ଭୁବନେଶ୍ୱର : ରାଜ୍ୟରେ ୩ ଦିନ ଧରି ଲଗାତାର କାଳବୈଶାଖୀ ବର୍ଷା ଯୋଗୁଁ ପାଣିପାଗରେ ପରିବର୍ତ୍ତନ ଘଟିଛି I ଲାଗି ରହିଥିବା ଅସହ୍ୟ ଗୁଳୁଗୁଳି ଖରାରୁ ରାଜ୍ୟବାସୀଙ୍କୁ ସାମାନ୍ୟ ଆଶ୍ବସ୍ତି ମିଳିଛି I ଏହି ପରିସ୍ଥିତି ଆଗାମୀ ୩ ଦିନ ଯାଏଁ ଲାଗି ରହିବ I ତେବେ ପଶ୍ଚିମ ଓଡ଼ିଶାର ତାପମାତ୍ରା ୪୦ ଡିଗ୍ରି ଉପରେ ରହିଛି। ସମ୍ବଲପୁରର ଶୁକ୍ରବାର ଦିନ ରାଜ୍ୟର ସର୍ବୋଚ୍ଚ ତାପମାତ୍ରା ୪୨.୪ ଡିଗ୍ରି ରେକର୍ଡ ହୋଇଥିବା ବେଳେ ବୌଦ୍ଧରେ ୪୨.୨ଡିଗ୍ରି, ଟିଟିଲାଗଡ଼ରେ ୪୧.୫ ଡିଗ୍ରି, ସୋନପୁରରେ ୪୧.୪ ଡିଗ୍ରି ଲେଖାଏଁ ରେକର୍ଡ ହୋଇଛି। ଆସନ୍ତା ୫ ଦିନ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନ ବିଶେଷକରି ପଶ୍ଚିମ ଓଡ଼ିଶାରେ ତାପମାତ୍ରା ୪୨ ଡିଗ୍ରି ଉପରେ ରହିବାର ସମ୍ଭାବନା ରହିଛି ।
ଅପରପକ୍ଷେ,ଚଳିତ ବର୍ଷ ଜୁନ ୪ ସୁଦ୍ଧା ମୌସୁମୀ କେରଳ ଛୁଇଁ ପାରେ ବୋଲି ପାଣିପାଗ ବିଭାଗ ଆକଳନ କରିଛି I କିନ୍ତୁ ଓଡିଶାକୁ ଦକ୍ଷିଣ-ପଶ୍ଚିମ ମୌସୁମୀ ବାୟୁ ବିଳମ୍ବରେ ଆସିବାକୁ ଥିବାରୁ ଜୁନ୍ରେ ନିଅଣ୍ଟିଆ ବର୍ଷା ହେବ। କିନ୍ତୁ ସେପ୍ଟେମ୍ବର ସୁଦ୍ଧା ଉଭୟ ଦେଶ ଓ ରାଜ୍ୟରେ ବର୍ଷାର ପରିମାଣ ସ୍ବାଭାବିକ ହୋଇଯାଇଥିବ ବୋଲି ଆକଳନ କରିଛି ଭାରତୀୟ ପାଣିପାଗ ବିଭାଗ (ଆଇଏମ୍ଡି)। ଉତ୍ତର ତଥା ଉତ୍ତର-ପୂର୍ବ ଭାରତର କିଛି ଅଞ୍ଚଳକୁ ଛାଡ଼ି ଦେଲେ ଜୁନ୍ରେ ଦିନର ସର୍ବୋଚ୍ଚ ଓ ରାତିର ସର୍ବନିମ୍ନ ତାପମାତ୍ରା ସ୍ବାଭାବିକଠାରୁ ଅଧିକ ରହିବ। ସେହିପରି ଚଳିତ ବର୍ଷ ଜୁନ୍ରୁ ସେପ୍ଟେମ୍ୱର ମଧ୍ୟରେ ଦେଶରେ ୯୬ ପ୍ରତିଶତ ବର୍ଷା ହେବ ବୋଲି କୁହାଯାଇଛି । ରାଜ୍ୟରେ ମଧ୍ୟ ଜୁନ୍ରେ ତାପମାତ୍ରା ସ୍ବାଭାବିକଠାରୁ ଅଧିକ ରହିବା ସହ ଗରମ ହେବ ବୋଲି କହିଛି ଆଇଏମ୍ଡି ।
Comments are closed.