ଭୁବନେଶ୍ୱର : ୧୭ବର୍ଷରୁ କମ୍ ମହିଳା ଫିଫା ବିଶ୍ୱକପ୍ ୨୦୨୨ ମଙ୍ଗଳବାରଠାରୁ ଆରମ୍ଭ ହେବାକୁ ଯାଉଛି । ଏଥିପାଇଁ ସମସ୍ତ ୧୬ଟି ଅଂଶଗ୍ରହଣକାରୀ ଦଳ ଭେନୁ୍ୟରେ ପହଞ୍ଚି ସାରିଛନ୍ତି । ଓଡ଼ିଶା ଓ ଗୋଆରେ ପ୍ରତିଯୋଗିତାର ଉଦ୍ଘାଟନୀ ମ୍ୟାଚ ଖେଳାଯିବ । ଆୟୋଜକ ରାଷ୍ଟ୍ର ଭାରତ ମଙ୍ଗଳବାର ରାତି ୮ଟାରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଆମେରିକା ବିପକ୍ଷରେ ପଡିଆକୁ ଓହ୍ଲାଇବ । ଭାରତ ଗ୍ରୁପ୍ରେ ମରକ୍କୋ ଓ ବ୍ରାଜିଲ୍ ମଧ୍ୟ ରହିଛନ୍ତି । ମରକ୍କୋ ଓ ବ୍ରାଜିଲ ମଧ୍ୟରେ କଳିଙ୍ଗ ଷ୍ଟାଡିୟମରେ ଆଉ ଏକ ଓପ୍ନିଙ୍ଗ ମ୍ୟାଚ୍ ଖେଳାଯିବ ।
ସେହିଭଳି ଗୋଆର ପଣ୍ଡିତ ଜବାହରଲାଲ ନେହରୁ ଷ୍ଟାଡିୟମରେ ଗ୍ରୁପ୍-ବିର ଉଦଘାଟନୀ ମ୍ୟାଚ ଚିଲି ଓ ନୁ୍ୟଜିଲାଣ୍ଡ ମଧ୍ୟରେ ଖେଳାଯିବ । ଏହି ପ୍ରତିଷ୍ଠିତ ଟୁର୍ଣ୍ଣାମେଣ୍ଟ୍ର ୭ମ ସଂସ୍କରଣରେ ୧୬ଟି ଦଳକୁ ୪ଟି ଗ୍ରୁପ୍- ଏ, ବି, ସି ଓ ଡି ରେ ବିଭକ୍ତ କରାଯାଇଛି । ଭୁବନେଶ୍ୱର ଓ ଗୋଆ ବ୍ୟାତୀତ ବିଶ୍ୱକପ୍ର ତୃତୀୟ ଭେନୁ୍ୟ ହେଉଛି ମୁମ୍ବାଇ । ଯେଉଁଠାରେ ଆସନ୍ତା ଅକ୍ଟୋବର ୩୦ ତାରିଖରେ ଗ୍ରାଣ୍ଡ୍ ଫାଇନାଲ ମ୍ୟାଚ୍ ଖେଳାଯିବ । ୧୭ ବର୍ଷରୁ କମ୍ ଫିଫା ମହିଳା ବିଶ୍ୱକପ୍ ଇଣ୍ଡିଆ ୨୦୨୨ସଂସ୍କରଣରେ ପୂର୍ବର ୩ ଚାମ୍ପିଅନ ଦଳ ଫ୍ରାନ୍ସ, ଜାପାନ ଓ ସ୍ପେନ୍ର ହଟ୍ଟଚମଟ ଦେଖିବାକୁ ମିଳିବ ।
ଗ୍ରୁପ୍ ଏ’ରେ ଡେବୁ୍ୟଟାଣ୍ଟ ଭାରତ, ମରକ୍କୋ, ବ୍ରାଜିଲ ଓ ୟୁଏସ୍ଏ ରହିଛନ୍ତି । ୨୦୧୭ରେ ପୁରୁଷ ଦଳ ପରେ ଏବେ ଭାରତର ୧୭ ବର୍ଷରୁ କମ୍ ମହିଳା ଦଳ ପ୍ରଥମ ଥର ପାଇଁ ଫିଫା ବିଶ୍ୱକପ୍ରେ ଖେଳିବାକୁ ଯାଉଛି । ଗ୍ରୁପ୍ ବି’ରେ ପ୍ରଶଂସକଙ୍କ ପସନ୍ଦର ଟିମ୍ ଜର୍ମାନୀ ସମେତ ନାଇଜେରିଆ, ଚିଲୀ ଓ ନୁ୍ୟଜିଲାଣ୍ଡ ରହିଛନ୍ତି । ନାଇଜେରିଆ ୫ ଥର ଏହି ଟୁର୍ଣ୍ଣାମେଣ୍ଟ ଖେଳିଥିବା ବେଳେ ୩ ଥର କ ୍ୱାର୍ଟର ଫାଇନାଲକୁ ଯାଇଛି । ନାଇଜେରିଆ ଖେଳାଳିମାନେ ଏହି ପ୍ରତିଯୋଗିତାର ସମସ୍ତ ଗେମ୍ର ୫୦% ମ୍ୟାଚ୍ ଜିତିଛନ୍ତି । ସେହିପରି ଚିଲୀ ୨ୟ ଥର ପାଇଁ ଏହି ଟୁର୍ଣ୍ଣାମେଣ୍ଟ୍ରେ ଭାଗ ନେଉଥିବା ବେଳେ ନୁ୍ୟଜିଲାଣ୍ଡ ଟୁର୍ଣ୍ଣାମେଣ୍ଟ୍ର ଉଦ୍ଘାଟନୀ ସଂସ୍କରଣ ଆୟୋଜନ କରିଥିଲା । ନୁ୍ୟଜିଲାଣ୍ଡ ୨୦୧୮ରେ ବ୍ରୋଞ୍ଜ ମେଡାଲ ମଧ୍ୟ ଜିତିଥିଲା । ଗ୍ରୁପ୍ ସି’ରେ ଡିଫେଣ୍ଡିଙ୍ଗ୍ ଚାମ୍ପିଅନ ସ୍ପେନ୍ ସହିତ ମେକ୍ସିକୋ, କଲମ୍ବିଆ ଓ ଚୀନ୍ ରହିଛନ୍ତି । ଟୁର୍ଣ୍ଣାମେଣ୍ଟ୍ର ଅନ୍ୟତମ ସର୍ବୋତ୍ତମ ଟିମ୍ ସ୍ପେନ୍ ଦୁଇଟି ବ୍ରୋଞ୍ଜ, ଗୋଟିଏ ସିଲ୍ଭର ଓ ଗୋଟିଏ ଗୋଲï ମେଡାଲ ଜିତିଛି । ଏହାଛଡା ମେକ୍ସିକୋ ମଧ୍ୟ ୧୭ ବର୍ଷରୁ କମ୍ ଫିଫା ମହିଳା ବିଶ୍ୱକପ୍ରେ ନିରନ୍ତର ଉନ୍ନତ ପ୍ରଦର୍ଶନ ଦେଖାଇଆସିଛି । ମେକ୍ସିକୋ ୨୦୧୮ରେ ରନର୍-ଅପ୍ ହୋଇଥିଲା । ଦଳ୨୦ଟି ମ୍ୟାଚ୍ରୁ ୮ଟି ଲେଖାଏଁ ବିଜୟ ଓ ପରାଜୟର ସମ୍ମୁଖୀନ ହୋଇଥିଲା ।
କଲମ୍ବିଆ ମୋଟ ୧୨ଟି ମ୍ୟାଚ୍ରୁ କେବଳ ଗୋଟିଏରେ ଜିତିଥିବା ବେଳେ ୪ଟି ଡ୍ର’ ରଖିଥିଲା । ତେବେ ଏହି ଦେଶ ସର୍ବଦା ପ୍ରତିଯୋଗିତାର ଟାଣୁଆ ଗ୍ରୁପ୍ ରେ ରହିଆସିଛି । ଚୀନ୍ ୩ୟ ଥର ପାଇଁ ୧୭ ବର୍ଷରୁ କମ୍ ଫିଫା ମହିଳା ବିଶ୍ୱକପ୍ରେ ଭାଗ ନେବାକୁ ଯାଉଛି । ଚୀନ୍ ମୋଟ ୬ଟିରୁ ୨ଟି ମ୍ୟାଚ ଜିତିଛି । ଅନ୍ୟପକ୍ଷରେ ଗ୍ରୁପ୍’ ଡିରେ ଜାପାନ, ତାଞ୍ଜାନିଆ, କାନାଡା ଓ ଫ୍ରାନ୍ସ ରହିଛନ୍ତି । ଏସିଆନ ଫୁଟ୍ବଲର ପାୱାରହାଉସ୍ ଜାପାନ୍ ସବୁବେଳେ କ ୍ୱାର୍ଟର୍ ଫାଇନାଲରେ ପ୍ରବେଶ କରିଥିବା ବେଳେ ୩ଟି ଫାଇନାଲ ଖେଳିଛି । ୨୦୧୪ରେ ଟାଇଟଲ ଜିତିଥିଲା । ୩୦ଟି ମ୍ୟାଚରୁ ଜାପାନ ୨୨ଟି ଜିତିଥିବା ବେଳେ କେବଳ ୨ଟିରେ ପରାଜିତ ହୋଇଛି । କାନାଡା ଗତ ସଂସ୍କରଣରେ ୪ର୍ଥ ସ୍ଥାନରେ ରହିଥିଲା । ଦଳ ମୋଟ ୨୬ଟି ମ୍ୟାଚରୁ ୯ଟିରେ ବିଜୟୀ ହୋଇଛି । ପୂର୍ବତନ ଚାମ୍ପିଅନ ଫ୍ରାନ୍ସର ପ୍ରତିଯୋଗିତାରେ ୫୦%ର ରେକର୍ଡ ରହିଛି । ଦଳ ୧୭ ବର୍ଷରୁ କମ୍ ଫିଫା ମହିଳା ବିଶ୍ୱକପ୍ର ଦୁଇଟି ସଂସ୍କରଣରେ ବିଜୟୀ ହୋଇଛି । ତାଞ୍ଜାନିଆ ପ୍ରଥମ ଥର ପାଇଁ ଫିଫା ପ୍ରତିଯୋଗିତାରେ ଅଂଶଗ୍ରହଣ କରିବାକୁ ଯାଉଛି ।
ରଙ୍ଗାରଙ୍ଗ କାର୍ଯ୍ୟକ୍ରମ ସହ କଳିଙ୍ଗଷ୍ଟାଡିୟମରେ ବିଶ୍ୱକପ୍ ଉଦ୍ଘାଟନ ହେବ । ଏଥିପାଇଁ ସଜେଇ ହୋଇଛି ଷ୍ଟାଡିୟମରୁ ଆରମ୍ଭ କରି ସାରା ରାଜଧାନୀ । ୧୨ହଜାର କ୍ଷମତା ସମ୍ପନ୍ନ କଳିଙ୍ଗଷ୍ଟାଡିୟମ ଅତି ସୁନ୍ଦର ଭାବେ ସମ୍ବଲପୁରୀ ବସ୍ତ୍ର ରଙ୍ଗରେ ରଙ୍ଗୀନ ହୋଇଛି । ଲାଲ, ସବୁଜ, ଧଳା ପ୍ରିଣ୍ଟ ସିଟ୍ ଗୁଡିକ ନୂଆ ରୂପ ଦିଆଯାଇଛି । ତା ସହ ଭୁବନେଶ୍ୱରର ବିଭିନ୍ନ ଛକରେ ଫୁଟବଲ ଫିଭର ଦେଖିବାକୁ ମିଳିଛି । ପୋଷ୍ଟର ବ୍ୟାନରେ ରାସ୍ତାଘାଟ ଝଲସୁଛି ।
କଳିଙ୍ଗଷ୍ଟାଡିୟମରେ ଆୟୋଜକ ଭାରତ ସମେତ ବ୍ରାଜିଲ, ମରେMା ଏବଂ ଆମେରିକା ଦଳ ମ୍ୟାଚ ଖେଳିବେ । ମଙ୍ଗଳବାର ରାତି ୮ଟାରେ ଭାରତ ଓ ଆମେରିକା ମଧ୍ୟରେ ହାଇଭୋଲଟେଜ ଲଢେଇ ହେବ । କଳିଙ୍ଗରେ ୧୧, ୧୪ ଓ ୧୭ ତାରିଖରେ ମୋଟ ୬ଟି ମ୍ୟାଚ ଖେଳାଯିବ ।
ଚାରିସ୍ତରୀୟ ସୁରକ୍ଷା ବଳୟରେ କଳିଙ୍ଗ
ଫୁଟବଲ ବିଶ୍ୱକପ୍ ପାଇଁ କଳିଙ୍ଗଷ୍ଟାଡିୟମରେ ଚାରିସ୍ତରୀୟ ସୁରକ୍ଷା ବଳୟରେ ରହିବ । ସୋମବାର କଳିଙ୍ଗଷ୍ଟାଡିୟମ ପହଞ୍ଚି ସୁରକ୍ଷା ବ୍ୟବସ୍ଥାର ସମୀକ୍ଷା କରିଥିଲେ ପୋଲିସ କମିଶନର ସୌମେନ୍ଦ୍ର ପି୍ରୟଦର୍ଶୀ । ଭୁବନେଶ୍ୱର ଡିସିପିଙ୍କ ସମେତ ୬ ଅତିରିକ୍ତ ଡିସିପି, ୧୪ଏସ୍ପି, ୩୦ଇନ୍ସ୍ପେକଫର, ୧୦୦ଅଧିକାରୀଙ୍କ ସହ ୧୫ପ୍ଲାଟୁନ୍ ଫୋର୍ସ ମୂତୟନ କରିବେ । ଷ୍ଟାଡିୟମ ଭିତରେ ସାଧା ପୋଷାକରେ ପୋଲିସ ମୁତୟନ ହେବେ ।