ଭୁବନେଶ୍ୱର : ପାଣ୍ଡିଆନଙ୍କୁ ନେଇ ବିଜେଡି ଶିବିରରେ ତେଜୁଛି ଅସନ୍ତୋଷ । ଧୀରେ ଧୀରେ ଏହା ବିସ୍ଫୋରକ ରୂପ ନେବାରେ ଲାଗିଛି । ମୁହଁ ଖୋଲୁଛନ୍ତି ଜଣେ ପରେ ଜଣେ ବରିଷ୍ଠ ନେତା । ଗତକାଲି ବିଜେଡି ବରିଷ୍ଠ ନେତା ବଦ୍ରି ପାତ୍ରଙ୍କ ପରେ ଆଜି ପାଣ୍ଡିଆଙ୍କୁ କଟାକ୍ଷ କରିଛନ୍ତି ପୂର୍ବତନ ଏକାମ୍ର ବିଧାୟକ ଅଶୋକ ପଣ୍ଡା । ପାଣ୍ଡିଆନଙ୍କ ‘ ଆଇ ଆମ୍ ଡାଉନ୍ ବଟ୍ ନଟ୍ ଆଉଟ୍’ ଉକ୍ତିକୁ ନେଇ ବିବୃତି ଦେଉଛନ୍ତି ଜଣେ ପରେ ନେତା ।
ଆଜି ବରିଷ୍ଠ ବିଜେଡି ନେତା ଅଶୋକ ପଣ୍ଡା ପାଣ୍ଡିଆନଙ୍କୁ କଟାକ୍ଷ କରି କହିଛନ୍ତି, ଆଇ ଆମ୍ ଡାଉନ୍ ବଟ୍ ନଟ୍ ଆଉଟ୍ ବିଷୟରେ କିଛି କହିବିନି । କିନ୍ତୁ ଯିଏ କହିଛନ୍ତି ଓ ଯାହା ଉଦ୍ଦେଶ୍ୟରେ କହିଛନ୍ତି ସେ ହିଁ କହିପାରିବେ । ସୀମା ବାହାରକୁ ଯିବାକୁ ନବୀନ ବାବୁ କେବେ ଶିଖାଇ ନାହାନ୍ତି । ଅନ୍ୟାୟ ବିରୋଧରେ ସ୍ୱର ଉତ୍ତୋଳନ କରିବୁ, ଆଉଟ୍ ହେବାର ପ୍ରଶ୍ନ ଉଠୁନି ।
ଅଶୋକ ପଣ୍ଡା କହିଛନ୍ତି ନବୀନ ବାବୁ କୌଣସି ବ୍ୟକ୍ତିଙ୍କର ଏକଚାଟିଆ ସମ୍ପତ୍ତି ନୁହେଁ, ସିଏ ଓଡ଼ିଶାବାସୀଙ୍କ ସମ୍ପତ୍ତି । ସାଢ଼େ ୪ କୋଟି ଓଡ଼ିଆଙ୍କ ସମ୍ପତ୍ତି ହେଉଛନ୍ତି ନବୀନ ବାବୁ । ୪୧ ପ୍ରତିଶତ ଜନାଦେଶ ପାଇଛୁ, ଆଉଟ ହେବାର ପ୍ରଶ୍ନ ଉଠୁ ନାହିଁ। ଶ୍ରୀରାମଙ୍କ ୧୪ ବର୍ଷ ବନବାସ ବେଳେ ସୀତାଙ୍କ ପାଇଁ ଲକ୍ଷ୍ମଣରେଖା ଟାଣିଥିଲେ ଭାଇ ଲକ୍ଷ୍ମଣ। ସବୁ କ୍ଷେତ୍ରରେ ଶୃଙ୍ଖଳା ଅନୁଶାସନର ଆବଶ୍ୟକତା ରହିଛି ବୋଲି କହିଛନ୍ତି ଅଶୋକ ପଣ୍ଡା। ସେ କହିଛନ୍ତି ଦଳ ସମସ୍ତଙ୍କୁ ନେଇ ଚାଲିବ, ନିର୍ଦ୍ଦିଷ୍ଟ ବର୍ଗଙ୍କୁ ନେଇ ଚାଲିପାରିବ ନାହିଁ। ।
ସେହିପରି ଗତକାଲି ବିଜେଡି ବରିଷ୍ଠ ନେତା ବଦ୍ରି ପାତ୍ର ପରୋକ୍ଷରେ ପାଣ୍ଡିଆନଙ୍କୁ ନିଶାନା ସାଧି କହିଛନ୍ତି, ଆଇ ଆମ୍ ଡାଉନ୍ ବଟ ନଟ୍ ଆଉଟର ଅର୍ଥ କ’ଣ ମୁଁ ଜାଣେନି। ତା’ର ଅର୍ଥ କଣ ଯିଏ କହିଛନ୍ତି ସେ ବୁଝିଥିବେ, ଯାହାକୁ କହିଛନ୍ତି ସେ ବୁଝିଥିବେ। ହେଲେ ଦଳର ଦାୟିତ୍ୱରେ ଥିବା ଲୋକ ନିଜ ସୀମା ଟପୁଛନ୍ତି। ସୁଜାତା କାର୍ତ୍ତିକେୟନ ଦଳକୁ ଆସିବାରେ ମନା ନାହିଁ। କିନ୍ତୁ ସମସ୍ତେ ନିଜ ସୀମା ଜାଣିବା ଆବଶ୍ୟକ ବୋଲି କଡ଼ା ପ୍ରତିକ୍ରିୟା ରଖିବା ସହ ଏଇ ସୀମା ଉଲ୍ଲଂଘନ ପାଇଁ ୨୦୨୪ ବିପର୍ଯ୍ୟୟ ହେଲା ବୋଲି କହିଛନ୍ତି ବଦ୍ରି ।
ସେହିପରି ବର୍ତ୍ତମାନ ଦଳ ଭିତରେ ଦ୍ବନ୍ଦ୍ବ ବଢୁଛି। ଶୀର୍ଷ ନେତୃତ୍ବ ଆସ୍ଥା ହରାଉଥିବାରୁ ତଳସ୍ତରରେ କର୍ମୀ ଦଳ ଛାଡ଼ୁଛନ୍ତି। ତେଣୁ ସମସ୍ତଙ୍କୁ ସାଥୀରେ ନେଇ ଆଗକୁ ବଢିବା ହିଁ ବୁଦ୍ଧିମାନର କାମ ହେବ ବୋଲି ବଦ୍ରି କହିଛନ୍ତି ।
