ଦୁଷ୍କର୍ମ ଅଭିଯୁକ୍ତଙ୍କ ହେବ ଡିଏନଏ ଟେଷ୍ଟ

ବ୍ରହ୍ମପୁର : ଗୋପାଳପୁର ବେଳାଭୂମି ଗଣ ଦୁଷ୍କର୍ମ ମାମଲାରେ କ୍ରାଇମବ୍ରାଞ୍ଚ ତଦନ୍ତ ଜାରି । ୧୦ ଅଭିଯୁକ୍ତଙ୍କ DNA ନିଆଗଲା ,ସେମାନଙ୍କୁ ରିମାଣ୍ଡରେ ନେଇ ପଚରାଉଚରା କରୁଛି କ୍ରାଇମବ୍ରାଞ୍ଚ । ଗିରଫ ୧୦ ଜଣଙ୍କ ମଧ୍ୟରୁ ୬ ଜଣଙ୍କୁ ରିମାଣ୍ଡରେ ନେଇ ଜେରା କରୁଛି କ୍ରାଇମବ୍ରାଞ୍ଚ । ଅନ୍ୟ ୪ ଜଣ ନାବାଳକ ରହିଥିବା ସୂଚନା ମିଳିଛି । ତେବେ ଏହି ୪ ଜଣଙ୍କ ବୟସ ୧୭ ବର୍ଷ ରହିଥିବାବେଳେ ଏମାନଙ୍କୁ ସାବାଳକ ଭାବରେ ବିଚାରକୁ ନିଆଯାଇ ତଦନ୍ତ ପରିସରଭୁକ୍ତ କରାଯାଉ ବୋଲି କହିଥିଲେ ବ୍ରହ୍ମପୁର ଏସପି ।

ସୂଚନାନୁସାରେ,ଗତ ରବିବାର ରଜ ସଂକ୍ରାନ୍ତି ଦିନ ରାତିରେ ଜଣେ କଲେଜ ଛାତ୍ରୀ ତାଙ୍କ ପୁରୁଷ ବନ୍ଧୁଙ୍କ ସହ ଗୋପାଳପୁର ବେଳାଭୂମିରେ ବସିଥିବା ବେଳେ କିଛି ଅସାମାଜିକ ଯୁବକ ତାଙ୍କୁ ଦୁର୍ବ୍ୟବହାର କରିଥିଲେ । ଏହାର ପ୍ରତିବାଦ କରିବାରୁ ଯୁବତୀଙ୍କ ପୁରୁଷ ବନ୍ଧୁଙ୍କୁ ବାନ୍ଧି ପକାଇ ୪ ଜଣ ନାବାଳକଙ୍କ ସହ ଅନ୍ୟ ୬ ଜଣ ମିଶି ଗଣ ଦୁଷ୍କର୍ମ କରି ଫେରାର ହୋଇଯାଇଥିଲେ । ଏନେଇ ଛାତ୍ରୀ ଜଣକ ଗୋପାଳପୁର ଥାନାରେ ଅଭିଯୋଗ କରିବା ପରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ନିର୍ଦେଶ ଦେଇଥିଲେ ବ୍ରହ୍ମପୁର ଏସପି । ଏହି ଘଟଣାରେ ସମସ୍ତ ୧୦ ଜଣ ଅଭିଯୁକ୍ତଙ୍କୁ ଧରାଯାଇଛି । ଅଭିଯୁକ୍ତଙ୍କ ବିରୋଧରେ ବିଏନଏସ ଧାରା ୭୦ ଲାଗିଛି । ଘଟଣାର ତଦନ୍ତ ପାଇଁ ସ୍ପେସାଲ ଟିମ୍ ଗଠନ ହୋଇଥିବା ସୂଚନା ଦେଇଛନ୍ତି ବ୍ରହ୍ମପୁର ଏସପି ।

