ନୂଆଦିଲ୍ଲୀ : ସୁପ୍ରିମ କୋର୍ଟଙ୍କ ବଡ଼ ରାୟ । ୟୁଟ୍ୟୁବର ରଣବୀର ଆଲ୍ଲାବାଦିଆ ଏବଂ ଷ୍ଟାଣ୍ଡ-ଅପ୍ କମେଡିଆନ ସମୟ ରାଇନାଙ୍କୁ ଭର୍ତ୍ସନା କରିଛନ୍ତି ସୁପ୍ରିମକୋର୍ଟ। ଏହା ସହ କୋର୍ଟରେ ଏବଂ ନିଜ ସୋସିଆଲ ମିଡିଆରେ ନିଃସର୍ତ୍ତ କ୍ଷମା ମାଗିବାକୁ ନିର୍ଦ୍ଦେଶ ଦେଇଛନ୍ତି ।‘ଇଣ୍ଡିଆ’ସ ଗଟ୍ ଲାଟେଣ୍ଟ’ ଶୋ’ରେ ଅପମାନଜନକ ମନ୍ତବ୍ୟ ପାଇଁ କ୍ଷମା ମାଗିବାକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ଅନଲାଇନରେ ଅଶ୍ଳୀଳ ଶବ୍ଦ ବ୍ୟବହାର ମାମଲାରେ ଏହି ରାୟ ଦେଇଛନ୍ତି । ଏବଂ ଭବିଷ୍ୟତରେ ଏହା ଉଲ୍ଲଙ୍ଘନ କଲେ ଆର୍ଥିକ ଦଣ୍ଡ ଲାଗୁ ହୋଇପାରେ ବୋଲି ଚେତାବନୀ ଦେଇଛନ୍ତି।
‘ଇଣ୍ଡିଆ’ସ ଗଟ୍ ଲାଟେଣ୍ଟ’ ଶୋ’ରେ ଭିନ୍ନକ୍ଷମଙ୍କ ଉଦ୍ଦ୍ୟେଶରେ ଅପମାନ ଜନକ ମନ୍ତବ୍ୟ ପାଇଁ ଷ୍ଟାଣ୍ଡ ଅପ୍ କମେଡିଆନ ସମୟ ରାଇନା, ରଣବୀର ଆଲ୍ଲାବାଦିଆ ଓ ଅନ୍ୟ ତିନଜଣ ଇନଫ୍ଲୁଏନ୍ସରଙ୍କୁ କ୍ଷମା ମାଗିବାକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ଏଥିସହିତ କୋର୍ଟ ସେମାନଙ୍କୁ ଦୁଇ ସପ୍ତାହ ମଧ୍ୟରେ ଲିଖିତ ଜବାବ ଦାଖଲ କରିବାକୁ ଓ ପରବର୍ତ୍ତୀ ଶୁଣାଣିରେ ଉପସ୍ଥିତ ରହିବାକୁ ନିର୍ଦ୍ଦେଶ ଦେଇଛନ୍ତି ।
SMA କ୍ୟୁର୍ ଫାଉଣ୍ଡେସନ୍ ଦ୍ୱାରା ଦାଖଲ କରାଯାଇଥିବା ଆବେଦନରେ ହାସ୍ୟ ଅଭିନେତା ସମୟ ରାଇନା, ବିପୁନ୍ ଗୋୟଲ୍, ବଲରାଜ ପରମଜିତ୍ ସିଂହ ଘାଇ, ସୋନାଲି ଠକ୍କର ଏବଂ ନିଶାନ୍ତ ଜଗଦୀଶ ତନୱାରଙ୍କୁ ଭିନ୍ନକ୍ଷମ ବ୍ୟକ୍ତିମାନଙ୍କ ବିଷୟରେ “ଅସମ୍ବେଦନଶୀଳ ମଜା” କରିବାର ଅଭିଯୋଗ କରାଯାଇଥିଲା ।
ବିଚାରପତି ସୂର୍ଯ୍ୟ କାନ୍ତ ଏବଂ ଜୟମାଲ୍ୟ ବାଗଚୀଙ୍କ ଖଣ୍ଡପୀଠ କହିଛନ୍ତି ଯେ ହାସ୍ୟରସ କିମ୍ବା ମନୋରଞ୍ଜନ ନାମରେ କୌଣସି ବର୍ଗର ଭାବନାକୁ ଅପମାନ କରିବା ଗ୍ରହଣୀୟ ନୁହେଁ।,”ଭିନ୍ନକ୍ଷମଙ୍କ ପାଇଁ ଆପତ୍ତିଜନକ ମନ୍ତବ୍ୟ ପାଇଁ ଆପଣ କୋର୍ଟ ସମ୍ମୁଖରେ ଆପଣଙ୍କ ସାମାଜିକ ଗଣମାଧ୍ୟମ ଦ୍ୱାରା ସେହିମାନଙ୍କ ପାଇଁ କ୍ଷମା ପ୍ରାର୍ଥନା କରନ୍ତୁ।” ଏହାବ୍ୟତୀତ କୋର୍ଟ କେନ୍ଦ୍ର ସରକାରଙ୍କୁ ଡିଜିଟାଲ କଣ୍ଟେଣ୍ଟ ନିୟନ୍ତ୍ରଣ ପାଇଁ ଗାଇଡଲାଇନ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି ।
