ଫେରୁଛନ୍ତି ତୁଳସୀ

୨୫ ବର୍ଷ ପରେ ପୁଣି ଦେଖିବାକୁ ମିଳିବେ ସମସ୍ତଙ୍କର ପ୍ରିୟ ଚରିତ୍ର ତୁଳସୀ । କ୍ୟୁଁ କି ସାସ୍‌ ଭି କଭୀ ବହୂ ଥୀର ପପୁଲାର ଚରିତ୍ର ତୁଳସୀ ପୁଣି ପରଦାକୁ ଫେରିବାକୁ ଯାଉଛି । ଏହି ଚରିତ୍ରରେ ଅନ୍ୟକେହି ଅଭିନେତ୍ରୀ ନୁହେଁ ବରଂ ସମସ୍ତଙ୍କର ଅତି ପ୍ରିୟ ସ୍ମୃତି ଇରାନୀହିଁ ଅଭିନୟ କରିବେ । ଏନେଇ ନିଜେ ସ୍ମୃତି ଏକ ସାକ୍ଷାତକାରରେ ସୂଚନା ଦେଇଛନ୍ତି । ଏହି ଧାରାବାହିକର ସିକ୍ୟୁଏଲରେ ଦର୍ଶକ ସ୍ମୃତିଙ୍କୁ ଦେଖିବାକୁ ପାଇବେ । ଧାରାବାହିକର ରିଲିଜ୍‌ ଡେଟ୍‌ ସାମନାକୁ ଆସିନଥିବାବେଳେ ଏହାର ଏକ ପ୍ରମୋ ରିଲିଜ୍‌ ହୋଇଛି । ସେହିଭଳି ଅନେକ ବର୍ଷ ପରେ ନିଜର ପ୍ରିୟ ଅଭିନେତ୍ରୀ ସ୍ମୃତି ଇରାନୀଙ୍କୁ ପରଦାରେ ଦେଖିବାକୁ ଫ୍ୟାନ୍‌ମାନେ ଖୁବ ଉତ୍ସାହ ଦେଖାଇଛନ୍ତି । ସୋସିଆଲ ମିଡିଆରେ ଏକ ଫଟୋ ମଧ୍ୟ ଭାଇରାଲ ହେଉଛି, ଯାହା ଏହି ଧାରାବାହିକର ବୋଲି ଦାବି ହେଉଛି । ଫଟୋରେ ସ୍ମୃତି ତୁଳସୀ ଗେଟ୍‌ଅପରେ ଅଛନ୍ତି । ସେ ନିଜର ସିଗ୍‌ନେଚର ଲୁକ୍‌ରେ ନଜର ଆସିଛନ୍ତି । ପୂର୍ବରୁ ଏକ ସାମ୍ବାଦିକ ସମ୍ମିଳନୀରେ ସ୍ମୃତି ଏହି ଧାରାବାହିକର ଖୁବ ପ୍ରଶଂସା କରିଥିଲେ । ତୁଳସୀ ଚରିତ୍ର ତାଙ୍କୁ ଜୀବନରେ ବହୁତ କିଛି ପ୍ରଦାନ କରିଛି ବୋଲି ସେ ଏହି ସାକ୍ଷାତକାରରେ ପ୍ରକାଶ କରିଥିଲେ । ସେହିଭଳି ସେ ରାଜନୀତିରେ ଯୋଗ ଦେଇ ସଫଳ ହେଲେ ମଧ୍ୟ ଏହି ଧାରାବାହିକରୁ ମିଳିଥିବା ସଫଳତା ସବୁବେଳେ ତାଙ୍କ ହୃଦୟର ଖୁବ ନିକଟତର ରହିବ । ବାଲାଜୀ ଫିଲ୍ମ ତାଙ୍କୁ ଏକ ନୂଆ ପରିଚୟ ଦେଇଥିଲା ଯାହା ତାଙ୍କୁ ଦର୍ଶକଙ୍କ ନିକଟତର କରାଇଥିଲା । ଲୋକମାନେ ତାଙ୍କୁ ଚିହ୍ନିଥିଲେ, ଏହି ଧାରାବାହିକରୁ ତାଙ୍କୁ ଷ୍ଟାରଡମ୍‌ ମିଳିଥିଲା । ତେଣୁ ସେ ପୁଣି ପରଦାକୁ ସେହି ଆଇକନିକ୍‌ ତୁଳସୀ ଚରିତ୍ର ମାଧ୍ୟମରେ ଫେରିବାକୁ ଆଗ୍ରହୀ ଥିବା ପ୍ରକାଶ କରିଥିଲେ ।

Comments are closed.