ନୂଆଦିଲ୍ଲୀ : ସଂସଦ ସୁରକ୍ଷାରେ ବଡ ତ୍ରୁଟି । ଶୁକ୍ରବାର ନୂଆ ସଂସଦ ଭବନ ଭିତରକୁ ପଶିବାକୁ ଉଦ୍ୟମ କଲେ ଅନୁପ୍ରବେଶକାରୀ । କଡା ସୁରକ୍ଷା ବଳୟ ସତ୍ତ୍ୱେ ସନ୍ଦିଗ୍ଧ ଜଣକ ପାଚେରୀ ଡେଇଁ ସଂସଦର ଗରୁଡ଼ ଦ୍ଵାରରେ ପହଞ୍ଚି ଯାଇଥିଲେ । ସେହି ସମୟରେ ଅତି ଚତୁରତାର ସହିତ ସନ୍ଦିଗ୍ଧ ଯୁବକଙ୍କୁ କାବୁ କରିଥିଲେ ସୁରକ୍ଷାକର୍ମୀ ।
ଶୁକ୍ରବାର ସକାଳ ପ୍ରାୟ ୬.୩୦ ସମୟରେ ଏହି ଘଟଣା ଘଟିଥିଲା। ବ୍ୟକ୍ତି ଜଣକ ପ୍ରଥମେ ଗଛରୁ ରେଳ ଭବନ ପାର୍ଶ୍ୱ କାନ୍ଥ ଡେଇଁ ନୂଆ ସଂସଦ ଭବନର ଗରୁଡ଼ ଦ୍ଵାରରେ ପହଞ୍ଚିଥିଲା । ଏହି ସମୟରେ ସୁରକ୍ଷାକର୍ମୀ ଯୁବକଙ୍କୁ କାବୁ କରିନେଇଥିଲେ । ତେବେ କେଉଁ ଉଦ୍ଦେଶ୍ୟରେ ଦୁର୍ବୃତ୍ତ ଜଣକ ସଂସଦ ଭିତରକୁ ପଶିଥିଲା, ତାର କାରଣ ଜଣାପଡିନାହିଁ । ଯୁବକଙ୍କୁ ଧରିବା ପରେ ସିଆଇଏସଏଫ ଯବାନ ସଂସଦମାର୍ଗ ପୋଲିସ ଷ୍ଟେସନରେ ହସ୍ତାନ୍ତର କରିଥିଲେ ।
ମୌସୁମୀ ଅଧିବେଶନ ସରିବାର ଦିନକ ପରେ ଏହି ଘଟଣା ଘଟିଛି । ଅଭିଯୁକ୍ତକୁ ସ୍ଥାନୀୟ ପୋଲିସକୁ ସରକାରୀ ଭାବରେ ହସ୍ତାନ୍ତର କରାଯିବା ପରେ ହିଁ ପୋଲିସ ତାଙ୍କୁ ପଚରାଉଚରା କରିବ। ବର୍ତ୍ତମାନ, ସଂସଦ ସୁରକ୍ଷା ଶାଖା ତାଙ୍କୁ ପଚରାଉଚରା କରୁଛି।
ଗତବର୍ଷ ମଧ୍ୟ ସମାନ ଘଟଣା ଘଟିଥିଲା । ଜଣେ ଯୁବକ ପାଚେରୀ ଡେଇଁ ସଂସଦ ଭବନ ଭିତରକୁ ପ୍ରବେଶ କରିଥିଲା । ସଂସଦ ଭବନରେ ଉପସ୍ଥିତ ସୁରକ୍ଷା କର୍ମୀ ଅଭିଯୁକ୍ତକୁ କାବୁ କରିଥିଲେ । ତେବେ କେଉଁ ଉଦ୍ଦେଶ୍ୟରେ ଦୁର୍ବୃତ୍ତ ଜଣକ ସଂସଦ ଭିତରକୁ ପଶିଥିଲା, ତାର କାରଣ ଏପର୍ଯ୍ୟନ୍ତ ଜଣାପଡିନାହିଁ ।