ପାର୍କିଂ ଆଉ ଟ୍ରାଫିକ୍କୁ ପରିଚାଳନା କରିବା ସହ ଖେଳାଳିଙ୍କ ସୁରକ୍ଷା ପାଇଁ ସମସ୍ତ ପଦକ୍ଷେପ ନିଆଯାଇଛି ।
ଗ୍ରୀନ ଗାରଭେଜ ବ୍ୟବସ୍ଥା
ପରିଷ୍କାର ପରିଚ୍ଛନ୍ନତା ଉପରେ ଭୁବନେଶ୍ୱର ମହାନଗର ନିଗମ (ବିଏମ୍ସି) ଗୁରୁତ୍ୱ ଦେଇଛି । ଷ୍ଟାଡିୟମ ଭିତରେ ଶୁଖିଲା ଓ ଓଦା ଅଳିଆ ପାଇଁ ଗ୍ରୀନ ଗାରଭେଜର ବ୍ୟବସ୍ଥା କରାଯାଇଛି । ଷ୍ଟାଡିୟମର ଭିତର ଓ ବାହାର ସମସ୍ତ ସ୍ଥାନକୁ ପରିଷ୍କାର କରାଯାଇଛି । ଷ୍ଟାଡିୟମ ଭିତରେ ୫୦ଜଣ ସାନିଟାଇଜ ଷ୍ଟାପ୍, ୩ଜଣ ସୁପରଭାଇଜର, ଜଣେ ସିନିୟର ସୁପରଭାଇଜର, ଜଣେ ସହଯୋଗୀ ଓ ଅତିରିକ୍ତ କମିଶନର ନିୟୋଜିତ ରହିବେ ।
ଟିକେଟ କିଣିଲେ ପୂର୍ଣ୍ଣିମା
ଅନ୍ତର୍ଜାତୀୟ ମହିଳା ଆର୍ଥଲେଟ ପୂର୍ଣ୍ଣିମା ହେମ୍ବ୍ରମ୍ କଳିଙ୍ଗଷ୍ଟାଡିୟମରେ ଫିଫା ୧୭ବର୍ଷରୁ କମ୍ ମହିଳା ବିଶ୍ୱକପ୍ର ମ୍ୟାଚଗୁଡିକରେ ଉପସ୍ଥିତ ରହି ଭାରତକୁ ଚିୟର କରିବା ପାଇଁ ଟିକେଟ କିଣିଛନ୍ତି । ପ୍ରଥମ ଥର ଓଡିଶାରେ ଫିଫା ବିଶ୍ୱକପ୍ ଆୟୋଜନ ହେଉଥିବାରୁ ସେ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ।
କଳିଙ୍ଗର ଫୁଟବଲ ସଫଳତା
କଳିଙ୍ଗଷ୍ଟାଡିୟମରେ ସାଫ ୨୦ବର୍ଷରୁ କମ୍ ଚାମ୍ପିଅନ ସିପ୍, ଭାରତୀୟ ମହିଳା ଲିଗ୍, ସୁପର କପ୍, ଭାରତୀୟ ସୁପର ଲିଗ୍, ଓଡିଶା ମହିଳା ଲିଗ୍ ଫୁଟବଲ, ଏଆଇଏଫ୍ଏଫ୍ କୋଚିଂ କାର୍ଯ୍ୟକ୍ରମ ଆଦି ସଫଳତା ପୂର୍ବକ ଆୟୋଜନ ହୋଇସାରିଛି । ପ୍ରଥମ ଥର ପାଇଁ ଫିଫାର ବିଶ୍ୱସ୍ତରୀୟ ପ୍ରତିଯୋଗିତା ୧୭ ବର୍ଷରୁ କମ୍ ମହିଳା ବିଶ୍ୱକପ୍ ଆୟୋଜନ କରିବାର ଅଧିକାର ହାସଲ କରିଛି କଳିଙ୍ଗ ।
Comments are closed.