ନବରଙ୍ଗପୁର : ସାମ୍ବାଦିକଙ୍କୁ ଆକ୍ରମଣ ଓ ମହିଳାଙ୍କୁ ଅସଦାଚରଣ କରିବା ମହଙ୍ଗା ପଡ଼ିଲା । ଶେଷରେ ବଦଳିଲେ ନବରଙ୍ଗପୁର ଅତିରିକ୍ତ ଏସପି ଜୟକୃଷ୍ଣ ବେହେରା । କଟକ କମ୍ୟୁନିକେସନ ଏଏସପି ଭାବେ ବଦଳି ଆଦେଶନାମା ଜାରି କଲେ ରାଜ୍ୟ ଓଡିଶା ପୁଲିସ ଡିଜି ।
ସୂଚନା ଅନୁଯାୟୀ, ବରଗଡ଼ର ଜଣେ ଯୁବତୀଙ୍କର ପାପଡ଼ାହାଣ୍ଡି ବ୍ଲକର ଜଣେ ଯୁବକଙ୍କ ସହ ପ୍ରେମ ସମ୍ପର୍କ ଥିବା ବେଳେ ସେ ନିଜ ଘରୁ ପଳାଇଥିଲେ । ଏନେଇ ଯୁବତୀଙ୍କ ମା’ବାପା ଝିଅ ନିଖୋଜ ନେଇ ବରଗଡ଼ ଥାନାରେ ମାମଲା ରୁଜୁ କରିଥିଲେ । ବରଗଡ଼ ପୁଲିସ୍ ଏ ନେଇ ନବରଙ୍ଗପୁର ପୁଲିସ୍ ସହ ଯୋଗାଯୋଗ କରିଥିଲା । ଏହାପରେ ଘଟଣାର ତଦନ୍ତ କରି ନବରଙ୍ଗପୁର ଅତିରିକ୍ତ ଏସପି ଜୟକୃଷ୍ଣ ବେହେରାଙ୍କ ନେତୃତ୍ୱରେ ଏକ ଟିମ୍ ଗତ ୧୪ ତାରିଖରେ ପାପଡ଼ାହାଣ୍ଡିସ୍ଥିତ ଯୁବକଙ୍କ ଘରେ ପଶିଥିଲେ । ଏହାପରେ ଉଭୟ ଯୁବକ ଓ ଯୁବତୀଙ୍କ ଜୋରଜବରଦସ୍ତ ଥାନାକୁ ନେବାକୁ ଚେଷ୍ଟା କରିଥିଲେ । ଯୁବତୀଜଣକ ସାବାଳିକା ହୋଇଥିବାରୁ ଯିବାରୁ ଅମଙ୍ଗ ହୋଇଥିଲେ । ମାତ୍ର ପୁଲିସ୍ ଅଧିକାରୀ ତାଙ୍କୁ ଜବରଦସ୍ତି ଭାବେ ଥାନା ଗାଡ଼ିରେ ବସାଇ ନେଇଥିଲେ । ଏହାକୁ ଯୁବକଙ୍କ ପରିବାରର ମହିଳାମାନେ ବାରଣ କରିବାରୁ ସେମାନଙ୍କୁ ଅସଦାଚରଣ କରିଥିଲେ ଏଏସପି ଶ୍ରୀ ବେହେରା । ଏହି ସମୟରେ ସେଠାରେ ଗଣମାଧ୍ୟମ ପ୍ରତିନିଧି ପହଞ୍ଚି ଯୁବତୀଜଣକ ସାବାଳିକା ହୋଇଥିବାରୁ ତାଙ୍କୁ କାହିଁକି ନେଉଛନ୍ତି ବୋଲି ପଚାରିଥିଲେ । ଏଥିରେ ଉତ୍୍ଷିପ୍ତ ହୋଇ ଏଏସପି ଏକ ପ୍ଲାଷ୍ଟିକ ପାଇପ୍ ରେ ଗଣମାଧ୍ୟମ ପ୍ରତିନିଧୀଙ୍କୁ ପ୍ରବଳ ପିଟିଥିଲେ ।
ଏଏସପି ଶ୍ରୀ ବେହେରାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ପାପଡାହାଣ୍ଡି ଥାନା ସମ୍ମୁଖରେ ଧାରଣା ଦେଇଥିଲେ । ପରେ ଅତିରିକ୍ତ ଜିଲ୍ଲାପାଳ ଭାସ୍କର ରଇତ ଘଟଣାସ୍ଥଳକୁ ଆସି ଧାରଣାରତ ସାମ୍ବାଦିକମାନଙ୍କ ସହ ଆଲୋଚନା କରି ୧୦ ଦିନରେ କାର୍ଯ୍ୟନୁଷ୍ଠାନ ନେଇ ପ୍ରତିଶ୍ରୁତି ଦେବା ପରେ ଧାରଣାରୁ ଓହରିଥିଲେ ସାମ୍ବାଦିକ । ଜିଲ୍ଲା ସାମ୍ବାଦିକ ୟୁନିୟନ ତରଫରୁ ସପ୍ତାହକ ମଧ୍ୟରେ ଏଏସପିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ପ୍ରତି ବ୍ଲକର ବିଡିଓଙ୍କ ମାଧ୍ୟମରେ ମୁଖ୍ୟମନ୍ତ୍ରୀ ଓ ପୁଲିସ ଡିଜିଙ୍କୁ ଦାବିପତ୍ର ପ୍ରେରଣ କରାଯାଇଥିଲା । ଗୁରୁବାର ଏଏସପିଙ୍କ ବଦଳି ନେଇ ସରକାର ନିର୍ଦ୍ଦେଶନାମା ଜାରି କରିଛନ୍ତି । ପ୍ରାୟ ୧୫ ଦିନ ତଳେ ଉମରକୋଟରେ ଶ୍ମଶାନ ବିବାଦକୁ ନେଇ ବୟସ୍କଙ୍କ ଉପରେ ଲାଠି ଚାର୍ଜ କରିଥିଲେ ବିବାଦୀୟ ଶ୍ରୀ ବେହେରା । ଏହାକୁ ନେଇ ଲୋକେ ଉତ୍ଷିପ୍ତ ହୋଇ ପଡ଼ିଥିଲେ । ଏବେ ସାମ୍ବାଦିକଙ୍କୁ ଆକ୍ରମଣ ତାଙ୍କୁ ମହଙ୍ଗା ପଡ଼ିଛି ।
Comments are closed.