ଗଞ୍ଜାମ : ଟ୍ରକ ପଛକୁ ପିଟି ହେଲା ଯାତ୍ରୀବାହୀ ବସ । ଭୁବନେଶ୍ୱର ଆସୁଥିବାବେଳେ ଗଞ୍ଜାମ ଏନଏଚ.ରେ ଟ୍ରକ ସହ ଧକ୍କା ହୋଇଛି ଖମ୍ବେଶ୍ବରୀ ନାମକ ଯାତ୍ରୀବାହୀ ବସ । ଏଥିରେ ୫ ଜଣ ଯାତ୍ରୀ ଆହତ ହେବା ସହ ଡ୍ରାଇଭର ଗୁରୁତର ହୋଇଥିବା ଜଣାପଡିଛି । ଘଟଣାସ୍ଥଳରେ ଗଞ୍ଜାମ ପୁଲିସ ପହଞ୍ଚି ଆହତ ଯାତ୍ରୀଙ୍କୁ ଉଦ୍ଧାର ପରେ ନିକଟସ୍ଥ ଡାକ୍ତରଖାନାକୁ ପଠାଇଥିବା ସୂଚନା ମିଳିଛି।
ଆଜି ସକାଳେ ବ୍ରହ୍ମପୁରରୁ ଭୁବନେଶ୍ୱର ଅଭିମୁଖେ ଆସୁଥିଲା ଖମ୍ବେଶ୍ବରୀ ନାମକ ଏକ ଯାତ୍ରୀବାହୀ ଘରୋଇ ବସ । ଏହି ସମୟରେ ଜାତୀୟ ରାଜପଥ ଦଶଟୁଙ୍ଗି ଛକ ନିକଟରେ ଆଗରେ ଯାଉଥିବା ଏକ ଟ୍ରକ କୌଣସି କାରଣରୁ ହଠାତ୍ ବ୍ରେକ୍ ମାରିବା ଫଳରେ ପଛପଟେ ଦ୍ରୁତ ଗତିରେ ଆସୁଥିବା ଖମ୍ବେଶ୍ବରୀ ବସଟି ଟ୍ରକ ପଛପଟେ ପିଟି ହୋଇଯାଇଥିଲା । ଦୁର୍ଘଟଣାରେ ବସର ଆଗ ସମ୍ପୂର୍ଣ୍ଣ ଭାଙ୍ଗି ଚୁର୍ମାର୍ ହୋଇଥିବା ବେଳେ ଚାପି ହୋଇ ରହିଯାଇଥିଲା ଚାଳକ। ଏଥିରେ ୫ ଜଣ ଯାତ୍ରୀ ଆହତ ହୋଇଥିଲେ । ଘଟଣାର ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଡ୍ରାଇଭରଙ୍କ ସମେତ ସମସ୍ତ ଆହତ ଯାତ୍ରୀଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତି କରିଛି ।
