ଦ୍ରୌପଦୀ ମୁର୍ମୁଙ୍କ ଜିତିବା ନେଇ ଚାଲିଛି କଳ୍ପନା ଜଳ୍ପନା

ଭୁବନେଶ୍ୱର: ଜୁନ୍‌ ୨୨: ଓଡିଶାର ଜଣେ ସାଧାରଣ ଆଦିବାସୀ ମହିଳାଙ୍କୁ ରାଷ୍ଟ୍ରପତି ପ୍ରାର୍ଥୀ ଘୋଷଣା କରି ସମସ୍ତଙ୍କୁ ଚକିତ କରିଛି ଏନଡିଏ । ବର୍ତ୍ତମାନ ସୁଦ୍ଧା ସଂଖ୍ୟା ଗଣତି ଦୃଷ୍ଟିରୁ ଏନଡିଏ ପ୍ରାର୍ଥୀଙ୍କ ପଲା ଭାରି ରହିଛି । ଦେଶର ପ୍ରଥମ ଆଦିବାସୀ ମହିଳା ଭାବେ ମୁର୍ମୁ ଭାରତର ସର୍ବୋଚ୍ଚ ପଦବୀରେ ଆସୀନ ହେବାର ସମ୍ଭାବନା ଅଧିକ ରହିଛି । ଶିକ୍ଷୟିତ୍ରୀରୁ ରାଜନୀତି । ବିଧାୟିକାରୁ ମନ୍ତ୍ରୀ । ମନ୍ତ୍ରୀରୁ ରାଜ୍ୟପାଳ । ଆଉ ଏବେ ରାଜ୍ୟପାଳରୁ ରାଷ୍ଟ୍ରପତି ପ୍ରାର୍ଥୀ । ମୟୂରଭଞ୍ଜର ରାଇରଙ୍ଗପୁର ଅନ୍ତର୍ଗତ ବାଲଦାପୋଷି ଅଂଞ୍ଚଳର ଦ୍ରୌପଦୀ ମୁର୍ମୁ ଶିକ୍ଷକତା ଛାଡ଼ି ୧୯୯୭ ମସିହାରେ ରାଜନୀତିରେ ପ୍ରବେଶ କରିଥିଲେ । ବିଏ ପାସ୍‌ କରିଥିବା ମୁର୍ମୁ ରାଇରଙ୍ଗପୁର ଏନଏସି ଉପାଧ୍ୟକ୍ଷା ଭାବେ ନିଜର ରାଜନୈତିକ କ୍ୟାରିୟର ଆରମ୍ଭ କରିଥିଲେ । ୨୦୦୦ରୁ ୨୦୦୪ ମସିହା ପର୍ଯ୍ୟନ୍ତ ଓଡ଼ିଶାରେ ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ଓ ବିଜେପି ମେଣ୍ଟ ସରକାରରେ ମୁର୍ମୁ ବାଣିଜ୍ୟ ଓ ପରିବହନ, ମତ୍ସ୍ୟ ଓ ପଶୁସମ୍ପଦ ମନ୍ତ୍ରୀ ଭାବେ କାର୍ଯ୍ୟ କରିଥିଲେ । ରାଇରଙ୍ଗପୁର ଆସନରୁ ସେ ୨୦୦୯ ମସିହା ପର୍ଯ୍ୟନ୍ତ ଓଡ଼ିଶା ବିଧାନସଭା ସଦସ୍ୟ ଥିଲେ । ସାନ୍ତାଳୀ ବନବାସୀ ସମୁଦାୟର ମହିଳା ଦ୍ରୌପଦୀ ମୁର୍ମୁଙ୍କୁ ୨୦୧୫ରେ ଝାଡ଼ଖଣ୍ଡର ପ୍ରଥମ ମହିଳା ରାଜ୍ୟପାଳ ହୋଇଥିଲେ । ଝାଡଖଣ୍ଡର ପ୍ରଥମ ରାଜ୍ୟପାଳ ଭାବେ ସେ ୫ ବର୍ଷ ଦାୟିତ୍ୱ ତୁଲାଇଥିଲେ । ୨୦୨୧ରେ କାର୍ଯ୍ୟକାଳ ସରିବା ପରେ ଓଡିଶା ଫେରିଥିଲେ । ଏହାପରଠୁ ପରବର୍ତ୍ତୀ ରାଷ୍ଟ୍ରପତି ପ୍ରାର୍ଥୀ ପାଇଁ ତାଙ୍କ ନାଁ ଚର୍ଚ୍ଚାରେ ରହିଥିଲା । ଏବେ ଦ୍ରୌପଦୀ ମୁର୍ମୁଙ୍କ ନାଁ ଘୋଷଣା କରି ବିଜେପି ସଂଖ୍ୟା ଖେଳକୁ ନିଜ ସପକ୍ଷରେ କରିଥିବା ଚର୍ଚ୍ଚା ହେଉଛି । ରାଜ୍ୟର ବିଜେଡି ଏବଂ ଆନ୍ଧ୍ରପ୍ରଦେଶର ୱାଇଏସଆର କଂଗ୍ରେସ ମଧ୍ୟ ଏନଡିଏନ ପ୍ରାର୍ଥୀଙ୍କୁ ସମର୍ଥନ କରିପାରେ ବୋଲି ବିଶେଷଜ୍ଞ ମତ ଦେଇଛନ୍ତି । ପୂର୍ବତନ ରାଷ୍ଟ୍ରପତି ଭି.ଭି.ଗିରିଙ୍କ ସମ୍ପର୍କ ଯଦିଓ ଓଡିଶା ସହ ରହିଥିଲା କି;ୁ ସେ ଅଣ ଓଡିଆ ଥିଲେ । ତେବେ ଦ୍ରୌପଦୀ ମୁର୍ମୁ ଯଦି ରାଷ୍ଟ୍ରପତି ନିର୍ବାଚନରେ ବିଜୟୀ ହୁଅନ୍ତି ତେବେ ସେ ପ୍ରଥମ ଓଡିଆ ରାଷ୍ଟ୍ରପତି ହେବେ ।