ବୌଦ୍ଧ/ଢେଙ୍କାନାଳ : ଶୁକ୍ରବାର ସକାଳେ ୨ଟି ସ୍ଥାନରେ ଘଟିଛି ଯାତ୍ରୀବାହୀ ବସ ଦୁର୍ଘଟଣା । ବୌଦ୍ଧ ଜିଲ୍ଲା ୫୭ ନମ୍ବର ଜାତୀୟ ରାଜପଥ ବାଉଁଶୁଣି ଥାନା ଗଜରାଜପୁର ନିକଟରେ ଏକ ବୁଲେଟ୍କୁ ବସ୍ ଧକ୍କା ଦେବାରୁ ଦୁଇ ବୁଲେଟ୍ ଆରୋହୀଙ୍କ ମୃତ୍ୟୁ ହୋଇଛି । ସେମାନେ ମାମୁଁ-ଭଣଜା ବୋଲି ସୂଚନା ମିଳିଛି । ‘ରଘୁନାଥ’ ନାମକ ଯାତ୍ରୀବାହୀ ବସଟି ଭୁବନେଶ୍ୱରରୁ ଉମରକୋଟ ଯାଉଥିବାବେଳେ ଦୁର୍ଘଟଣା ଘଟିଥିଲା । ତେବେ ଏଥିରେ ସମସ୍ତ ବସ ଯାତ୍ରୀ ସୁରକ୍ଷିତ ଥିବା ଜଣା ପଡିଛି । ବାଉଁସୁଣୀ ପୁଲିସ ଘଟଣାର ତଦନ୍ତ କରୁଥିବା ଜଣାପଡ଼ିଛି ।
ଅନ୍ୟପଟେ,ଆଜି ଢେଙ୍କାନାଳ ଜିଲ୍ଲା କାମାକ୍ଷା ନଗର ପରଜଙ୍ଗରୁ ଭୁବନେଶ୍ୱର ଆସୁଥିବା ‘ଜଗନ୍ନାଥ’ ନାମକ ଯାତ୍ରୀବାହୀ ବସ ଦୁର୍ଘଟଣାଗ୍ରସ୍ତ ହୋଇଛି । ଭାରସାମ୍ୟ ହରାଇ ବସଟି ରେଙ୍ଗାଲିର ଶାଖା କେନାଲ ଭିତରକୁ ଖସି ପଡିଥିଲା । କାମାକ୍ଷାନଗର-ତୁମୁସିଂହା ଥାନା କନ୍ତିଓକାଟେଣୀଠାରେ ଏହି ଦୁର୍ଘଟଣା ଘଟିଛି । ଏଥିରେ ୨୨ ଜଣ ଯାତ୍ରୀ ଆହତ ହୋଇଥିବା ସୂଚନା ମିଳିଛି । ବସରେ ୫୦ରୁ ଅଧିକ ଯାତ୍ରୀ ଥିଲେ ।
କାମାକ୍ଷାନଗର ଅଗ୍ନିଶମ ବାହିନୀ ଓ ସ୍ଥାନୀୟ ଲୋକଙ୍କ ସହାୟତାରେ ଗୁରୁତର ଯାତ୍ରୀଙ୍କୁ ଉଦ୍ଧାର କରାଯାଇ ନିକଟସ୍ଥ ହସ୍ପିଟାଲରେ ଭର୍ତି କରାଯାଇଛି । ଆହତ ଯାତ୍ରୀମାନେ ପରଜଙ୍ଗ ଓ ଭୁବନଶ୍ୱର ଅଂଚଳର ହୋଇଥିବା ସୂଚନା ମିଳିଛି ।
