ଭୁବନେଶ୍ବର: ରାଜଧାନୀରେ ଅଘଟଣ । ନିଜ ଘର ଛାତ ଉପରୁ ଯୁବ ଆଇନଜୀବୀଙ୍କ ଜଳନ୍ତା ମୃତଦେହ ଉଦ୍ଧାର । ଭୁବନେଶ୍ବର ମଞ୍ଚେଶ୍ବର ଥାନା ପାଣ୍ଡରାରେ ଅଞ୍ଚଳରେ ଘଟିଛି ଏହି ଘଟଣା । ମୃତକ ହେଲେ ଦୀପକ କୁମାର ସାହୁ (୪୨) ବର୍ଷ । ତେବେ ଆଇନଜୀବୀଙ୍କୁ କେହି ନିଆଁ ଲଗାଇ ହତ୍ୟା କରିଛି ନ ନିଜେ ପେଟ୍ରୋଲ ଢାଳି ଆତ୍ମହତ୍ୟା କରିଛନ୍ତି ତାହା ଏପର୍ଯ୍ୟନ୍ତ ଅସ୍ପଷ୍ଟ ରହିଛି । ଖବର ପାଇ ମଞ୍ଚେଶ୍ବର ଥାନା ପୋଲିସ ଓ ସାଇଣ୍ଟିଫିକ୍ ଟିମ୍ ଅର୍ଦ୍ଧଦଗ୍ଧ ମୃତଦେହ ଜବତ କରି ତଦନ୍ତ କରୁଛନ୍ତି । ଶୁକ୍ରବାର ମୃତଦେହ ବ୍ୟବଚ୍ଛେଦ ହେବ । ଅପରପକ୍ଷେ, ପରିବାର ଲୋକେ ହତ୍ୟା ଅଭିଯୋଗ କରିଛନ୍ତି ।
ସୂଚନାନୁସାରେ, ଦୀପକ ଜଣେ ଆଇନଜୀବୀ । ଭୁବନେଶ୍ୱର ପାଣ୍ଡରା ଜଗନ୍ନାଥ ମନ୍ଦିର ନିକଟରେ ତାଙ୍କର ୪ ମହଲା ବିଶିଷ୍ଟ କୋଠା ଘର ରହିଛି ସେଠାରେ ସେ ମା’ପତ୍ନୀ ଓ ୨ ଝିଅଙ୍କ ସହ ରହୁଥିଲେ। ଘରର ତଳ ମହଲା ଭଡାରେ ଲାଗିଥିବାବେଳେ ସଭା ଉପର ମହଲାରେ ତାଙ୍କର ଚାମ୍ବର ରହିଛି । ଗତକାଲି ରାତି ପ୍ରାୟ ୧୦ଟା ସମୟରେ ସ୍ତ୍ରୀ ଖାଇବା କହିବାରୁ ଛାତ ଉପରୁ ଆସି ପରେ ଖାଇବେ ବୋଲି କହିଥିଲେ । ଦୀପକଙ୍କ ଫେରିବାରେ ବିଳମ୍ବ ହେବାରୁ ପତ୍ନୀ ତାଙ୍କୁ ଡାକିବାକୁ ଛାତ ଉପରକୁ ଯାଇଥିଲେ। ହେଲେ ସିଡି କବାଟ ବନ୍ଦ ଥିଲା । ପୋଡ଼ା ଗନ୍ଧ ସାଙ୍ଗକୁ ନିଆଁ ଦେଖି ପତ୍ନୀ ପାଟି କରିବାରୁ ପାଖ ପଡ଼ୋଶୀ ଆସି କବଟା ଭାଙ୍ଗିଥିଲେ । ସେତେବେଳକୁ ଦୀପକ ସମ୍ପୂର୍ଣ୍ଣ ଜଳିଯାଇଥିଲେ । ଏହା ଦେଖି ପଡୋଶୀ ତୁରନ୍ତ ମଞ୍ଚେଶ୍ୱର ପୁଲିସ୍କୁ ଫୋନ୍ କରିଥିଲେ ।
ପୁଲିସ୍ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବେଚ୍ଛଦ ପାଇଁ କ୍ୟାପିଟାଲ୍ ହସ୍ପିଟାଲ୍ ପଠାଇଥିଲା । ତାଙ୍କୁ କେହି ହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି । ତେବେ ପରିବାର ପକ୍ଷରୁ ଯାହା ସୂଚନା ମିଳିଛି ଦୀପକ କିଛିଦିନ ପୂର୍ବରୁ ମାନସିକ ଅବସାଦରେ ପୀଡିତ ଥାଇ ଔଷଧ ଖାଉଥିଲେ । ହେଲେ ଜୀବନ ହାରିବାର କାରଣ ଜଣାପଡ଼ିନାହିଁ । ଶୁକ୍ରବାର ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହା ସ୍ପଷ୍ଟ ହେବ ।
