ଯାଜପୁର : ରଜପର୍ବ ବେଳେ ସାମୁହିକ ଭୋଜି ମନା । ବ୍ୟାପୁଥିବା କଲେରାକୁ ଦୃଷ୍ଟିରେ ରଖି ରଜପର୍ବ ପାଳନ ବେଳେ ଯାଜପୁର ଜିଲ୍ଲାରେ ସାମୁହିକ ଭୋଜିକୁ ବାରଣ କରିବାକୁ ନିର୍ଦେଶ ଦେଇଛନ୍ତି ଜିଲ୍ଲା ପ୍ରଶାସନ I ଘର ରନ୍ଧା ଖାଦ୍ୟ , ଫୁଟା ଓ ଫିଲ୍ଟର ପାଣି ପିଇବାକୁ ଲୋକଙ୍କୁ ପରାମର୍ଶ ଦିଆଯାଇଛି। ନଦୀ, ନାଳ,ପୋଖରୀ ପାଣିରେ ନିତ୍ୟ ବ୍ୟବହାର୍ଯ୍ୟ କାର୍ଯ୍ୟ କରିବାକୁ ଲୋକଙ୍କୁ ମନା କରାଯାଇଛି। ଜିଲ୍ଲାରେ ଝାଡାବାନ୍ତି ଲାଗି ରହିଥିବାରୁ ପ୍ରଶାସନ ପକ୍ଷରୁ ଏଭଳି ସୂଚନା ଜାରି କରାଯାଇଛି।
ସୂଚନାନୁସାରେ , ଗତ ସୋମବାର ଠାରୁ ଯାଜପୁର ଜିଲ୍ଲାରେ ଡାଇରିଆ ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଛି । ରବିବାର ଦିନ ଗାଁରେ ଏକ ବିବାହ ଭୋଜି ଖାଇ ଏଭଳି ପରିସ୍ଥିତ ଉପୁଜିଥିବା କୁହାଯାଉଛି I କଲେରା ରୋଗୀ ଚିହ୍ନଟ ହେବା ପରେ ଭୟରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆସୁନାହାନ୍ତି ବର୍ହିବିଭାଗ ରୋଗୀ । ଏବେ ମୁଖ୍ୟ ଚିକିତ୍ସାଳୟରେ କେବଳ ଡାଇରିଆ ରୋଗୀ ଅଧିକ ମାତ୍ରାରେ ଚିକିତ୍ସିତ ହେଉଛନ୍ତି । ଭୟରେ ଅନ୍ୟ ରୋଗୀମାନେ ଆସୁନାହାନ୍ତି । ଟିକେଟ କେନ୍ଦ୍ର ମଧ୍ୟ ଖାଁ ଖାଁ ଦେଖିବାକୁ ମିଳିଛି ।
ଗତକାଲି ୪୧ ଝାଡ଼ା ନମୁନା ପରୀକ୍ଷାରେ ୮ ଟିରେ କଲେରା ଚିହ୍ନଟ ହୋଇଥିଲା । ଯାଜପୁର ଜିଲ୍ଲାରୁ ଆହୁରି ୨ ଶହ ନମୁନା ଯାଇଛି । ବ୍ୟାସନଗର, ବଡ଼ଚଣା ଓ ଧର୍ମଶାଳା ମେଡିକାଲରେ ଏହି ରୋଗୀ ମାନେ ଚିକିତ୍ସାଧୀନ ଅଛନ୍ତି । ଯାଜପୁର ଜିଲ୍ଲାରେ ଝାଡ଼ାବାନ୍ତି ନେଇ ମୁଖ୍ୟ ଶାସନ ସଚିବ ମନୋଜ ଆହୁଜା ସମୀକ୍ଷା କରିଥିଲେ । ରୋଗ ନିରାକରଣ କାର୍ଯ୍ୟକ୍ରମ ବ୍ୟାପକ କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ ।
ଘରକୁ ଘର ସର୍ଭେ କରି ଆରମ୍ଭରୁ ରୋଗ ଚିହ୍ନଟ କରିବା, ସରକାରୀ ଡାକ୍ତରଖାନାରେ ବେଡ୍ ସଂଖ୍ୟା ବୃଦ୍ଧି, ଉପଯୁକ୍ତ ଚିକିତ୍ସା, ହସ୍ପିଟାଲରେ ଆବଶ୍ୟକ ମେଡିସିନ୍ ଓ ସାଲାଇନ୍ ମହଜୁଦ୍ ରଖିବା ଉପରେ ଗୁରୁତ୍ବାରୋପ କରିଛନ୍ତି ମୁଖ୍ୟ ଶାସନ ସଚିବ ।
Comments are closed.