ରାଜଗାଙ୍ଗପୁର: ସୁନ୍ଦରଗଡ଼ ଜିଲ୍ଲାର ରାଜଗାଙ୍ଗପୁରରେ ଥିବା ଡାଲମିଆ ସିମେଣ୍ଟ ପ୍ଲାଣ୍ଟରେ ବଡ଼ ଧରଣର ଅଘଟଣ । ପ୍ଲାଣ୍ଟରେ ଥିବା ଷ୍ଟକ ରଖାଯାଉଥିବା କୋଇଲା ହପର୍ ଭୁଶୁଡ଼ି ଚାପି ହୋଇଗଲେ ଶ୍ରମିକ । ୩ ଜଣ ଶ୍ରମିକ ନିଖୋଜ ଥିବା ରାଜଗାଙ୍ଗପୁର ତହସିଲଦାର କହିଛନ୍ତି । ବୟଲର୍ ଅପରେଟର ସୁଶାନ୍ତ ରାଉତ, ବୈଷୟିକ କର୍ମଚାରୀ ଦଶରଥ ପାତ୍ର ଓ ରଞ୍ଜିତ ଭୋଳଙ୍କ ପତ୍ତା ମିଳୁ ନାହିଁ । ଅନ୍ୟମାନଙ୍କୁ ସୁରକ୍ଷିତ ଉଦ୍ଧାର କରାଯାଇଥିବାର କୁହାଯାଉଛି । ତେବେ ମୃତାହତ ନେଇ କୌଣସି ସୂଚନା ମିଳିପାରି ନ ଥିବାବେଳେ ଶ୍ରମିକଙ୍କୁ ଉଦ୍ଧାର କରିବାକୁ ୩ଟି କ୍ରେନ୍ ନିୟୋଜିତ କରାଯାଇଛି । ଏହା ସହିତ ୩ଟି ଆମ୍ବୁଲାନ୍ସ ମଧ୍ୟ ଘଟଣା ସ୍ଥଳରେ ମହଜୁତ ରହିଛି ।
ସୂଚନାନୁସାରେ,ଗୁରୁବାର ସନ୍ଧ୍ୟା ପ୍ରାୟ ୫. ୩୦ରୁ ୫. ୫୦ ଭିତରେ ଡାଲମିଆ ସିମେଣ୍ଟ କାରଖାନାରେ ଥିବା କ୍ୟାପଟିଭ ପାୱାର ପ୍ଲାଣ୍ଟ -୨(ସିପିପି)ରେ କୋଇଲା ହପର୍ ଭୁଶୁଡ଼ି ପଡ଼ିଥିଲା । ପ୍ରାୟ ୭୦ ଟନ୍ କୋଇଲା ଥିବା ହପର୍ ଭୁଶୁଡ଼ି ପଡ଼ିଥିଲା। ହପର୍ ଭିତରେ କୋଇଲା ପାଉଡର (ଫାଇନ୍ସ ) ଗଚ୍ଛିତ ରଖାଯାଇଥାଏ । ବଙ୍କର୍ କୋଇଲା ଗୁଣ୍ଡରେ ଭର୍ତ୍ତି ହୋଇଥିବାରୁ ସେଥିରେ ଶ୍ରମିକମାନେ ପୋତି ହୋଇଯାଇଥିଲେ। ଏହି ଖବର ପରେ କାରଖାନା ଭିତରକୁ କମ୍ପାନୀର ୩ଟି କ୍ରେନ ଓ ୩ଟି ନିଜସ୍ବ ଆମ୍ବୁଲାନ୍ସ ଯାଇଥିଲା । ୭ଟି ସରକାରୀ ଆମ୍ବୁଲାନ୍ସ ଓ ଅଗ୍ନିଶମ ବିଭାଗର ୧୦ରୁ ଅଧିକ ଗାଡି ମଧ୍ୟ ନିୟୋଜିତ ହୋଇଥିଲେ ।
ଫଳରେ ସେଠାରେ କାର୍ଯ୍ୟରତ ୧୦ ରୁ ୧୨ ଜଣ ଶ୍ରମିକ ଚାପି ହୋଇ ରହିଥିଲେ । କିଛି ଶ୍ରମିକଙ୍କୁ ଉଦ୍ଧାର କରାଯାଇଥିବାବେଳେ ଆହୁରି ୩ ରୁ ୪ ଜଣ ଶ୍ରମିକ ଚାପି ହୋଇ ରହିଥିବା ଅନୁମାନ କରାଯାଉଛି । ହପରର ସେନସର କାମ ନ କରିବାରୁ ଅଘଟଣ ଘଟିଥିବା କୁହାଯାଉଛି ।
ଅନ୍ୟପକ୍ଷରେ ଅଘଟଣ ପରେ ପ୍ଲାଣ୍ଟ ବାହାରେ ଚାପା ଉତ୍ତେଜନା ପ୍ରକାଶ ପାଇଛି । ବାହାରେ ଶତାଧିକ ଲୋକ ଏକାଠି ହୋଇଛନ୍ତି । ଖବର ପାଇ ପଶ୍ଚିମାଞ୍ଚଳ ଡିଆଇଜି ବ୍ରିଜେଶ ରାୟ, ସୁନ୍ଦରଗଡ଼ ଏସପି ଓ ତହଲସିଲଦାର ପହଁଚିଛନ୍ତି । ତେବେ ହପର୍ ଷ୍ଟ୍ରକଚର୍ କୁ ହଟାଗଲା ପରେ ସମ୍ପୂର୍ଣ୍ଣ ଘଟଣା ସାମ୍ନାକୁ ଆସିବ ବୋଲି କହିଛନ୍ତି ଡିଆଇଜି ।
Comments are closed.