ଆଠଗଡ଼ : ଆଠଗଡ଼ ବନଖଣ୍ଡ ଅଧିନସ୍ଥ ବଡ଼ମ୍ବା ଅଞ୍ଚଳରେ ହାତୀ ଶିକାର ଓ ଦାନ୍ତ ଚୋରି ଅଭିଯୋଗରେ ବନ ବିଭାଗ ୪ ଜଣଙ୍କୁ ଉଠାଇ ନେଇଥିଲା। ବନବିଭାଗ ହେପାଜତରେ ରହି ଏମାନଙ୍କ ମଧ୍ୟରୁ ଜଣେ ଅଭିଯୁକ୍ତର ମୃତ୍ୟୁ ଘଟିଥିଲା I ମୃତକ ଜଣକ ହେଲେ ବଡମ୍ବା ବ୍ଲକ ବଡବାରସିଂହ ଗ୍ରାମ ପଞ୍ଚାୟତ ସାତଗୋଛିଆ ଗାଁର ଧନେଶ୍ୱର ବେହେରା (୫୯)I ତାଙ୍କ ସହିତ ଅନ୍ୟ ୩ ଅଭିଯୁକ୍ତ ହେଲେ ବକଳବାଡ଼ିଆ ଗାଁର ରାଜକିଶୋର ପ୍ରଧାନ,ବିରଞ୍ଜି ଜାନି ଓ ରାଜୀବ ସ୍ୱାଇଁ । ହାତୀ ଶିକାର ଓ ଦାନ୍ତ ଚୋରି ଅଭିଯୋଗରେ ଗତ ରବିବାର ଦିନ ଉଠାଇ ନେଇଥିଲା କଟକ ଜିଲ୍ଲା ଆଠଗଡ଼ ବନ ବିଭାଗ I
ସୂଚନା ଅନୁଯାୟୀ, କିଛି ଦିନ ତଳେ ବଡ଼ମ୍ବା ଏବଂ ହିନ୍ଦୋଳ ସଂରକ୍ଷିତ ଜଙ୍ଗଲର ସୀମାବର୍ତ୍ତୀ ଅଞ୍ଚଳରୁ ଏକ ଗଳିତ ଗୁଳିବିଦ୍ଧ ଦନ୍ତା ହାତୀର ମୃତଦେହ ଉଦ୍ଧାର କରାଯାଇଥିଲା। ଏହି ମାମଲାରେ ବନ ବିଭାଗ ଅନୁସନ୍ଧାନ କରି ଗତ ରବିବାର ଦିନ ୪ଜଣଙ୍କୁ ଉଠାଇ ଆଣି ଅଟକ ରଖିଥିଲା। କିନ୍ତୁ ରେଞ୍ଜରଙ୍କ ହେପାଜତରେ ଥିବା ଧନେଶ୍ୱର ବେହେରା ନାମକ ଜଣେ ଅଭିଯୁକ୍ତଙ୍କର ସନ୍ଦେହଜନକ ମୃତ୍ୟୁ ହୋଇଥିଲା। ତେବେ ଏହି ଘଟଣାରେ ଖୁଲାସା କରିଛନ୍ତି ଅନ୍ୟଜଣେ ଅଭିଯୁକ୍ତ ରାଜକିଶୋର ପ୍ରଧାନ । ହାତୀ ଶିକାର ଓ ଦାନ୍ତ ଚୋରି ଅଭିଯୋଗରେ ବନ ବିଭାଗ ରାଜକିଶୋର ପ୍ରଧାନଙ୍କୁ ମଧ୍ୟ ଉଠାଇ ନେଇଥିବା ବେଳେ ମୁକୁଳିବା ପରେ ସେହି ରାତିର ଘଟଣା ବିଷୟରେ ବର୍ଣ୍ଣନା କରିଛନ୍ତି I
ରାଜକିଶୋରଙ୍କ କହିବାନୁଯାୟୀ, ରବିବାର ସକାଳେ ତାଙ୍କୁ ନିଜ ଘରୁ ଓ ଧନେଶ୍ୱରକୁ ତାଙ୍କ ଝିଅ ଘରୁ ଉଠାଇ ନେଇଥିଲେ ବନ ବିଭାଗ କର୍ମଚାରୀ । ଏହାପରେ ଅନ୍ୟ ଦୁଇ ଅଭିଯୁକ୍ତଙ୍କୁ ମଧ୍ୟ ଉଠାଇ ଆଣିଥିଲେ I ସମସ୍ତଙ୍କୁ ପ୍ରଥମେ ନେଇ ହରିଡ଼ାପଶି ଜଙ୍ଗଲରେ ଥିବା ବିଟ୍ ରେ ରଖି ମାଡ଼ ମରାଯାଇଥିଲା । ଚିତ୍କାର କଲେ ବି କେହି ଶୁଣିଲେନି। ହାତ ଫାଟିଗଲା ପରେ ବି ହାତକୁ ବୁଟ୍ରେ କୁଦିଲେ । ନିର୍ଯାତନା ସହି ନ ପାରି ମୁଁ ଅଚେତ ହୋଇ ପଡ଼ିଲି। ମୁହଁରେ ପାଣି ମାରି ଖୁଣ୍ଟୁଣୀ ଜଙ୍ଗଲକୁ ନେଇ ପଳାଇଲେ। ଦୀର୍ଘ ୮ ଘଣ୍ଟା ଧରି ଅମାନୁଷିକ ଭାବେ ଅତ୍ୟାଚାର କରିଥିଲେ। ୩ ଜଣକୁ ଗୋଟିଏ ଜାଗାରେ ରଖି