ଟେକ୍ସାସ୍: ଆଜିକାଲି ଇଣ୍ଟରନେଟ୍ରେ ଅନେକ ପୋଷା ପଶୁପକ୍ଷୀଙ୍କ ଅଜବ କାରନାମାର ଭିଡିଓ ଦେଖିବାକୁ ମିଳିଛି । ହେଲେ ଆପଣ କେବେ ଶିକ୍ଷିତ ବିଲେଇ ସମ୍ପର୍କରେ ଜାଣିନଥିବେ, ଯାହା ଏସମୟରେ ସୋସିଆଲ ମିଡିଆର ଦୁନିଆରେ ହଇଚଇ ସୃଷ୍ଟି କରିଛି । ଏହି ବିଲେଇ କେବଳ ଚାଲାକ ନୁହେଁ ବରଂ ଗ୍ରାଜୁଏଟ୍ ଡିଗ୍ରୀଧାରୀ । ଆପଣଙ୍କୁ ଏହା ଆଶ୍ଚର୍ଯ୍ୟ ଲାଗୁଥାଇପାରେ । ହେଲେ ବାସ୍ତବରେ ଆମେରିକାରେ ଏପରି କିଛି ମାମଲା ସାମ୍ନାକୁ ଆସିଛି, ଯାହାକୁ ସାରା ବିଶ୍ୱରେ ଚର୍ଚ୍ଚା କରାଯାଉଛି ।
ରିପୋର୍ଟ ଅନୁଯୟୀ ଟେକ୍ସାସ୍ ବିଶ୍ୱବିଦ୍ୟାଳୟରେ ଶିକ୍ଷା ଗ୍ରହଣ କରୁଥିବା ଯୁବତୀ ଫ୍ରାସିସ୍କୋ ବୋର୍ଡିୟର୍ଙ୍କର ସୁକୀ ନାମକ ଏକ ପୋଷା ବିଲେଇ ରହିଛି । ଏହି ବିଲେଇ ଫ୍ରାସିସ୍କୋଙ୍କ ପାଖରେ ସବୁବେଳେ ରହିଥାଏ । ଏମିତିକି ପାଠପଢ଼ା ସମୟରେ ମଧ୍ୟ ସାଥିରେ ବସିଥାଏ । କରୋନାକାଳରେ ଯେତେବେଳେ ଫ୍ରାସିସ୍କୋ ଅନଲାଇନ୍ କ୍ଲାସରେ ସାମିଲ ହେଉଥିଲେ, ସେତେବେଳେ ବିଲେଇ ସୁକୀ ମଧ୍ୟ ତାଙ୍କ ସହ ବସି ରହୁଥିଲା । ଆମେରିକାର ଏକ ନୁ୍ୟଜ େୱବସାଇଟ୍ ରିପୋର୍ଟ ଅନୁସାରେ, ସୁକୀ ନାମକ ଏହି ବିଲେଇ କୌଣସି ଛାତ୍ର ପରି ଅନଲାଇନ କ୍ଲାସରେ ଯୋଗଦେଉଥିଲା ।
ସେପଟେ ସୁକୀର ମାଲିକାଣୀ ଫ୍ରାସିସ୍କୋ କହିଛନ୍ତି, ଏହି ବିଲେଇ ତାଙ୍କର ପ୍ରତିଟି ଅନଲାଇନ୍ କ୍ଲାସରେ ଯୋଗଦେଉଥିଲା ଏବଂ ତାଙ୍କଠୁ କେବେ ବି ଆଜିଯାଏଁ ଦୂରରେ ରହିନାହିଁ । ଲାପଟପ୍ ଖୋଲିବାଠାରୁ ଆରମ୍ଭ କରି କ୍ଲାସ ଶେଷ ପର୍ଯ୍ୟନ୍ତ ସୁକୀ ଧ୍ୟାନର ସହ ସବୁ କଥା ଶୁଣେ ବୋଲି ଫ୍ରାସିସ୍କୋ କହିଛନ୍ତି । ତେଣୁ ସେ ଗ୍ରାଜୁଏସନ ଦିନରେ ସୁକୀକୁ ନେଇ କଲେଜ ଯାଇଥିଲେ । ସେ ସୁକୀ ପାଇଁ ସ୍ୱତନ୍ତ୍ର ଡ୍ରେସ୍ ତିଆରି କରିଥିଲେ, ଯାହା ଅନ୍ୟ ଛାତ୍ରଙ୍କ ସହ ମ୍ୟାଚ୍ କରୁଥିଲା । ତାଙ୍କ ସହ ମଧ୍ୟ ସୁକୀ ମଧ୍ୟ ଗ୍ରାଜୁଏସନ ପାସ୍ କରିଛି ବୋଲି ଫ୍ରାସିସ୍କୋ ଦାବି କରିଛନ୍ତି । ଯେହେତୁ ସୁକୀ ବି ତାଙ୍କ ସହ ପ୍ରତିଟି କ୍ଲାସରେ ସାମିଲ ହୋଇଛି । ତେବେ ଫ୍ରାସିସ୍କୋ ତାଙ୍କ କାହାଣୀକୁ ସୋସିଆଲ ମିଡିଆରେ ସେୟାର କରିଛନ୍ତି । ଲୋକମାନେ ନିଜ ନିଜର ପ୍ରତିକ୍ରିୟାରେ ସୁକୀକୁ ମଧ୍ୟ ଗ୍ରାଜୁଏଟ୍ ବୋଲି ସମ୍ବୋଧନ କରିଛନ୍ତି ।
Comments are closed.