ମୁମ୍ବାଇ : ମୁମ୍ବାଇର କୁର୍ଲାରେ ଭୟଙ୍କର ଦୁର୍ଘଟଣା । ମୃତ୍ୟୁର ତାଣ୍ଡବ ରଚିଲା ଦ୍ରୁତଗାମୀ ବସ୍। ବ୍ରେକ୍ ଫେଲ ହୋଇ ନିୟନ୍ତ୍ରଣ ହରାଇବାପରେ ଜଣଙ୍କ ପରେ ଜଣଙ୍କ ଉପରକୁ ମାଡିଯାଇଥିଲା । ଫଳରେ ଘଟଣାସ୍ଥଳରେ ୫ ଜଣଙ୍କର ମୃତ୍ୟୁ ଘଟିଥିବାବେଳେ ୨୫ ରୁ ଉର୍ଧ୍ଵ ଆହତ ହୋଇଥିଲେ । ସମସ୍ତ ଆହତଙ୍କୁ ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୋମବାର ବିଳମ୍ବିତ ରାତିରେ କୁର୍ଲା ପଶ୍ଚିମରୁ ଅନ୍ଧେରୀ ଯାଉଥିବା ୩୩୨ ନମ୍ବର ବସ୍ କୁର୍ଲା ଷ୍ଟେସନରୁ ବାହାରିଥିଲା। ହଠାତ୍ ବସଟି ବ୍ରେକ୍ ଫେଲ ହୋଇଥିଲା। ଫଳରେ ଆମ୍ବେଦକର ନଗର ବୁଦ୍ଧ କଲୋନୀ ନିକଟରେ ବସଟି ନିୟନ୍ତ୍ରଣ ହରାଇଥିଲା। ଏହାପରେ ସ୍କୁଟି,ଅଟୋ, ବାଇକ୍ ଓ ରାସ୍ତାରେ ଯାଉଥିବା ଲୋକଙ୍କ ଉପରେ ମାଡିଯାଇଥିଲା। ୧୦୦ ମିଟର ବ୍ୟବଧାନରେ ୩୦ରୁ୪୦ ଗାଡିକୁ ଧକ୍କା ଦେଇଥିଲା ବେଷ୍ଟ ବସ୍ । ଦୁର୍ଘଟଣାରେ ୫ ଜଣ ଲୋକଙ୍କର ମୃତ୍ୟୁ ଘଟିଥିବାବେଳେ ୨୫ରୁ ଅଧିକ ଲୋକଙ୍କୁ ଗୁରୁତର ଅବସ୍ଥାରେ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ଆହତଙ୍କ ମଧ୍ୟରୁ ଅନେକଙ୍କ ଅବସ୍ଥା ସଙ୍କଟାପର୍ଣ୍ଣ ରହିଛି। ଶେଷରେ ବସଟି ଏକ ସୋସାଇଟି କାନ୍ଥରେ ଧକ୍କା ହେବା ପରେ ଅଟକି ରହିଥିଲା। ସେପଟେ ଖବର ପାଇ ସ୍ଥାନୀୟ ପୁଲିସ ଘଟଣାସ୍ଥଳରେ ପହଞ୍ଚି ବସ୍ ଡ୍ରାଇଭରକୁ ଅଟକ ରଖି ତଦନ୍ତ ଜାରି ରଖିଛି । ଏହି ଦୁର୍ଘଟଣାର ଭୟଙ୍କର ଭିଡିଓ ବର୍ତ୍ତମାନ୍ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
Comments are closed.