ଗିରଫ ହେଲେ କୋଟିପତି ସରକାରୀ ବାବୁ

ଭୁବନେଶ୍ୱର : ଗିରଫ ହେଲେ କୋଟିପତି ସରକାରୀ ବାବୁ । ୨ ଦିନ ଧରି ଭିଜିଲାନ୍ସ ଚଢ଼ାଉ ପରେ ମାଲକାନାଗିରି ଜଳସମ୍ପଦ ପ୍ରକଳ୍ପ ଉପନିର୍ଦେଶକ ଶାନ୍ତନୁ ମହାପାତ୍ର ଗିରଫ ହୋଇଛନ୍ତି । ଶାନ୍ତନୁ ମହାପାତ୍ରଙ୍କ ସମେତ ଲାଞ୍ଚ କାରବାରରେ ଲିପ୍ତ ଥିବା ତାଙ୍କର ଅନ୍ୟ ୪ ଜଣଙ୍କୁ ଭିଜିଲାନ୍ସ ଟିମ ଗିରଫ କରିଛି । ଗିରଫ କର୍ମଚାରୀ ମାନେ ହେଲେ ମାଲକାନଗିରି କୃଷି ବିଭାଗର ସହକାରୀ ଯନ୍ତ୍ରୀ ମୋହନ ମଣ୍ଡଳ, ଡାଟା ଏଣ୍ଟ୍ରି ଅପରେଟର ବିଶ୍ୱଜିତ ମଣ୍ଡଳ, ଚୁକ୍ତି ଭିତିକ କର୍ମଚାରୀ ଅମୀୟ କାନ୍ତ ସାହୁ ଏବଂ ଜନସେବା କେନ୍ଦ୍ର କର୍ମଚାରୀ ଅଲେଖ ଚନ୍ଦ୍ର ପ୍ରଧାନ ।

ସୂଚନାନୁସାରେ,ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ୨ ଦିନ ତଳେ ଭିଜିଲାନ୍ସ ପକ୍ଷରୁ ଶାନ୍ତନୁ ମହାପାତ୍ରଙ୍କ ଘରେ ରେଡ୍‌ କରିଥିଲା। ଶାନ୍ତନୁଙ୍କ ମାଲକାନଗିରି ଅଫିସ, ଘର ସମେତ କଟକ, ଭୁବନେଶ୍ବର, ଜୟପୁର ଆଦି ୮ଟି ସ୍ଥାନରେ ଏକକାଳୀନ ରେଡ ହୋଇଥିଲା । ରେଡ୍ ବେଳେ ୨.୦୬ କୋଟି ଟଙ୍କା ସମେତ ୪୨୨ ଗ୍ରାମ୍ ସୁନା ଅଳଙ୍କାର ଏବଂ ୯୧ ଲକ୍ଷ ଡିପୋଜିଟ୍ ମିଳିଥିଲା । ଏହାବାଦ କୋରାପୁଟରେ ୬ ହଜାର ସ୍କୋୟାର ଫୁଟ୍ ସ୍ଥାନରେ ତିନି ମହାଲା ବିଶିଷ୍ଟ ଆଲିସାନ ବଙ୍ଗଳା, ଜୟପୁର ଓ ଭୁବନେଶ୍ଵରର ବିଭିନ୍ନ ସ୍ଥାନରେ ୪ଟି ଦାମୀ ପ୍ଲଟ, ଗୋଟିଏ କାର, ଦୁଇଟି ବାଇକ୍, ବ୍ୟାଙ୍କ ଡିପୋଜିଟ ଓ ବହୁ ଗୁରୁତ୍ଵପୂର୍ଣ୍ଣ କାଗଜପତ୍ର ଠାବ କରିଥିଲା ଭିଜିଲାନ୍ସ ଟିମ୍ । ତେବେ ଜଣେ ସରକାରୀ ଅଧିକାରୀ ଏତେ ଟଙ୍କା କେମିତି ଓ କେଉଁଠୁ ଆଣିଲେ, ଘରେ କାହିଁକି ରଖିଥିଲେ ଏହାର ତଦନ୍ତ ଜାରି ରଖିଛି ଭିଜିଲାନ୍ସ ।
।
ଅନ୍ୟପଟେ ଲେବରଙ୍କ ନାଁରେ କୋଟି କୋଟି ଟଙ୍କା ଚଳୁ କରୁଥିଲେ ଶାନ୍ତନୁ ମହାପାତ୍ର । ଠକେଇର ଗଂଜାମ ଲିଙ୍କ୍ ସାମ୍ନାକୁ ଆସିଛି । ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ବ୍ଲକରେ ଜନସେବା କେନ୍ଦ୍ର ମାଧ୍ୟମରେ ହେଉଥିଲା ଟଙ୍କା ଆଦାୟ । ଅନଲାଇନ୍ ମାଧ୍ୟମରେ ଲାଞ୍ଚ ଟଙ୍କା ସଂଗ୍ରହ କରୁଥିଲେ ଜନସେବା କେନ୍ଦ୍ର ମାଲିକ ଅଲେଖ ପ୍ରଧାନ । ଲାଞ୍ଚ ଟଙ୍କାକୁ ପ୍ରକଳ୍ପ ନିର୍ଦେଶକ ଶାନ୍ତନୁ ମହାପାତ୍ରଙ୍କୁ ପ୍ରଦାନ କରୁଥିଲେ ଅଲେଖ। । ତଦନ୍ତ ବେଳେ ଜଣାପଡିଛି ସଂପୃକ୍ତ ଅଧିକାରୀ କର୍ମଚାରୀଙ୍କ ସହ ମିଶି ଆତ୍ମସାତ କରୁଥିଲେ ଟଙ୍କା ।

ତଦନ୍ତ ବେଳେ ତାଙ୍କ ସହକର୍ମୀ ଡିଇଓ ବିଶ୍ବଜିତ ମଣ୍ଡଳ ଓ ଅନ୍ୟ ଜଣେ କର୍ମଚାରୀ ଅମୀୟକାନ୍ତ ସାହୁଙ୍କ ନିକଟରୁ ମିଲିଛି ଲେବର ମାନଙ୍କର ପୁଳା ପୁଳା ପାସବୁକ । ଲେବର ମାନଙ୍କ ବ୍ୟାଙ୍କ ଆକାଉଣ୍ଟ ପରିଚାଳିତ କରୁଥିଲେ ତିନି ଜଣ । ବିଭିନ୍ନ ପ୍ରକଳ୍ପ ରେ କାମ ହୋଇ ନଥିଲେ ମଧ୍ୟ କାମ ହୋଇଯାଇଥିବା ଦେଖାଇ ଏହି ଆକାଉଣ୍ଟ ମଧ୍ୟମରେ ସରକାରୀ ଅର୍ଥ ହଡପ କରୁଥିଲେ ଓ ନିଜ ଭିତରେ ବାଣ୍ଟି ନେଉଥିବା ଜଣାପଡିଛି ।