ନିମାପଡା : ବାଲେଶ୍ବର ଘଟଣା ମନରୁ ନଲିଭୁଣି ବଳଙ୍ଗାରେ ଘଟିଛି ଅନୁରୂପ ପୁଣି ଏକ ଘଟଣା । ଏହି ୨ଟି ଘଟଣାରେ ରାଜ୍ୟ ରାଜନୀତି ହୁଲସ୍ତୁଲ ହେବାରେ ଲାଗିଛି । କିନ୍ତୁ ଘଟଣାକୁ ୨ ଦିନ ବିତିଥିବାବେଳେ ବର୍ତ୍ତମାନ ସୁଦ୍ଧା ୩ ଅଭିଯୁକ୍ତଙ୍କୁ ଧରିପାରିନାହିଁ ପୋଲିସ । ଘଟଣାସ୍ଥଳକୁ ଯାଇ ପୋଲିସ ମୁଖିଆ ତନାଘନା କରିଛନ୍ତି। ପୋଲିସ ଆଇଜି, ଏସପିଙ୍କ ସହ ଆଲୋଚନା କରି ଫେରିଛନ୍ତି ପୋଲିସ ଡିଜି। ଅନ୍ୟପଟେ ପୀଡ଼ିତାଙ୍କ ପରିବାର ଲୋକ ଓ ଅଟକ ୨ ସାଙ୍ଗଙ୍କ ବୟାନରେ ତାଳମେଳ ରହୁନି ।
ଏହି ଜଘନ୍ୟ କାଣ୍ଡଟି ଦିନକୁ ଦିନ ଅଡୁଆ ସୂତାରେ ଛନ୍ଦି ହୋଇଚାଲିଛି । ଏପରିସ୍ଥଳରେ କଲ୍ ଡିଟେଲ୍ସ ରେକର୍ଡ (ସିଡିଆର୍) ଯାଞ୍ଚ ହିଁ ପୁଲିସର ଶେଷ ଭରସା ସାଜିଛି । ପୀଡ଼ିତାଙ୍କ ପରିବାର ଲୋକ, ସମ୍ପର୍କୀୟ ଓ ଅନ୍ୟ ସମ୍ପ୍ରଦାୟର ଜଣେ ସାଙ୍ଗଙ୍କ ସମେତ ୮ଜଣଙ୍କ ମୋବାଇଲ୍ ନଂ ସିଡିଆର ରିପୋର୍ଟ ମଗାଯାଇଛି । ସେମାନଙ୍କ ଫୋନରେ ବାର୍ତ୍ତାଳାପର ୩ ମାସର ଇତିହାସ ଉଣ୍ଡାଳୁଛି ପୁଲିସ ।
ସାଇବର ଏକ୍ସପର୍ଟମାନେ ଏହି ସବୁ ତଥ୍ୟକୁ ଯାଞ୍ଚ କରୁଛନ୍ତି। ହେଲେ ଅଭିଯୁକ୍ତଙ୍କ ନିକଟରେ ପହଞ୍ଚି ପାରିନି ପୋଲିସ। ଏବେବି ପୋଲିସର ତନାଘନା ଜାରି ରହିଛି। ରବିବାର ଡିଜିପି ୱାଇ.ବି ଖୁରାନିଆ ଅଘଟଣସ୍ଥଳକୁ ଯାଇଥିଲେ । କେନ୍ଦ୍ରାଞ୍ଚଳ ଆଇଜି ଏସ୍ ପ୍ରବୀଣ କୁମାର ଓ ପୁରୀ ଏସ୍ପି ପିନାକ ମିଶ୍ର ଉପସ୍ଥିତ ଥିଲେ । ଉଭୟେ ପୀଡି଼ତାଙ୍କୁ ଉଦ୍ଧାର କରିଥିବା ତେରହଳ ଗ୍ରାମର ଦୁଃଖୀଶ୍ୟାମ ସେନାପତିଙ୍କ ଘରକୁ ଯାଇଥିଲେ । ବରିଷ୍ଠ ଅଧିକାରୀମାନେ ନାବାଳିକାର ଗାଁକୁ ଯାଇ ପଡ଼ୋଶୀମାନଙ୍କୁ ପଚରାଉଚରା କରିଥିଲେ ।
ସେପଟେ ଦିଲ୍ଲୀ ଏମସରେ ବଳଙ୍ଗା ପୀଡ଼ିତାଙ୍କ ଚିକିତ୍ସା ଜାରି ରହିଛି। ପୀଡ଼ିତାଙ୍କ ଅବସ୍ଥା ସଂକଟାପନ୍ନ ଥିବା ଜଣାପଡିଛି। ପୀଡ଼ିତାଙ୍କ ଶରୀରର ୭୫% ପୋଡ଼ିଯାଇଛି। ଦିଲ୍ଲୀ ଏମସ ବର୍ନ ICUରେ ଭର୍ତ୍ତି ହୋଇଛନ୍ତି ବଳଙ୍ଗା ପୀଡ଼ିତା। ଅକ୍ସିଜେନ ସପୋର୍ଟରେ ରହିଛନ୍ତି ପୀଡ଼ିତା। ବିଭିନ୍ନ ବିଭାଗର ଡାକ୍ତରଙ୍କୁ ନେଇ ଗଠିତ ଟିମ ଘଟଣାର ତଦାରଖ କରୁଛନ୍ତି।
Comments are closed.