ପୋଲିସି ଡିଜି Y.B. ଖୁରାନିୟାଙ୍କ ନିର୍ଦ୍ଦେଶ ପରେ କ୍ରାଇମବ୍ରାଞ୍ଜର ତନାଘନା ଆରମ୍ଭ ହୋଇଛି । କ୍ରାଇମବ୍ରାଞ୍ଚର ମହିଳା ଓ ଶିଶୁ ଅପରାଧ ୱିଙ୍ଗ ଘଟଣାର ତଦନ୍ତ କରୁଛି । ମହିଳା ଡ଼ିଏସପିଙ୍କ ନେତୃତ୍ୱରେ ୩ ଜଣିଆ ଟିମ ଗୋପାଳପୁରରେ ପହଞ୍ଚି ଏସପି ଓ ତଦନ୍ତ କାରୀ ଟିମ ସହ ଆଲୋଚନା କରି ଘଟଣା ସ୍ଥଳ ବୁଲି ଦେଖିଛନ୍ତି । ଅଭିଯୁକ୍ତଙ୍କ ଡ଼ାକ୍ତରୀ ମାଇନା କରାଇଛି ପୋଲିସ ।
ଆଇଜି ଏସ ସାଇନୀଙ୍କ ତତ୍ତ୍ବାବଧାନରେ ତଦନ୍ତ ଆରମ୍ଭ କରିବା ସହ ମାମଲାକୁ ‘ରେଡ ଫ୍ଳାଗ’ ଶ୍ରେଣୀ ଭାବେ କ୍ରାଇମବ୍ରାଞ୍ଚ ବିବେଚନା କରିଛି ।

ରେଡ଼ ଫ୍ଲାଗ ମାମଲା କ’ଣ ?

ସାଧାରଣତଃ ଗୁରୁତ୍ୱପୂର୍ଣ୍ଣ ଓ ସଂବେଦନଶୀଳ ଅପରାଧକୁ ରେଡ଼ ଫ୍ଲାଗ ମାମଲା ଭାବେ ବିବେଚିତ କାରାଯାଇଥାଏ । କ୍ରାଇମ ଏଗେଂଷ୍ଟ ଓମେନ କ୍ଷେତ୍ରରେ ତଦନ୍ତ ଓ ନ୍ୟାୟିକ ପ୍ରକ୍ରିୟାକୁ ଅଧିକ କ୍ରିୟାଶୀଳ କରିବା ପାଇଁ ୨୦୧୪ ରେ ଏହାକୁ ଆରମ୍ଭ କରାଯାଇଥିଲା । ନାବାଳିକା, ଯୁବତୀ କିମ୍ୱା ମହିଳାଙ୍କ ପ୍ରତି ହେଉଥିବା ଯୌନ ନିର୍ଯ୍ୟାତନା, ମାନବ ଚାଲାଣ କେସକୁ ସମ୍ବେଦନନଶୀଳ କେସ ଭାବେ ବିବେଚନା କରାଯାଏ । କିନ୍ତୁ ଗ୍ୟାଙ୍ଗ ରେପ ବା ଗଣଧର୍ଷଣ, ଯାହାକି ଅତି ସମ୍ବେଦନଶୀଳ କେସକୁ ‘ରେଡ଼ ଫ୍ଲାଗ’ ଅନ୍ତର୍ଭୁକ୍ତ କରାଯାଏ । ଡେଜିଗନେଟେଡ଼ ଅଫିସରଙ୍କୁ ତଦନ୍ତ ଭାର ଦିଆଯାଏ । ଯାହା ଉପରେ ତ୍ୱରିତ, ସ୍ବତନ୍ତ୍ର ତଦନ୍ତ ଓ ବରିଷ୍ଠ ଅଧିକାରୀଙ୍କ ନିଜସ୍ୱ ନିରୀକ୍ଷଣ ଆବଶ୍ୟକ। ଏପରି ମାମଲାଗୁଡ଼ିକ ନାରୀ ଓ ଶିଶୁ ହିଂସା, ଯୌନ ନିର୍ଯାତନା, କିମ୍ବା ଦୁଷ୍କର୍ମ ଅପରାଧ ସହ ସଂପୃକ୍ତ । ‘ରେଡ଼ ଫ୍ଲାଗ’ ଟ୍ୟାଗ ଦ୍ୱାରା ପିଡିତାଙ୍କୁ ତ୍ୱରିତ ନ୍ୟାୟ ଓ ଦୋଷୀଙ୍କୁ ଶୀଘ୍ର ଦଣ୍ଡବିଧାନ କରାଯାଇଥାଏ ବୋଲି ସୂଚନା ଦେଇଛନ୍ତି ଡିଜିପି ।