ପିନାକୀ ମିଶ୍ର ଏବଂ ମହୁଆ ମୈତ୍ରଙ୍କ ବିବାହକୁ ନେଇ ଚର୍ଚ୍ଚା

ଭୁବନେଶ୍ୱର : ହାତକୁ ଦି ହାତ ହେଲେ ଦୁଇ ରାଜନେତା । ଟିଏମସି ସାଂସଦ ମହୁଆ ମୈତ୍ରଙ୍କୁ ଗୁପ୍ତରେ ବିବାହ କଲେ ପୂର୍ବତନ ବିଜେଡି ସାଂସଦ ପିନାକୀ ମିଶ୍ର। ଉଭୟ ନେତା ଜର୍ମାନୀରେ ବିବାହ କରିଥିବା ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି । ଏହି ବିବାହ ଉତ୍ସବ ମେ ମାସ ୩ ତାରିଖ ୨୦୨୫ ରେ ହୋଇଥିଲା। ଜାତୀୟ ଗଣମାଧ୍ୟମ ଦି ଟେଲିଗ୍ରାଫରେ ତାଙ୍କ ବିବାହର ଏକ ଫଟୋ ମଧ୍ୟ ପ୍ରକାଶ ପାଇଛି। ବ୍ୟାକଗ୍ରାଉଣ୍ଡରେ ବର୍ଲିନର ଐତିହାସିକ ବ୍ରାଣ୍ଡେନବର୍ଗ ଗେଟ୍ ମଧ୍ୟ ଦୃଶ୍ୟମାନ ହେଉଛି। ଏହି ଫଟୋରେ ମହୁଆ ମୈତ୍ର ଶାଢ଼ୀ ଏବଂ ସୁନା ଅଳଙ୍କାର ପିନ୍ଧି ପିନାକୀ ମିଶ୍ରଙ୍କ ହାତ ଧରି ଚାଲୁଥିବା ଦେଖାଯାଇଛି ।

ପୂର୍ବତନ ସାଂସଦ ପିନାକୀ ମିଶ୍ରଙ୍କୁ ଏବେ ୬୫ ବର୍ଷ ହୋଇଥିବାବେଳେ ମହୁଆ ମୈତ୍ରଙ୍କୁ ୫୦ ବର୍ଷ । ଉଭୟଙ୍କର ଏହା ଦ୍ୱିତୀୟ ବିବାହ । ମହୁଆ ମୈତ୍ର ପୂର୍ବରୁ ଡେନିସ୍ ଫାଇନାନ୍ସର୍ ଲାର୍ସ ବ୍ରୋର୍ସନଙ୍କୁ ବିବାହ କରିଥିଲେ, ଯାହାଙ୍କୁ ସେ ଛାଡପତ୍ର ଦେଇଥିଲେ । ସେହିପରି ପିନାକୀ ମିଶ୍ର ପୂର୍ବରୁ ଶ୍ରୀମତି ସଙ୍ଗୀତା ମିଶ୍ରଙ୍କୁ ବିବାହ କରିଥିବାବେଳେ ତାଙ୍କର ଗୋଟିଏ ପୁଅ ଓ ଝିଅ ମଧ୍ୟ ରହିଛି । ତେବେ ହଠାତ୍ ଦୁହିଁଙ୍କ(ପିନାକୀ ମିଶ୍ର ଓ ମହୁଆ ମୈତ୍ର)ର ବିବାହ ଫଟୋ ସାମନାକୁ ଆସିବା ପରେ ଚର୍ଚ୍ଚା ଜୋର ଧରିଛି ।

ସୂଚନାନୁସାରେ,୧୨ ଅକ୍ଟୋବର ୧୯୭୪ରେ ଆସାମରେ ଜନ୍ମଗ୍ରହଣ କରିଥିବା ମହୁଆ ମୈତ୍ର ଜଣେ ନିବେଶକ ଭାବରେ ତାଙ୍କର କ୍ୟାରିଅର ଆରମ୍ଭ କରିଥିଲେ। ପରେ ୨୦୧୦ରେ ମମତା ବାନାର୍ଜୀଙ୍କ ଦଳରେ ଯୋଗ ଦେଇଥିଲେ। ସେ ୨୦୧୯ରେ ପଶ୍ଚିମବଙ୍ଗର କୃଷ୍ଣନଗର ନିର୍ବାଚନମଣ୍ଡଳୀରୁ ଲୋକସଭାକୁ ନିର୍ବାଚିତ ହୋଇଥିଲେ।

ସେହିପରି ପିନାକୀ ମିଶ୍ର ୨୩ ଅକ୍ଟୋବର ୧୯୫୯ରେ ଓଡ଼ିଶାର ପୁରୀରେ ଜନ୍ମଗ୍ରହଣ କରିଥିଲେ। ସେ ଜଣେ ବିଶିଷ୍ଟ ରାଜନେତା ଏବଂ ବରିଷ୍ଠ ଓକିଲ। ସେ ସେଣ୍ଟ ଷ୍ଟିଫେନ୍ସ କଲେଜରୁ ଇତିହାସରେ ବିଏ (ସମ୍ମାନ) ଏବଂ ଦିଲ୍ଲୀ ଆଇନ ବିଶ୍ୱବିଦ୍ୟାଳୟରୁ ଏଲଏଲବି ଡିଗ୍ରୀ ମଧ୍ୟ ହାସଲ କରିଥିଲେ। ୧୯୯୬ ମସିହାରେ ପୁରୀ ଲୋକସଭା ଆସନରୁ ବିଜୟୀ ହୋଇ କଂଗ୍ରେସ ଦଳରୁ ତାଙ୍କର ରାଜନୈତିକ କ୍ୟାରିଅର ଆରମ୍ଭ କରିଥିଲେ । ପରେ ସେ ବିଜୁ ଜନତା ଦଳରେ ଯୋଗ ଦେଇ ୨୦୦୯, ୨୦୧୪ ଏବଂ ୨୦୧୯ରେ ସାଂସଦ ନିର୍ବାଚିତ ହୋଇଥିଲେ।

ଅନ୍ୟପଟେ ୨୦୨୩ରେ Cash for question ବା ପ୍ରଶ୍ନ ପାଇଁ ଟଙ୍କା ମାମଲାରେ ମହୁଆ ମୌତ୍ରାଙ୍କ ଲୋକସଭାରୁ ନିଲମ୍ବିତ କରାଯାଇଥିଲା। ମୁମ୍ବାଇର ଶିଳ୍ପପତି ଦର୍ଶନ ହୀରାନନ୍ଦାନୀଙ୍କଠୁ ଲାଞ୍ଚ ନେଇ ଆଦାନୀ ଗ୍ରୁପ୍ ଓ ମୋଦି ସରକାରଙ୍କୁ ବଦନାମ ପାଇଁ ମହୁଆ ଷଡ଼ଯନ୍ତ୍ର ରଚିଥିବା ଅଭିଯୋଗ ହୋଇଥିଲା। ଏପରିକି ହୀରାନନ୍ଦାନୀଙ୍କୁ ଲୋକସଭା ୱେବସାଇଟର ଗୋପନୀୟ ଲଗଇନ୍ ଡିଟଲ ମଧ୍ୟ ମହୁଆ ସମର୍ପି ଦେଇଥିବା ନେଇ ଆସିଥିଲା ଅଭିଯୋଗ। ମହୁଆଙ୍କୁ ଏଥିରେ ପୂର୍ବତନ ସାଂସଦ ପିନାକୀ ମିଶ୍ର ସହଯୋଗ କରିଥିବା ଅଭିଯୋଗ ହୋଇଥିଲା।