ଏମିତି ବାଡେଇ ଥିଲେ ଯେ ସେଥିରେ ୪ଟି ବାଡ଼ି ଭାଙ୍ଗି ଯାଇଥିଲା । ବନ କର୍ମଚାରୀ ଓ ଅଧିକାରୀମାନଙ୍କ ପ୍ରବଳ ମାଡ଼ରେ ଧନେଶ୍ୱରର ମୃତ୍ୟୁ ହୋଇଥିବା ସେ କହିଛନ୍ତି I ରାଜ କିଶୋର କହିଛନ୍ତି କି ଆମ ଆଖି ଆଗରେ ତାକୁ ପିଟି ପିଟି ମାରିଦେଲେ। ଏହାପରେ ତାକୁ ପକାଇ ଦେଇ ଆମକୁ ନେଇ ତା’ ଘରକୁ ରେଡ କରିବାକୁ ଗଲେ । ତା’ ଘରେ କିଛି କହିଲେ ଆମକୁ ବି ମାରିଦେବାକୁ ଧମକ ଦେଲେ। ତେଣୁ ସେ ମରିଛି ବୋଲି ବି ଆମେ ତା’ ଘରେ କହିପାରିଲୁନି। ତା’ ଘରୁ କିଛି ନ ବାହାରିବାରୁ ଆମକୁ ଧରି ପଳାଇ ଆସିଲେ।
ଏହାପରେ ଧନେଶ୍ୱରକୁ ତିଗିରିଆ ମେଡିକାଲ ନେଇଗଲେ। ସେଠାରେ ଡାକ୍ତର ତାକୁ ମୃତ ଘୋଷଣା କରିବାରୁ ବନ କର୍ମଚାରୀ ମୃତଦେହ ଛାଡ଼ିକି ପଳେଇଲେ। ପୁଲିସ୍ ଖବର ପାଇ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ ପଠାଇବା ସହ ବନ କର୍ମଚାରୀଙ୍କୁ ଅଟକ ରଖି ପଚାରାଉଚରା କରୁଛି।
ଧନେଶ୍ୱର ମୃତ୍ୟୁ ଖବର ପ୍ରଚାରିତ ହେବା ପରେ ଗାଁ ଲୋକେ ତାତିଲେ। ଗତକାଲି ଶହ ଶହ ଉତ୍ତ୍ୟକ୍ତ ଲୋକେ ସ୍ଥାନୀୟ ବାଣପୁର ବିଟ୍ ହାଉସକୁ ଯାଇ ସେଠାରେ ଭଙ୍ଗାରୁଜା କରିବା ସହ ଘରେ ନିଆଁ ଲଗାଇ ଦେଇଥିଲେ I ସ୍ଥାନୀୟ ପ୍ରଶାସନ ୫ ଲକ୍ଷ ଟଙ୍କାର କ୍ଷତିପୂରଣ ସହ ପରିବାରରୁ ଜଣକୁ ଚାକିରି ଓ ଦାୟୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ଲାଗି ପ୍ରତିଶ୍ରୁତି ଦେବା ପରେ ରାସ୍ତାରୋକ ହଟିବା ସହ ଲୋକଙ୍କ ରାଗ ପ୍ରଶମିତ ହୋଇଥିଲା।
ଅପରପକ୍ଷରେ ଗୋଟିଏ ପରେ ଗୋଟିଏ ଏଭଳି ବାରମ୍ବାର ଦନ୍ତା ଶିକାରକୁ ନେଇ ବଡ଼ମ୍ବା,ନରସିଂହପୁର ତଥା ଆଠଗଡ଼ ବନଖଣ୍ତ ଚର୍ଚ୍ଚାରେ ରହୁଥିବା ବେଳେ ଏବେ ଛୋଟ ଦନ୍ତାହାତୀ ଶିକାର ଘଟଣା ବିଭାଗ ପାଇଁ ସମସ୍ୟା ବଢାଇଛି। ବଡମ୍ବାରେ ହାତୀମୃତ୍ୟୁ ଘଟଣା ଜଣାପଡିବା ପରେ ବନବିଭାଗ ଉଚ୍ଚ ଅଧିକାରୀଙ୍କ ପ୍ରତିକ୍ରିୟା ରଖୁନାହାନ୍ତି।
ଏହି ଘଟଣାରେ ଏଯାବତ ୧୪ ଜଣ ବନ ବିଭାଗ ଅଧିକାରୀ ଓ କର୍ମଚାରୀ ଅଟକ ରହିଥିବା ଜଣାଯାଇଛି। ଅଭିଯୁକ୍ତ ଡିଏଫଓ, ରେଞ୍ଜର, ଏସିଏଫଙ୍କ ନାଁରେ ୩୦୨ ଦଫାରେ ମାମଲା ରୁଜୁ ହୋଇଥିବା ସୂଚନା ଦେଇଛନ୍ତି କଟକ ଗ୍ରାମାଞ୍ଚଳ ଏସପି।
Comments are closed.