ଭୁବନେଶ୍ୱର : ମୃତ୍ୟୁ ପରେବି ଅମର । ଅଙ୍ଗଦାନ କରି ୨ ଜଣଙ୍କ ଜୀବନ ବଞ୍ଚାଇଛନ୍ତି ବିଶ୍ବଜିତ ଦାସ । ମୃତ୍ୟୁ ପରେ ନିଜର କିଡନୀ ଦାନ କରି ଅମର ହୋଇଛନ୍ତି ଅନୁଗୁଳର ବିଶ୍ୱଜିତ । ଗତ ୬ ଦିନ ତଳେ ଏକ ଦୁର୍ଘଟଣାରେ ଗୁରୁତର ଆହତ ହୋଇ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ବ୍ରେନ ଡେଡ଼ ହୋଇଥିଲା । ପରେ ପରିବାର ଲୋକଙ୍କ ସହମତିରେ ଦୁଇଟି ଯାକ କିଡନୀ କଢାଯାଇଥିଲା । ଏସ୍ସିବି କିଡ୍ନୀ ଟ୍ରାନ୍ସପ୍ଲାଣ୍ଟ୍ ଟିମ୍ ଭୁବନେଶ୍ୱରର ଉକ୍ତ ଘରୋଇ ହସ୍ପିଟାଲ୍ରେ ପହଞ୍ଚି ବିଶ୍ୱଜିତଙ୍କ ଶରୀରରୁ କିଡ୍ନୀ ଆଣି ତତ୍ପରତାର ସହିତ ଗ୍ରୀନ୍ କରିଡର୍ରେ କଟକରେ ପହଞ୍ଚିଥିଲେ । ଗୋଟିଏ ସେହି ଘରୋଇ ହସ୍ପିଟାଲରେ ପ୍ରତିରୋପଣ କରିଯାଇଥିବା ବେଳେ ଅନ୍ୟଟି କଟକ ଏସସିବି ମେଡିକାଲକୁ ଅଣାଯାଇଥିଲା ।
ସୂଚନାନୁସାରେ,ଗତ ୬ ଦିନ ତଳେ ଅନୁଗୁଳର ବିଶ୍ୱଜିତ ଦାସ (୨୮) ରାସ୍ତା ଦୁର୍ଘଟଣାରେ ଗୁରୁତର ହୋଇଥିଲେ । ତାଙ୍କୁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଇଥିଲେ ପରିବାର । ତେବେ ରବିବାର ଡାକ୍ତର ତାଙ୍କର ବ୍ରେନ୍ ଡେଡ୍ ହୋଇଥିବା ଘୋଷଣା କରିଥିଲେ। ଏ ସମ୍ପର୍କରେ ଜାଣିବା ପରେ ପରିବାର ତାଙ୍କ ଅଙ୍ଗଦାନ କରିବାକୁ ନିଷ୍ପତ୍ତି ନେଇଥିଲେ। ଏନେଇ ହସ୍ପିଟାଲ ଅଧୀକ୍ଷକଙ୍କ ସହ ଆଲୋଚନା କରିଥିଲେ। ହସ୍ପିଟାଲ କର୍ତ୍ତୃପକ୍ଷ ଏ ସମ୍ପର୍କରେ ଷ୍ଟେଟ ଅର୍ଗାନ ଆଣ୍ଡ ଟିସ୍ୟୁ ଟ୍ରାନ୍ସପ୍ଲାଣ୍ଟ ଅର୍ଗାନାଇଜେସନ (ସୋଟୋ)ର ଅନୁମତି ନେଇଥିଲେ। ପରେ ଏସ୍ସିବିର ୟୁରୋଲୋଜି ବିଭାଗର ବିଭାଗୀୟ ମୁଖ୍ୟ ଡା. ସମୀର ସ୍ୱାଇଁ, ଡା. ସବ୍ୟସାଚ୍ଚୀ ପଣ୍ଡା, ଡା. ସଞ୍ଜୟ ଚୌଧୁରୀ, ନେଫ୍ରୋଲୋଜି ବିଭାଗୀୟ ମୁଖ୍ୟ ଡା. ଅରୁଣା ଆଚାର୍ଯ୍ୟଙ୍କ ସହ ଏକ ଟିମ ସେଠାରେ ପହଞ୍ଚି କ୍ରସ ମ୍ୟାଚିଂ ଆରମ୍ଭ କରିଥିଲେ। ଗୋଟିଏ କିଡ଼ନୀ ୫ ବର୍ଷ ଧରି ଡାଏଲିସିସରେ ଥିବା ଜଗତସିଂପୁର ଅଂଚଳର ସୁନୀଲ ନାୟକ(୩୫)ଙ୍କ ଠାରେ ସଫଳତାର ସହ ପ୍ରତିରୋପଣ କରାଯାଇଥିଲା । ବିଳମ୍ବିତ ରାତି ପର୍ଯ୍ୟନ୍ତ ଏହି କିଡ୍ନୀ ଟ୍ରାନ୍ସପ୍ଲାଣ୍ଟ ଚାଲିଥିଲା ବୋଲି ଏସ୍ସିବି ସୂତ୍ରରୁ ସୂଚନା ମିଳିଛି । ଏନେଇ ବିଶ୍ୱଜିତଙ୍କ ପରିବାର ସଦସ୍ୟ କହିଛନ୍ତି ପୁଅ ସିନା ଚାଲିଗଲା ହେଲେ ଅଙ୍ଗଦାନ କରି ୨ଜଣଙ୍କୁ ଜୀବନ ବଞ୍ଚାଇ ଦେଇଗଲା ।
Comments are closed.