ନୂଆଦିଲ୍ଲୀ : କେନ୍ଦ୍ରର ନିଷେଧାଜ୍ଞା ସତ୍ତ୍ବେ କେରଳ ପ୍ରଦେଶ କଂଗ୍ରେସ କମିଟି (କେପିସିସି) ଗୁରୁବାର ବିବିସି ପ୍ରସ୍ତୁତ ବିବାଦୀୟ ଡକ୍ୟୁମେଣ୍ଟାରୀ – “‘ଇଣ୍ଡିଆ: ଦି ମୋଦୀ କ୍ବେଶ୍ଚନ୍’ ” କେରଳ ର ରାଜଧାନୀ ତିରୁବନନ୍ତପୁରମ୍ ଅନ୍ତର୍ଗତ ଶଙ୍ଘୁମୁଘାମ୍ ବେଳାଭୂମିରେ ସ୍କ୍ରିନ କରିଛି ।
ଏହି ବିବାଦୀୟ ଡକ୍ୟୁମେଣ୍ଟାରୀ ସିନେମାଟି ୨୦୦୨ ଗୁଜୁରାଟ ଦଙ୍ଗା ଉପରେ ତିଆରି ହୋଇଛି I ଘଟି ଯାଇଥିବା ଦଙ୍ଗା ଓ ତା’ପରବର୍ତ୍ତୀ ସ୍ଥିତି ପାଇଁ ପ୍ରଧାନ ମନ୍ତ୍ରୀ ମୋଦିଙ୍କୁ ଦାୟୀ କରାଯାଇଛି I ସେତେବେଳେ ଗୁଜୁରାଟ ରେ ମୁଖ୍ୟମନ୍ତ୍ରୀ ଥିବା ମୋଦିଙ୍କୁ ଏଥିରେ ମୁଖ୍ୟ ଖଳନାୟକ ଭାବରେ ଚିତ୍ରଣ କରାଯାଇଛି I ଏହି ଫିଲ୍ମରେ ମୋଦିଙ୍କ ବିରୋଧରେ ଅପପ୍ରଚାର କରାଯାଇଥିବା ବିଜେପି ପକ୍ଷରୁ ଅଭିଯୋଗ କରାଯାଇଛି।
ଦୁଇ ଭାଗର ଏହି ‘ବିବିସି ଡକ୍ୟୁମେଣ୍ଟାରି’ ୨୦୦୨ ଗୁଜରାଟ ଦଙ୍ଗାର କେତେକ ଦିଗ ଉପରେ କରାଯାଇଥିବା ତଦନ୍ତ ଆଧାରିତ ବୋଲି ‘ବିବିସି’ ଦାବି କରୁଥିବା ବେଳେ ଭାରତର ବୈଦେଶିକ ବ୍ୟାପାର ମନ୍ତ୍ରାଳୟ ଏହାକୁ ପ୍ରଚାରସର୍ବସ୍ୱ ଓ ଉପନିବେଶୀୟ ମନୋଭାବସମ୍ପନ୍ନ କହି ତୀବ୍ର ସମାଲୋଚନା କରିଛି।‘କେରଳ ପ୍ରଦେଶ କଂଗ୍ରେସ କମିଟି’ର ସାଧାରଣ ସମ୍ପାଦକ ଜି. ଏସ୍. ବାବୁ କହିଛନ୍ତି, ଏହାକୁ ପ୍ରଦର୍ଶିତ କରି ଆମେ ସର୍ବସାଧାରଣଙ୍କଠାରୁ ସକାରାତ୍ମକ ପ୍ରତିକ୍ରିୟା ପାଇଛୁ। ଏହି ଡକ୍ୟୁମେଣ୍ଟାରି ଦେଖିବା ଲାଗି ଅନେକ ଲୋକ ଆସିଥିଲେ। ସକାରାତ୍ମକ ପ୍ରତିକ୍ରିୟା ପାଇଥିବାରୁ ଏହାକୁ ଆମେ ସମଗ୍ର ରାଜ୍ୟର କେତେକ ସ୍ଥାନରେ ପ୍ରଦର୍ଶନ କରାଇବାର ବ୍ୟବସ୍ଥା କରିବୁ।
Comments are closed.