ଭୁବନେଶ୍ବର: ଆଜି ଠାରୁ ୪ ଦିନ ବ୍ୟାପୀ ନବରଙ୍ଗପୁର ଜିଲାରେ ବାୟୁ ସ୍ବାସ୍ଥ୍ୟ ଶିବିର ଆୟୋଜନ କରାଯାଉଛି। ୪ ଦିନ ପର୍ଯ୍ୟନ୍ତ ମାଗଣାରେ ରୋଗୀ ଦେଖିବେ ଅଭିଜ୍ଞ ଡାକ୍ତର । ଏନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି । ସିଏମଓ ପକ୍ଷରୁ କୁହାଯାଇଛି ଯେ , ଲୋକଙ୍କ ସରକାରରେ ସ୍ୱାସ୍ଥ୍ୟ ସେବାକୁ ଗୁରୁତ୍ୱ ଦିଆଯାଇଛି । ବିନା ମୂଲ୍ୟରେ ଚିକିତ୍ସା ସେବା ପ୍ରଦାନ କରି ଲୋକଙ୍କୁ ଆଶ୍ବସ୍ତି ଦେବା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଉପଲବ୍ଧ ସୁବିଧାକୁ ଆହୁରି ଉନ୍ନତ କରାଯାଉଛି ।
ପ୍ରାୟ ଦେଢ଼ବର୍ଷର ଅନ୍ତର ପରେ ନବରଙ୍ଗପୁର ଜିଲାରେ ଏହା ଉପଲବ୍ଧ ହେବାକୁ ଯାଉଛି। ପର୍ଯ୍ୟାୟକ୍ରମେ ନୂଆପଡ଼ା ଏବଂ ମାଲକାନଗିରି ଜିଲାରେ ଏହି କାର୍ଯ୍ୟକ୍ରମ କରାଯିବ। ୭ରୁ ୧୦ ତାରିଖ ୪ ଦିନ ବ୍ୟାପୀ ନବରଙ୍ଗପୁରରେ ଏହି ଶିବିର ହେବ। ଜିଲା ସ୍ୱାସ୍ଥ୍ୟ ଦଳ ଦ୍ୱାରା ସମଗ୍ର ଜିଲାରୁ ପ୍ରାୟ ୯୩୮ ରୋଗୀଙ୍କୁ ସ୍କ୍ରିନିଂ କରାଯାଇଛି।
ସ୍ୱାସ୍ଥ୍ୟ ଶିବିରରେ ଓଡ଼ିଶାର ବିଭିନ୍ନ ବିଭାଗର ବରିଷ୍ଠ ବିଶେଷଜ୍ଞ ଡାକ୍ତରଙ୍କ ଦ୍ବାରା ସେବା ଯୋଗାଇ ଦିଆଯିବ। ଏହି ଶିବିରରେ ମୂତ୍ରନଳିଜନିତ ରୋଗ (ୟୁରୋଲୋଜି), କିଡନୀ ଜନିତ ରୋଗ, ହୃଦରୋଗ, ପେଟ ଜନିତ ଜଟିଳ ରୋଗ, ଥାଏରୋଇଡ଼, ମଧୁମେହ, ଗଳଗଣ୍ଡ, ଜଟିଳ ଅନ୍ତନଳୀ ରୋଗ, ସ୍ନାୟୁ ଜନିତ ରୋଗ ଆଦିର ଚିକିତ୍ସା କରାଯିବ।।
ପ୍ରଥମ ଦିନରେ ବିଭିନ୍ନ ସୁପର ସ୍ପେଶାଲିଟିର ୫ ବରିଷ୍ଠ ରେସିଡେଣ୍ଟ ଶିବିର ପାଇଁ ଯିବେ। ମେଡିକାଲ କଲେଜରୁ ବିଶେଷଜ୍ଞମାନଙ୍କୁ ନିୟୋଜିତ କରି ଉନ୍ନତମାନର ଚିକିତ୍ସା ଯୋଗାଇବା ଲକ୍ଷ୍ୟରେ ମୁଖ୍ୟମନ୍ତ୍ରୀ ବାୟୁ ସ୍ବାସ୍ଥ୍ୟ ସେବା ଅଧୀନରେ ଚିକିତ୍ସା ଶିବିର ଆୟୋଜନ ହେଉଛି।
Comments are closed.