ଭୁବନେଶ୍ୱର : ସିଏମଓ ନାଁ କହି ଇଞ୍ଜିନିୟରଙ୍କୁ ଠକେଇ । ଅନୁଗୁଳର ଜଣେ ଅଧୀକ୍ଷଣ ଯନ୍ତ୍ରୀଙ୍କ ଠାରୁ ଠକିନେଲେ ଦୁଇ ଲକ୍ଷ ଟଙ୍କା । ଅନୁଗୁଳ ରାସ୍ତା ଓ କୋଠାବାଡି ଡିଭିଜନର ଅଧୀକ୍ଷଣ ଯନ୍ତ୍ରୀ ପ୍ରତାପ ହରିପାଲ ଠକେଇର ଶିକାର ହୋଇଥିବା ଭୁବନେଶ୍ୱର ଏୟାରଫିଲ୍ଡ ଥାନାରେ ଅଭିଯୋଗ ହୋଇଛି । ଠକେଇ କରିଥିବା ଅଭିଯୁକ୍ତ ହେଉଛି ଭୀମଟାଙ୍ଗି ଅଞ୍ଚଳର ଜାନକୀ ବଲ୍ଲଭ ମହାପାତ୍ର ।
ସୂଚନାନୁସାରେ,ପ୍ରାୟ ଏକ ମାସ ତଳେ ପ୍ରତାପ ହରିପାଲଙ୍କ ନିକଟକୁ ସିଏମ ଅଫିସରୁ ଫୋନ ଆସିଛି କହି ଫୋନ କରିଥିଲେ ଜାନକୀ ବଲ୍ଲଭ । ନିଜକୁ ସିଏମଓ ଅଫିସର ପରିଚୟ ଦେବା ସହିତ ୨ଲକ୍ଷ ଟଙ୍କା ନଦେଲେ ମାଲକାନଗିରି ଜିଲ୍ଲାକୁ ପଠାଇ ଦେବାକୁ ଧମକ ଦେଇଥିଲେ । ସଂପୃକ୍ତ ବ୍ୟକ୍ତିଙ୍କ କଥାରେ ରାଜି ହୋଇ ପ୍ରତାପ,ଜାନକୀଙ୍କ ଭୀମଟାଙ୍ଗି ସ୍ଥିତ ଘରକୁ ଆସି ୨ ଲକ୍ଷ ଟଙ୍କା ଦେଇଥିଲେ । ଏହାପରେ କିଛି ଦିନ ପରେ ସଂପୃକ୍ତ ବ୍ୟକ୍ତି ଜଣଙ୍କ ପୁନଃର୍ବାର ୫ ଲକ୍ଷ ତାଙ୍କ ମାଗିଥିଲେ । ତେବେ ଏତେ ଟଙ୍କା ଦେବାକୁ ପ୍ରତାପ ମନା କରିଥିଲେ । ଏଥିରେ ପ୍ରତାପ ଅରାଜି ହେବାରୁ ଗାଳିଗୁଲଜ କରିବା ସହ ଜୀବନରୁ ମାରିଦେବାକୁ ଧମକ ଦେଇଥିଲେ ଜାନକୀ ବଲ୍ଲଭ । ଶେଷରେ ପ୍ରତାପ ଜୁନ ୩ ତାରିଖ ଦିନ ଏୟାରଫିଲ୍ଡ ଥାନାରେ ଅଭିଯୋଗ କରିଛନ୍ତି । ଘଟଣା ସମ୍ପର୍କରେ ମାମଲା ରୁଜୁ ହୋଇଥିବା ବେଳେ ପୁଲିସ ତଦନ୍ତ ଆରମ୍ଭ କରିଛି ।
Comments are closed.