ ଏଜ୍ ଆଲବମ’ କ୍ୟାଟେଗୋରୀରେ ‘ଡିଭାଇନ ଟାଇଡ୍ସ’ ପାଇଁ ସଫିୱର୍ଟ କୋପଲ୍ୟାଣ୍ଡ ସହ ଏହି ଟ୍ରଫି ମିଳିଛି । ତେବେ ରିକି କେଜ୍ଙ୍କ ଏହା ଦ୍ୱିତୀୟ ଗ୍ରାମୀ ଆୱାର୍ଡ । ଅନ୍ୟପକ୍ଷରେ ଭାରତୀୟ-ଆମେରିକୀୟ ଗାୟିକା ଫାଲଗୁନୀ ଶାହଙ୍କୁ ଶ୍ରେଷ୍ଠ ଶିଶୁ ସଙ୍ଗୀତ ବିଭାଗରେ ପୁରସ୍କୃତ କରାଯାଇଛି । ‘ଏ କଲର୍ଫୁଲ୍ ୱାଲïର୍’ ଆଲବମ ପାଇଁ ଫାଲଗୁନୀଙ୍କୁ ସମ୍ମାନିତ କରାଯାଇଛି ।
ଚଳିତ ବର୍ଷ ବେଷ୍ଟ୍ ନୁ୍ୟ ଆର୍ଟିଷ୍ଟର ପୁରସ୍କାର ଅଲିଭିଆ ରୋଡ୍ରିଗୋ ହାସଲ କରିବାରେ ସଫଳ ହୋଇଥିବା ବେଳେ ଶ୍ରେଷ୍ଠ ଟ୍ରାଡିସନାଲ ପପ୍ ଭୋକଲ୍ ପାଇଁ ଲେଡି ଗାଗାଙ୍କୁ ମଧ୍ୟ ଗ୍ରାମୀ ପୁରସ୍କାରରେ ସମ୍ମାନିତ କରାଯାଇଛି । ସେହିପରି ସର୍ବଶ୍ରେଷ୍ଠ ରକ୍ ଆଲବମ ଏବଂ ସର୍ବଶ୍ରେଷ୍ଠ ରକ୍ ଗୀତର ପୁରସ୍କାର ଫୁ ଫାଇଟର୍ସକୁ ମିଳିଛି । ହେଲେ ସମସ୍ତଙ୍କୁ ପଛରେ ପକାଇ ବର୍ଷର ସର୍ବଶ୍ରେଷ୍ଠ ଗୀତ ଭାବେ ‘ଲିଭ୍ ଦ ଡୋର୍ ଓପନ୍’ ଗ୍ରାମୀ ପୁରସ୍କାର ଜିତିଛି ।
ତେବେ ସଙ୍ଗୀତର ଏହି ସର୍ବୋଚ୍ଚ ପୁରସ୍କାର ସମାରୋହରେ ପାକିସ୍ତାନୀ ଗାୟିକା ଅରୁଜ୍ ଆଫତାବ ଇତିହାସ ରଚିଛନ୍ତି । ଅରୁଜ ତାଙ୍କ ଗୀତ ‘ମୋହ³ତ’ ପାଇଁ ବେଷ୍ଟ ଗ୍ଲୋବାଲ ମୁ୍ୟଜିକ ପ୍ରଦର୍ଶନ ବିଭାଗରେ ପୁରସ୍କୃତ ହୋଇଛନ୍ତି । ତେବେ ପ୍ରଥମ ପାକିସ୍ତାନୀ ଗାୟିକା ଭାବେ ଗ୍ରାମୀ ଜିତି ରେକର୍ଡ କରିଛନ୍ତି । ଆମେରିକୀୟ ଗାୟକ କଥା ଗୀତିକାର କ୍ରିସ୍ ଷ୍ଟେପଲଟନଙ୍କ ‘ଷ୍ଟାର୍ଟିଙ୍ଗ ଓଭର୍’କୁ ବେଷ୍ଟ୍ କଣ୍ଟ୍ରି ଆଲବମର ଖାସ୍ ପୁରସ୍କାରରେ ସମ୍ମାନିତ କରାଯାଇଛି ।
ଏହି ବିଶ୍ୱ ମଞ୍ଚରେ ପ୍ରସିଦ୍ଧ ଭାରତୀୟ ସଙ୍ଗୀତକାର ଏ ଆର ରେହମାନ ମଧ୍ୟ ସାମିଲ ହୋଇଥିଲେ । କିନ୍ତୁ ଓସ୍କାର ସମାରୋହ ପରେ ଗ୍ରାମୀ ପୁରସ୍କାରରେ ମଧ୍ୟ ଲତା ମଙ୍ଗେସକରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇନାହିଁ । ଚଳିତ ବର୍ଷ ୩୧ ଜାନୁଆରୀରେ ଗ୍ରାମୀ ପୁରସ୍କାର ଆୟୋଜନ ହେବାର ଥିଲା, କିନ୍ତୁ କରୋନା ସଂକ୍ରମଣ ଯୋଗୁଁ ଏହି ସମାରୋହକୁ ସ୍ଥଗିତ କରାଯାଇଥିଲା ।
Comments are closed.